32 წლის ასაკში ახდენილი ოცნება - საქართველოს ნაკრების ფორვარდმა გიორგი ქვილითაიამ ლიგა 1-ში ორი გოლი გაიტანა და მეცის თვის საუკეთესო ფეხბურთელი გახდა. მიუხედავად იმისა, რომ მეცი ლიგა 1-დან გავარდა, ქვილითაიასთვის წინა მატჩები წარმატებული გამოდგა.
"ტოპ 5 ჩემპიონატში თამაში ის შეგრძნებაა, რომელიც ყველა ფეხბურთელს უნდა, რომ გამოცადოს, მე კი ახლა შევიგრძენი და მოხარული ვარ, რომ ჩემს კარიერაში ეს ფაქტიც მოხდა."
ტოპ 5 ლიგაში მოხვედრის ემოციებზე და ახდენილ ოცნებაზე
"ჩემი კარიერული პიკი როცა იყო, ისე დაემთხვა, რომ ტრავმებს ვიღებდი. 3 მძიმე ტრავმა მაქვს მიღებული, 2-ჯერ ფეხი მოვიტეხე და ამ ყველაფერმა ხელი შემიშალა. ცოტა ადრეც შეიძლებოდა, რომ ტოპ 5-ში მეთამაშა და ერთადერთი, რასაც ვაბრალებ, ტრავმებია, რადგან არცერთი დღე არ მახსენდება, როცა გავაკეთე იმაზე ნაკლები, ვიდრე უნდა გამეკეთებინა. ასეთ ასაკში ტოპ ლიგაში მოხვედრა ცოტა მოულოდნელი იყო, თუმცა იმის გათვალისწინებით, რაც მე ფეხბურთს მივეცი, ვფიქრობ, ვიმსახურებდი."
აპრილის თვის საუკეთესო ფეხბურთელი
"როცა მეცში გადმოვედი, თავიდან ნაკლები ნდობა მქონდა, შემდეგ 3 კვირა ტრავმის გამო გამოვტოვე, რის შემდეგაც კარგად დავბრუნდი და წარმატებული მატჩები ჩავატერე. თვის საუკეთესო ფეხბურთელის წოდება სასიამოვნო გრძნობაა. გასული თვე ჩემთვის იყო ის, რისთვისაც აქ გადმოვედი."
საფრანგეთის ლიგა 1-ის დონის შეფასება
"აქ ბევრად სწრაფი ფეხბურთია, ვიდრე სხვა ლიგებში. გადაწყვეტილების მიღება უფრო სწრაფად მიწევს. არ ვამბობ იმას, რომ საქართველოში ან სხვა ლიგაში ნაკლებ კილომეტრებს დარბიან, უბრალოდ განსხვავება სისწრაფეებშია. სტადიონებს და შეფუთვას რომ თავი დავანებოთ, ლიგა 1-ში გადმოსვლისას თვალში პირველი სწორედ სისწრაფეების სხვაობა მომხვდა. მე კი ადაპტაცია მარტივად მოვახერხე. ზოგადად, სადაც ხარ, იმ გარემოს ერგები და ისეთი ფეხბურთელი ხდები, რა გარემოშიც ხვდები."
3 ქართველი მეცში
"წიტაიშვილის და აბუაშვილის სახით გუნდში ქართველები დამხვდნენ. ორივე მშრომელი და მიზანდასახული ფეხბურთელია და მათთან გატარებული პერიოდი სასიამოვნოა, რადგან თითქოს, ერთნაირი ცხოვრების სტილი და შეხედულებები გვაქვს. ეს კი დიდი ფუფუნებაა, რადგან ყველაფერი მარტივი ხდება. ჩემს კარიერაში თითქმის ყველა კლუბში ქართველი თანაგუნდელი მყავდა, ეს უფრო მოედნის გარეთ არის მნიშვნელოვანი. ფეხბურთი არის დღის პირველ ნახევარში, დღის მეორე ნახევარში კი როცა გყავს ადამიანები ვისთანაც უცხო ქვეყანაში და უცხო გარემოში თავს კომფორტულად გრძნობ, დამატებითი პლიუსია."
უცნობი ფაქტები - ჩაშლილი ტრანსფერი ფეიენოორდში
"როცა აპოელში ვთამაშობდი, გერმანული გუნდიდან შემოთავაზებები მქონდა. რაპიდში ყოფნისას კი ორი წინადადება მივიღე - ვიტესი და ფეიენოორდი. ორივე აქტიურად განიხილებოდა და ამ შემოთავაზებიდან ზუსტად 2 დღეში, ვარჯიშზე ფეხი მოვიტეხე, ტრანსფერი ჩაიშალა და ოპერაციის გაკეთება დამჭირდა, ოპერაციიდან მალევე გენტმა 3 მილიონ ევროდ მიყიდა, რაც იმ პერიოდში ჩემთვის ძალიან სასიხარულო იყო. გენტში გადასვლიდან 3 კვირაში, საქართველოს ნაკრების შეკრებაზე ჩამოვედი და ვარჯიშზე ფეხი მეორედ მოვიტეხე. ამან ჩემს ბელგიურ კარიერას ხელი შეუშალა."
