ემიგრაცია, სამშობლოსგან და ოჯახისგან შორს ყოფნა, - ყველა სირთულეს შორის უფრო რთული ლევან ჩოხელისთვის ეს ფაქტორებია, თუმცა ქართველი მებრძოლი დასახული მიზნისკენ სვლას აგრძელებს და მისთვის MMA-ში მთავარი ორგანიზაციის, UFC-ის კარი იღება.
თბილისის დროით, 21 ივნისს, 01:00 საათიდან UFC Vegas 119-ზე საქართველოდან ორი მებრძოლის დებიუტი შედგება, რაც იმას ნიშნავს, რომ ლევან ჩოხელისა და ოთარ თანზილოვისთვის კარიერის ახალი ეტაპი იწყება. ლევან ჩოხელი ქვესაშუალო წონით დივიზიონში UFC-ის ასევე დებიუტანტ, ამერიკის სახელით მოასპარეზე ლეონ შაჰბაზიანს დაუპირისპირდება. 29 წლის ლევან ჩოხელს პროფესიულ კარიერაში 17 ბრძოლა აქვს ჩატარებული, საიდანაც 14 მოიგო, 3 წააგო, 1 ბრძოლა კი No Contest გამოცხადდა.
ლევან ჩოხელმა UFC-ის სადებიუტო ბრძოლის შესახებ La Gazzetta dello Sport Georgia-სთან ინტერვიუში ისაუბრა:
- გილოცავთ UFC-სთან ხელშეკრულების გაფორმებას, როგორ მიმდინარეობს პირველი ბრძოლისთვის სამზადისი?
- ბრძოლის სამზადისმა იდეალურად ჩაიარა, ახლა წონის კლებაში ვარ და ყველაფერი კარგად მიდის.
- რას მიიჩნევ შენს მთავარ უპირატესობად?
- მთავარი უპირატესობა ალბათ ჩემი საბრძოლო უნარები და მენტალური მდგომარეობაა.
- შენი პროფესიული გამარჯვებიდან 11 ნოკაუტით მოიგე, სადებიუტო დაპირისპირებაში ნოკაუტისთვის ემზადები?
- რა თქმა უნდა, ბრძოლას ნოკაუტით დავამთავრებ და გავზრდი ნოკაუტების სერიას.
- UFC-მდე განვლილ გზაზე რომ გვითხრა, ძალიან დიდი შრომა დგას ამ ყველაფრის უკან, რა სირთულეების დაძლევა მოგიწია და რა იყო მოტივაცია?
- ყველაზე დიდი სირთულე ჩემს კარიერაში ალბათ ემიგრანტობა არის, ძალიან ძნელია, სამშობლოსგან და ოჯახისგან შორს ყოფნა.
- UFC-ის ერთ-ერთ ყველაზე რთულ დივიზიონში გიწევს ასპარეზობა, რა არის მთავარი მიზანი?
- სირთულეები და სიძნელეები არის ერთ-ერთი დიდი ნაწილი მებრძოლის კარიერაში, რომელიც აუცილებლად უნდა გადალახო ყოველდღიურად. თუ სირთულეების გადალახვას ვერ ახერხებ, ალბათ არასწორ ადგილას ხარ. მე არ ვფიქრობ, რომ რაიმე განსაკუთრებული სირთულის წინაშე ვიქნები ამ დივიზიონში, ვფიქრობ მე ვიქნები პრობლემა და მათ მოუწევთ ამ პრობლემასთან ბრძოლა
შეგახსენებთ, რომ UFC Vegas 119 - თბილისის დროით, 21 ივნისს, 01:00 საათიდან დაიწყება.
