საქართველოს ნაკრების ახალმა მთავარმა მწვრთნელმა რამაზ სვანაძემ უკრაინასთან გასამართი მატჩის წინ პრესკონფერენცია გამართა.
ახალ თანამდებობაზე დანიშვნა
"რამაზ სვანაძეს ძალიან დიდი და რთული გზის გავლა დასჭირდა იმისთვის, რომ აქამდე მოსულიყო. ვარ თუ არა მზად ეროვნული ნაკრების მწვრთნელობისთვის, ეს შედეგებით გამოჩნდება. მადლობას ვუხდლი ვილი სანიოლს გაწეული სამსახურისთვის და ასევე მადლობა ფედერაციას ნდობისთვის."
ტაქტიკურ ცვლილებებზე
"ამაზე დღეს ვერ ვილაპარაკებ, თუმცა ხვალინდელ მატჩში ჩემი ფეხბურთელებისგან სწორ რეაქცია და სწორ ემოციას ველოდები. სამწუხაროდ, პირველი თამაში მარცხით დავიწყეთ და ყველაფერი ამის გამოსწორებისკენ იქნება მიმართული. ველოდები ერთიანობას და იმ საერთოს, რასაც გულშემატკივრის და ფეხბურთელების ერთობლიობა ჰქვია. პირველი, რაც მინდა გაკეთდეს, სწორედ ეს არის"
გეგმები ნაკრებში
"ჩვენი მთავარი გეგმა არის სტაბილურობა, რომელიც აისახება შედეგებში. ეს ჩვენი მთავარი საფიქრალია და ამისთვის გზა ნაბიჯ-ნაბიჯ უნდა გავიაროთ, რაც ადვილი არ იქნება"
უკრაინასთან მატჩზე
"ჩვენი მთავარი მისია და მიზანი არის გამარჯვება, საქართველოს ნაკრები ნებისმიერ მატჩში ნებისმიერი ნაკრების წინააღმდეგ მხოლოდ მოგებაზე იქნება ორიენტირებული. ჩვენი ნაკრები მენტალურად ისე უნდა მოეწყოს, რომ ყველა მატჩში მოედანზე გამარჯვებულის მენტალიტეტით გავიდეს"
ოქროს ბურთზე
"ეს ჯილდო ხვიჩა კვარაცხელიამ უნდა მოიგოს, მას ვუსურვებ წარმატებებს როგორც ოქროს ბურთზე, ისე ხვალინდელ მატჩში, მასაც და მთელ ნაკრებს"
მიმართვა გულშემატკივარს
"ვიცი, რა რთულია იყო ქართველი საქართველოს ნაკრების მწვრთნელად, ასევე ვიცი, რა ერთიანია ქართველი გულშემატკივარი. 11 წელია ქართველი მწვრთნელი საქართველოს ნაკრებში არ ყოფილა, ეს ჩემთვის დიდი პასუხისმგებლობაა და მინდა ერთიანობის პირობებში ისევ ერთად გავიხაროთ და ერთად მივაღწიოთ წარმატებებს"