მძიმე ტრავმების შემდეგ დაბრუნება დიდ ფეხბურთში
"ჩემი ხასიათი და ფეხბურთის სიყვარული დამეხმარა, რომ ამდენი მძიმე მომენტის შემდეგ, ფეხბურთში დავბრუნებულიყავი და კვლავ მეთამაშა. ვინც მიცნობს, კარგად იცის, როგორ მიყვარს ფეხბურთი. იმ ტრავმების და სირთულეების ფონზე, რაც მე მქონდა, ფეხბურთელების 90% კარიერის გაგრძელებას ვერ შეძლებდა."
რატომ იღებენ ქართველი ფეხბურთელები ხშირად ტრავმებს?
"პრობლემა არის ბავშვობაში. ჩემს მაგალითს ვიტყვი. 14 წლამდე ისეთ გუნდში გავიზარდე, სადაც მხოლოდ ერთი ბურთი გვქონდა. მოედანზე საუბარი ზედმეტია. დღეს ბევრად კარგი პირობებია, ბევრი კარგი სტადინი საქართველოში და ეს ახალ თაობაზე კარგად აისახა. ჩვენს თაობაში არ ვიცოდით, რა იყო სწორი კვება, რა იყო დანამატი, არ ვიცოდით როდის უნდა დაგვესვენა და როდის გვევარჯიშა. როცა მეგონა, რომ რაც მეტს ვივარჯიშებდი, უკეთესი იყო. ასე არ ყოფილა და შეიძლება, ზედმეტმა ვარჯიშმა კუნთის ტრავმები გამოიწვიოს. ამ ყველაფერს არ გვასწავლიდნენ და ჩვენამდე ინფორმაციები გვიან მოვიდა."
ახალი თაობის პროგრესი საქართველოში
"ეს თაობა სხვა ხასიათით იზრდება. ფეხბურთის მიმართ სწორი ხასიათი და მიდგომები აქვთ. მხოლოდ ფეხბურთი არ არის, ზოგადად ცხოვრების მიმართ უნდა გქონდეს სწორი მიდგომები. ვარჯიში დღეში 2 საათი გაქვს, შესაბამისად, დანარჩენი ცხოვრების 22 საათი უფრო მნიშვნელოვანია, ვიდრე ის 2 საათიანი ვარჯიში. ამ ახალგაზრდებმა ეს გაითავისეს და ამიტომ არის ის შედეგი, რასაც დღეს ვხედავთ."
საქართველოს ნაკრებზე
"რაც ყველაზე თვალშისაცემია, ჩვენს ნაკრებში არის კარგი გარემო. ნაკრებში ჩამოსვლა ყველას უხარია. ყველანი ერთმანეთთან კარგად ვართ და ეს შედეგს დებს. ვხედავთ, რა გუნდებში თამაშობენ ქართველი ფეხბურთელები. ქართული ნიჭი დაფასდა და ევროპაში ქართველი ფეხბურთელების მიმართ უკვე დიდი ინტერესია."
ყველაზე კომფორტული თანაგუნდელი
"მე და კიტეს დინამო თბილისში თამაში ერთად მოგვიწია. ერთად ვართ ნაკრებშიც. კიტესთან ერთად მოედანზე ყოფნა ძალიან კომფორტულია, სწორი გადაადგილება იცის, სწორი გახსნა და მასთან თამაში ძალიან მიადვილდება."
გიორგი ჩაკვეტაძის დახასიათება
"ჩაკვეს შემთხვევაშიც პრობლემა ტრავმები იყო. იმ ახალგაზრდულ პერიოდში, როცა მას კარიერული ნაბიჯი უნდა გადაედგა, მძიმე ტრავმა მიიღო. ჩაკვეს გამორჩეული ნიჭი აქვს. 90 წუთში ერთი მომენტით თამაშის ბედის გადაწყვეტა შეუძლია. რაც არ უნდა ივარჯიშო და იშრომო, ნიჭი არ ისწავლება. ერთი მომენტით თამაშის ბედის გადაწყვეტა ჩაკვეს ყველაზე დიდი პლიუსია."
ქვილითა, როგორც "დაღვინებული" მოთამაშე
"ჩემს კარიერას რომ გადავხედო, რაღაც მომენტში გარკვეულ გადაწყვეტილებებს შევცვლიდი. ზოგადად, გვიანი არასდროს არ არის, ყველა ფეხბურთელს აქვს თავისი დრო, მომენტი და შანსი, რომელიც ადრე თუ გვიან მიეცემა. ბევრი მუშაობაა საჭირო, რომ იპოვნო ბალანსი ვარჯიშსა და სწორ ცხოვრებას შორის. როცა ფეხბურთის თამაშს ვიწყებთ, იმ მომენტში არც ხელფასზე ვფიქრობთ, არც ის ვიცით, რა კონტრაქტები გვექნება და რა გუნდში წავალთ. ფეხბურთის თამაშს ვიწყებთ სიყვარულით და მთელი კარიერა ისეთივე სიყვარულით უნდა ითამაშო, როგორც ბავშვობაში ეზოში ფეხბურთის თამაშისას."
