საზოგადოების მაღალი ინტერესისა და გადაუმოწმებელი ინფორმაციის ტირაჟირების გამო, ჯუდოს საერთაშორისო ფედერაციამ ნემანია მაიდოვთან დაკავშირებით, სპეციალური განცხადება გაავრცელა, სადაც დისკვალიფიკაციის მიზეზებზეა საუბარი და აღნიშნულია, რომ IJF პატივს სცემს ყველა ადამიანის რელიგიურ გრძნობას.
IJF-ის განცხადებაში ვკითხულობთ, რომ ნემანია მაიდოვს დისკვალიფიკაცია დაეკისრა ჯუდოს საერთაშორისო ფედერაციის ეთიკის კოდექსის შესაბამისად. პარიზის 2024 წლის ოლიმპიურ თამაშებზე, 31 ივლისს, სერბმა ჯუდოკამ, დაარღვია IJF-ის წესები: ტატამიზე შესვლისას მკაფიო რელიგიური ჟესტის გამოყენება (მუხლი 3) მოწინააღმდეს შეხვედრის დასრულების შემდეგ თავი არ დაუკრა და ჯუდოკას ფორმის გახდა ტატამიზე (მუხლი 8.6.).
შეგახსენებთ, სერბმა ძიუდოისტმა პარიზის ოლიმპიადაზე ბერძენ თეოდოროს ცელიდისთან დაპირისპირებისას ტატამიზე შესვლისას პირჯვარი გადაიწერა. შეხვედრის დასრულების შემდეგ, მეტოქეს პატივისცემის ნიშნად თავი არ დაუხარა, გამარჯვება არ მიულოცა, რაც ძიუდოში აუცილებელი წესია და მისი შეუსრულებლობა არღვევს ეთიკის კოდექსს. ასევე. სპორტსმენმა მსაჯებთან იკამათა.
ტატამიზე პირჯვრის გადაწერისთვის ნემანია მაიდოვს პარიზის ოლიმპიადამდე სიტყვიერი გაფრთხილება ორჯერ ჰქონდა მიღებული - 2018 და 2022 წლებში.
ჯუდოს საერთაშორისო ფედერაციის განცხადებაში აღნიშნულია, რომ IJF-ის ეთიკის კოდექსის მიზანია, დაიცვას ჯუდოკების ეთიკური ღირებულებები და მორალური პრინციპები. IJF პატივისცემას გამოხატავს მისი ყველა წევრის რელიგიისა და კულტურის მიმართ.
საერთაშორისო ფედერაციის წესები ჯუდოს ასპარეზზე ქცევასთან დაკავშირებით, ეფუძნება ექსკლუზიურად ჯუდოსთვის გამოყოფილ სივრცეს, სადაც მხოლოდ ჯუდოს სიმბოლიკაა გამოყენებული და საერთოა ყველასთვის. IJF არ კრძალავს რელიგიის ან რელიგიური ნიშნების გამოყენებას ტატამის გარეთ და პატივს სცემს გამოხატვის თავისუფლებას.
სერბი ჯუდოკას დისკვალიფიკაციისა და IJF-ის გადაწყვეტილების შესახებ, LaGazzetaa.ge-სთან საერთაშორისო კატეგორიის მსაჯმა, ვლადიმერ ნუცუბიძემ ისაუბრა. ქართველი არბიტრი ჯუდოს მაღალი რანგის ტურნირების მსაჯია, მათ შორის მუშაობდა პარიზის ოლიმპიადაზე.
ვლადიმერ ნუცუბიძის განცხადებით, ამ დრომდე მხოლოდ პირჯვრის გადაწერის გამო, არავინ დაუსჯიათ და არც ამ შემთხვევაში ყოფილა დისკვალიფიკაციის ერთადერთი მიზეზი რელიგიური გამოხატულება:
“თავის დროზე, როცა წესების შესახებ მსჯელობდნენ, ერთ-ერთი არგუმენტი იყო სხვადასხვა რელიგიის სპეციფიკურობა. ზოგ რელიგიაში შესაძლოა რიტუალი იყოს საჭირო, ამიტომ ტატამიზე შესვლამდე ყველაფერი დასაშვებია, უშუალოდ ტატამიზე კი რელიგიური ჟესტები იკრძალება. ნემანია მაიდოვმა პირჯვარი ტატამიზე ყოფნის დროს გადაიწერა. მას ორჯერ ჰქონდა მიღებული სიტყვიერი გაფრთხილება, გარდა ამისა, იყო სხვა დისციპლინური სასჯელები. ნემანია ზოგადად ძალიან მორწმუნე პიროვნებაა, რელიგიური ოჯახიდანაა, რაშიც არავინ არ ზღუდავს, უბრალოდ ტატამიზე ასეთი წესია.
თეოდოროსთან შეხვედრის შემდეგ მსაჯებთან აპროტესტებდა მათ გადაწყვეტილებას, შემდეგ ტატამის შემოუარა და IJF-ის წარმოამდგენლებთან სცადა მისვლა.
თუკი ვინმეს გაპროტესტება სურს, ეს უნდა მოხდეს შესაბამის ინსტანციაში და არა მათთან, ვინც ამ კანონებს აღასრულებს.
მხოლოდ პირჯვრის გადაწერის გამო ჯერ არავინ დაუსჯიათ, ტატამიზეც ყოფილა მსგავსი შემთხვევა, მაგრამ სიტყვიერი შეთანხმებით შემოიფარგლებიან.
თუ მათ წესს არ ეთანხმები IJF-ში უნდა შეიტანო საჩივარი, შემდეგ განიხილავენ და დირექტორთა საბჭოზე იქნება შესაბამისი გადაწყვეტილება მიღებული,” - აცხადებს ვლადიმერ ნუცუბიძე La Gazzetta dello Sport Georgia-სთან საუბრისას.
28 წლის სერბ ჯუდოკას მსოფლიოსა და ევროპის ჩემპიონატზე ოქროსა და სხვადასხვა სინჯის მედალი აქვს მოპოვებული. ასევე, სხვადასხვა ტურნირების გამარჯვებული და პრიზიორია.
