მიმდინარე სეზონის ფროზინონეზე როცა ვსაუბრობთ, ყველა, რა თქმა უნდა, გიორგი კვერნაძის პერფორმანსსა და სათამაშო ფორმაზე ამახვილებს ყურადღებას. 23 წლის ქართველი ვინგერი საოცარ ფორმაშია და თამამად შეგვიძლია იმის თქმა, რომ გუნდის ერთ-ერთ ლიდერად იქცა.
კვერნაძის ანგარიშზე 6 ჩატარებული მატჩია, რა დროშიც 5 გოლი გაიტანა და 2 საგოლე გადაცემაც შეასრულა. ამ სტატისტიკამ კი ბევრად დიდი კლუბების ყურადღება უკვე მიიქცია.
რომა, ნაპოლი და ატალანტა — სამივე კლუბის ინტერესი რეალური და დადასტურებულია. მეტიც, მათი წარმომადგენლები ფროზინონეს მატჩებსაც ესწრებიან, რაც იმას ნიშნავს, რომ ქართველის მიმართ ინტერესი საკმაოდ სერიოზულია.
ასევე დაიწერა ჰალ სიტის ინტერესზეც, თუმცა ამ მომენტისთვის კვერნაძის სერია A-დან წასვლის შანსი ძალიან დაბალია.
რაც შეეხება ფროზინონესა და ფეხბურთელის პოზიციას, იტალიურ კლუბს ფეხბურთელის გაყიდვა ზამთრის სატრანსფერო ფანჯრის პერიოდში არ სურს და თავად 23 წლის ვინგერიც კლუბში ყოფნით ბედნიერია, თუმცა ყველაფერი შემოთავაზებებზე იქნება დამოკიდებული. ფროზინონე კვერნაძეს დაახლოებით €15-18 მილიონად აფასებს. შეგახსენებთ, ახალგაზრდა ფეხბურთელს კლუბთან არსებული კონტრაქტი 2028 წლამდე აკავშირებს.
უახლოეს კვირებში მოსალოდნელია, რომ ქართველი ფეხბურთელის მიმართ ინტერესი კიდევ უფრო გაიზრდება, რაც ზრდის იმის შანსს, რომ კვერნაძეს მალე ბევრად დიდ კლუბში ვიხილავთ.
