იუვენტუსი ახალი მეკარის ძიებას აქტიურად აგრძელებს. ტურინული კლუბი ბოლო რამდენიმე კვირის განმავლობაში ალისონ ბეკერის ტრანსფერზე მუშაობდა, თუმცა ლივერპულმა ბრაზილიელი კარის დარაჯის გაშვება არ ისურვა და მოლაპარაკებები ჩაიშალა. ამის შემდეგ "ბიანკონერიმ“ ინფორმაცია გიორგი მამარდაშვილის შესახებაც მოითხოვა, თუმცა ამ მიმართულებითაც მნიშვნელოვანი წინსვლა ამ ეტაპზე არ ფიქსირდება.
იტალიური მედიის ცნობით, იუვენტუსმა უკვე ალტერნატიულ ვარიანტებზე გადაერთო და მთავარი სამიზნე ემილიანო "დიბუ“ მარტინესი გახდა. წყაროების ინფორმაციით, ტურინელებსა და არგენტინელი მეკარის წარმომადგენლებს შორის პირველი კონტაქტი უკვე შედგა, სადაც მხარეებმა პოტენციურ ტრანსფერზე ისაუბრეს. მსოფლიო ჩემპიონი კიპერი იტალიური კლუბის ხელმძღვანელობისთვის ერთ-ერთ ყველაზე საინტერესო კანდიდატად განიხილება, განსაკუთრებით მას შემდეგ, რაც ალისონ ბეკერის ტრანსფერი გამოირიცხა.
იმ შემთხვევაში, თუ დიბუ მარტინესის ტრანსფერი ვერ შედგება, იუვენტუსის გეგმა B გულიელმო ვიკარიოა. ტოტენჰემის მეკარე ტურინელთა სიაში დიდი ხანია ფიგურირებს და კლუბში მიაჩნიათ, რომ ის გუნდის გრძელვადიანი პროექტისთვის შესაფერისი კანდიდატია. უახლოეს დღეებში იუვენტუსი მეკარის პოზიციასთან დაკავშირებით საბოლოო სტრატეგიას ჩამოაყალიბებს და ერთ-ერთი მთავარი სამიზნის დამატებას შეეცდება. ინფორმაციისთვის იმასაც გეტყვით, რომ მიკელე დი გრეგორიო ზაფხულის სატრანსფერო ფანჯრის დროს ტურინულ კლუბს დატოვებს, მატია პერინი კი გუნდში დარჩება.
