სულ რამდენიმე დღე გავიდა მას შემდეგ, რაც ავტორიტეტულმა გამოცემებმა რეალ მადრიდის როდრით დაინტერესების შესახებ დაწერეს. მიუხედავად იმისა, რომ ტრანსფერი ჯერ მხოლოდ მოლაპარაკებების ეტაპზეა, ესპანეთსა და ინგლისში უკვე აქტიურად მსჯელობენ, რატომ მიიჩნევს ჟოზე მოურინიო სწორედ მანჩესტერ სიტის ნახევარმცველს იმ ფეხბურთელად, რომელიც მადრიდულ გრანდს სრულყოფილ ბალანსს დაუბრუნებს.
გასულ სეზონში რეალ მადრიდს არაერთ მატჩში ეტყობოდა, რომ ნახევარდაცვის ცენტრში სტაბილურობა და კონტროლი აკლდა. მიუხედავად იმისა, რომ გუნდს ტექნიკურად გამორჩეული და შემტევად მოაზროვნე ნახევარმცველები ჰყავს, დაცვასა და შეტევას შორის ბალანსის შენარჩუნება ხშირად პრობლემად იქცეოდა. სწორედ ამიტომ, მოურინიოს ერთ-ერთ მთავარ პრიორიტეტად საყრდენი ნახევარმცველის დამატება იქცა, მისთვის მთავარი სამიზნე კი როდრია.
როდრის მთავარი უპირატესობა თამაშის კონტროლის უნარია. ის მსოფლიოში ერთ-ერთი საუკეთესო ნახევარმცველია ბურთის ფლობის, პოზიციური თამაშისა და ტემპის რეგულირების თვალსაზრისით. ესპანელს შეუძლია ერთი ზუსტი გადაცემით მეტოქის პრესინგი გაარღვიოს, შეტევის მიმართულება შეცვალოს და გუნდს სრული სიმშვიდე შესძინოს. გარდა ამისა, ის შესანიშნავად კითხულობს თამაშს, დროულად შლის მეტოქის შეტევებს და იშვიათად უშვებს პოზიციურ შეცდომებს. სწორედ ასეთი ფეხბურთელი აკლდა რეალ მადრიდს ბოლო სეზონებში, განსაკუთრებით იმ შეხვედრებში, სადაც გუნდი ბურთზე კონტროლს კარგავდა.
არანაკლებ მნიშვნელოვანია მისი ლიდერული თვისებები და გამოცდილება. როდრი წლების განმავლობაში იყო მანჩესტერ სიტის ნახევარდაცვის მთავარი ფიგურა და არაერთ გადამწყვეტ შეხვედრაში დაამტკიცა, რომ უმაღლესი დონის ზეწოლის ქვეშაც შეუძლია საუკეთესო ფეხბურთის ჩვენება. ამ ყველაფერს ემატება ესპანეთის ნაკრებში ჩატარებული ტოპ პერფორმანსებიც. ბევრი თვლის, რომ ლუის დე ლა ფუენტესტის როდრი შეუცვლელი ფეხბურთელია, რაც ლოგიკურია - ესპანეთის ნაკრები როდრისთან და როდრის გარეშე სულ სხვადასხვა ფეხბურთს აჩვენებს. 30 წლის ნახევარმცველის დამატებით რეალ მადრიდი არა მხოლოდ დაცვით სიმყარეს შეიძენს, არამედ უფრო თავისუფლებას მისცემს შემტევ ფეხბურთელებს, რადგან მათ უკან მსოფლიოში ერთ-ერთი ყველაზე საიმედო საყრდენი იდგება.
თუმცა, ტრანსფერს თავისი სირთულეებიც ახლავს. როდრი მანჩესტერ სიტისთვის ერთ-ერთი ყველაზე მნიშვნელოვანი ფეხბურთელია და ინგლისური კლუბი მის დათმობას მარტივად არ აპირებს. გარდა ამისა, ესპანელს ახლა ტრავმა აქვს და რეალ მადრიდისთვის მნიშვნელოვანი იქნება, რომ მან საუკეთესო ფორმა რაც შეიძლება მალე დაიბრუნოს. მიუხედავად ამისა, მოურინიო დარწმუნებულია, რომ როდრი სწორედ ის ფეხბურთელია, რომელიც მის სისტემაში იდეალურად ჩაჯდება და იმედოვნებს, რომ კლუბი მის ტრანსფერს დახურავს.
თუ რეალ მადრიდი ამ ტრანსფერს წარმატებით განახორციელებს, ეს ზაფხულის ერთ-ერთი ყველაზე ხმაურიანი გარიგება იქნება. როდრის მსგავსი ნახევარმცველის დამატება "სამეფო კლუბს" არა მხოლოდ ცენტრში მეტ სტაბილურობასა და ხარისხს შესძენს, არამედ გუნდს ჩემპიონთა ლიგისა და ლა ლიგის მოგების ერთ-ერთ მთავარ ფავორიტად აქცევს.
