2 დღეში საქართველოში მსოფლიო რაგბის ახალგაზრდული ჩემპიონატი დაიწყება. შეჯიბრება 27 ივნისიდან 18 ივლისის ჩათვლით გაიმართება. როგორც თბილისში, ასევე ქუთაისში, 20-20 უმაღლესი დონის თამაში ჩატარდება. ერთმანეთს შეერკინებიან მსოფლიო რაგბის 16 წამყვანი ქვეყნის 20-წლამდელთა ნაკრებები, რომლებიც დაკომპლექტებული არიან ამომავალი ვარსკვლავებით.
საქართველოს მორაგბეთა U20 ნაკრები, 2016 წლიდან ზედიზედ მერვე ტურნირს ითამაშებს. უმცროსი ბორჯღალოსნები A გუფში მოქმედ ჩემპიონ სამხრეთ აფრიკასთან, უელსთან და ურუგვაისთან იასპარეზებენ.
საქართველოს U20 ნაკრების მოსამზადებელი ეტაპისა და ტურნირისთვის დასახული მიზნების შესახებ, ჩვენი გუნდის მთავრმა მწვრთნელმა, ვიტო კოლელიშვილმა LaGazzetta.ge-სთან ინტერვიუში ისაუბრა:
- როგორ შეაფსებთ მოსამზადებელ პერიოდს?
- დადებითად შევაფასებ მოსამსაზდებელ პერიოდს, ბოლო 2 თამაში საქართველოში ამის კარგი მაგალითია, გამარჯვებით დავიწყეთ ამხანაგური თამაშები. ისეთ გუნდთან გამარჯვება, როგორიც ახალი ზელანდიაა, დარწმუნებული ვარ მეტი მოტივაციისა და თავდაჯერების მომტანი იქნება.
- რა იქნება ჩვენი გუნდის მთავარი მიზანი?
- ჩვენი გუნდის მთავარი მიზანია U20 წლამდე ნაკრების ისტორიაში საუკეთესო შედეგის დაფიქსირება.
- რომელ მეტოქესთან ელით ყველაზე რთულ მატჩს?
- ჩვენთვის მნიშვნელოვანი იქნება, ჯგუფური ეტაპის ჩვენი სცენარით დასრულება. ყველა მეტოქესთან თანაბარი მოტივაციითა და შემართებით გავალთ.
- მოქმედ ჩემპიონ სამხრეთ აფრიკას რას დავუპირისპირებთ?
- ახალ ზელანდიასთან მატჩმა დაგვანახა რომ დღეს საქართველოს ნაკრებს ყველა კომპონენტში თამაში კარგად შეუძლია და რაც მთავარია, იმის თავდაჯერებულობა გვაქვს, რომ საკუთარ კედლებში შეუძლებლის შეძლებაც კი შესაძლებელია. აქედან გამომდინარე, ჩვენი გულშემატკივრის როლი იქნება უმნიშვნელოვანესი, ჩვენი ხასიათი, თავდადება, ფიზიკურობა და თამაშის წარმართვა.
- ერთ-ერთი ყველაზე ახალგაზრდული გუნდი გვეყოლება ტურნირზე, ჩვენი გუნდის უპირატესობად რას მიიჩნევთ?
- ამ ნაწილშიც შეიძლება ითქვას, რომ სწორად ვიმუშავეთ, გვაქვს მოთამაშეების არაჩვეულებრივი "მიქსი", გვაყავს გამოცდილი და პოტენციურად არაჩვეულებრივი მორაგბეები. ჩვენი გუნდის უპირატესობად მივიჩნევ იმას, რომ შეგვიძლია თანაბრად სახიფათოები ვიყოთ შეკრინების, შეტევისა და დაცვით თამაშში.
- ჯგუფური ეტაპის დაძლევის შემდეგ, ვისთან თამაში იქნება თქვენთვის ყველაზე საინტერესო?
- მსოფლიოს ჩემპიონატზე ყველა თამაში იქნება განსაკუთრებული. იქნება დიდი დატვირთვა და სირთულიდან გამომდინარე, არ ვიქნები კორექტული თუ რომელიმე მატჩს გამოვარჩევ. მნიშვნელოვანია პირველი თამაშის კარგად დაწყება, ჩვენს მიზნებს უნდა მივაღწიოთ და ყველა მატჩს ექნება თავის მონახაზი და დატვირთვა.
- 2017 წელს ვნახეთ რომ ამ ტურნირმა რამდენიმე ლიდერი მორაგბე გამოკვეთა, ამ შემთხვევაში ვის გამოყოფთ?
- გუნდში ძალიან ბევრი მორაგბე გვყავს, რომელსაც არაჩვეულებრივი პოტენციალი აქვს და დარწმუნებული ვარ, ამ შესაძლებლობას გამოიყენებენ და მსოფლიოს ჩემპიონატზე გაიბრწყინებენ. მათ შორის გვყავს მიხეილ შიოშვილი, რომლსაც აარჩვეულებრივი მსოფლიო ჩემპიონატი ჰქონდა შარშან. წელს საფრანგეთის TOP 14-ში ძალიან ბევრი კარგი თამაში ჩაატარა და ჩვენი გუნდისთვის დიდი ძალაა.
- რას ეტყვით გულშემატკივარს, რამდენად მნიშვნელოვანია ასეთ დროს მატჩებზე მხარადაჭერა?
- გულშემატკივარს ყველა თამაშზე ვპირდებით, ბრძოლას, შემართებასა და თავდადებას, ჩვენი ქვეყნისთვის, ჩვენი გულშემატკივრებისთვის. მოვიდნენ მატჩებზე და ისიამოვნონ მაღალი დონის რაგბით.
ჯგუფური ეტაპის შეხვედრებს საქართველოს მორაგბეთა U20 ნაკრები თბილისში, “ავჭალაზე” გამართავს და 27 ივნისს, 18:00 საათზე უელსს, 2 ივლისს 20:30 საათზე სამხრეთ აფრიკას, ხოლო 7 ივლისს 20:30 საათზე ურუგვაის ეთამაშება, რის შემდეგაც, ჯგუფში დაკავებული ადგილის მიხედვით, შესაბამის ფლეი ოფში (ნახევარფინალი და ფინალი) გადაინაცვლებს.
