პარი სენ-ჟერმენი მომდევნო სეზონისთვის მზადებას აგრძელებს. თუ გავლენიან ფრანგულ წყაროებს დავუჯერებთ, პარიზულ კლუბს საკმაოდ დატვირთული აგვისტოს თვე ექნება, რადგან ლუის ენრიკემ არსებული შემადგენლობის გაძლიერება კიდევ ერთხელ მოითხოვა.
პსჟ ერთდროულად სამ ტრანსფერზე მუშაობს. პარიზული კლუბის სამიზნეები არიან ზაიონ სუძუკი (მეკარე, პარმა), მიკა ხოთსი (ვინგერი, აიაქსი) და ფერან ტორესი (ფორვარდი, ბარსელონა). ლუის ენრიკეს სამივე ფეხბურთელის დამატება სურს, ხოლო სპორტული დირექტორი ლუიშ კამპუში მოლაპარაკებებს აქტიურად აგრძელებს.
პარი სენ-ჟერმენმა სუძუკის სანაცვლოდ €33 მილიონიანი შეთავაზება რამდენიმე საათის წინ გააკეთა და როგორც იწერება, საკმაოდ დიდი შანსია პარმა ამ თანხის სანაცვლოდ იაპონელ მეკარეს შეელიოს. ფრანგულ კლუბსა და 23 წლის მეკარეს შორის წინასწარი სიტყვიერი შეთანხმება უკვე არსებობს.
რაც შეეხება ხოთსს, €40/45 მილიონიანი შეთავაზება უკვე გაკეთდა, თუმცა აიაქსი 21 წლის ფეხბურთელს €60 მილიონად აფასებს. ამის მიუხედავად, პარიზში სჯერათ, რომ მხარეები შეთანხმებას უახლოეს დღეებში მიაღწევენ. ხოთსისთვის 5-წლიანი კონტრაქტი გამზადებულია.
და ბოლო, ფერან ტორესი, ესპანელს ბარსელონას დატოვება და კარიერის პარი სენ-ჟერმენში გაგრძელება სურს. როგორც ცნობილი ხდება, ფრანგული კლუბი პირველ ოფიციალურ შეთავაზებას მომდევნო კვირაში გააკეთებს, შესაბამისად, ესპანელი ფორვარდის თაობაზე სიახლეებს უახლოეს დღეებში ველოდებით.
შეგახსენებთ, პარი სენ-ჟერმენმა ალესანდრო ლონგონის, ლუკა დინისა და მაგნეს აკლიუშის ტრანსფერები უკვე დახურა, თუმცა პარიზელები ამაზე გაჩერებას არ აპირებენ.
