დღეს, 23:00 საათზე, 2026 წლის მსოფლიო ჩემპიონატი არგენტინისა და ესპანეთის ფინალური მატჩით დაგვირგვინდება. განვიხილოთ, თუ რას უნდა ველოდოთ მთავარი დუელისგან.
განვლილი გზა
ორივე ნაკრებმა ფინალისკენ მიმავალ გზაზე არაერთი დასამახსოვრებელი მომენტი გვაჩუქა. არგენტინა მთელი ტურნირის განმავლობაში ანერვიულებდა თავის ქომაგებს, როცა ძირითად დროში ვერ ახერხებდა შვეიცარიასა და კაბო ვერდესთან მოგებას. ინგლისსა და ეგვიპტესთან "ალბისელესტე" აგებდა კიდეც, მაგრამ 2-ვე შეხვედრის მიწურულს მოქმედმა ჩემპიონმა დაუვიწყარი რემონტადა შემოგვთავაზა.
ერთი სიტყვით, ნერვიულობად ნამდვილად ღირდა ის ყველაფერი, რაც "სელესიონმა" გააკეთა. ესპანეთი ფინალამდე მივიდა უფრო მშვიდად, გზად კი აღმოჩნდა კრიშტიანუ რონალდუს პორტუგალიასა და მუნდიალის მთავარ ფავორიტად შერაცხულ საფრანგეთზე უკეთესი. არ უნდა დაგვავიწყდეს ისიც, რომ "ლა როხამ" ტურნირზე გაუშვა მხოლოდ 1 ბურთი, ბელგიასთან, 1/4 ფინალში.
"წითლებამდე", ბოლო ნაკრები, რომელიც მსოფლიო ჩემპიონატის ფინალში გავიდა ერთი გაშვებული გოლით, 2006 წლის იტალია იყო. როგორც ვხედავთ, "აძურის" მიღწევა 20 წლის მანძილზე რჩებოდა ხელშეუხებელი, მაგრამ ლუის დე ლა ფუენტეს შეგირდებმა მუნდიალის ახალი ისტორია დაწერეს.
თაობათა ბრძოლა
2026 წლის მსოფლიო ჩემპიონატის ფინალი არაოფიციალურად ლიონელ მესისა და ლამინ იამალის პირად დაპირისპირებად არის მონათლული. შეხვედრა, სადაც მეფეს ელის დუელი უფლისწულთან, მაგრამ არ უნდა დაგვავიწყდეს ისიც, რომ არგენტინელი ლეგენდა სამეფო ტახტის გათავისუფლებას სულაც არ ჩქარობს.
ამ ყველაფერზე მეტყველებს ინტერ მაიამის კაპიტნის უბრალოდ საოცარი ფორმა 39 წლის ასაკში - 8 გოლი, 4 საგოლე გადაცემა. წლევანდელ მსოფლიო ჩემპიონატზე არგენტინელთა მე-10 ნომერზე შედეგიანი მხოლოდ კილიან მბაპეა (10 ბურთი, 4 ასისტი). 2-ვე მათგანმა გადაასწრო მიროსლავ კლოზეს, რომელიც აშშ-ს მუნდიალამდე ტურნირის ყველა დროის საუკეთესო გოლეადორად რჩებოდა.
თაობათა ბრძოლა გაიმართება არა მხოლოდ "ლა პულგასა" და ესპანელ მოზარდს შორის, არამედ ნაკრებების მწვრთნელებს შორისაც. გამოსარჩევია ისიც, რომ სწორედ დე ლა ფუენტე აღმოჩნდა ლიონელ სკალონის მასწავლებელი, მაშინ, როცა ამ უკანასკნელმა საფეხბურთო კარიერის დასრულების შემდეგ, დამრიგებლობა გადაწყვიტა.
ესპანელი მწვრთნელის ხელში არაერთმა ცნობილმა სპეციალისტმა გაიარა. საქმე ისაა, რომ ევროპის ჩემპიონი დამრიგებელი სხვადასხვა დროს მუშაობდა უეფას სისტემასა და თავისი ქვეყნის ფეხბურთის ფედერაციაში, ლუისის მოვალეობა კი სწორედ ახალგაზრდა, დამწყებ თავკაცთა მომზადება იყო.
"ფურია როხას" ამჟამინდელი მწვრთნელის მოსწავლეები იყვნენ ჩაბი ალონსო, ანდონი ირაოლა, რაულ გონსალესი, ჩავი ერნანდესი და სხვები. განსაკუთრებული მოგონება 65 წლის დამრიგებელს აკავშირებს თითოეულ მათგანთან, ყველაზე მეტად კი ის მაინც არგენტინელ სპეციალისტს გამოარჩევს.
როგორ მოხდა მათი გაცნობა? 2015 წელს, საფეხბურთო კარიერის დასრულების შემდეგ, "ალბისელესტეს" ამჟამინდელი მწვრთნელი დაბინავდა მალიორკაზე, სადაც ახალი კარიერა მან ბავშვთა ფეხბურთში მუშაობით დაიწყო. 48 წლის სპეციალისტი მუშაობდა სან-კალიუში, პარალელურად კი ლიცენზიის მისაღებად ის გადიოდა კურსებს და მისი დამრიგებელი სწორედ დე ლა ფუენტე იყო.
ისტორიული მნიშვნელობის მატჩი
ორივე ნაკრებს შეუძლია რამდენიმე ისტორიული რეკორდის გამეორება ან დამყარება. არგენტინის გამარჯვების შემთხვევაში, ამ ქვეყნის ეროვნული გუნდი გახდება 1958-1962 წლების ბრაზილიის შემდეგ 1-ელი ნაკრები, რომელიც მუნდიალს ზედიზედ 2-ჯერ მოიგებს. "ალბისელესტეს" ამის გაკეთება შეეძლო 1986-1990 წლებშიც, მაგრამ იტალიის მუნდიალის გადამწყვეტ შეხვედრაში გერმანიამ აიღო რევანში, 4 წლით ადრე წაგების გამო.
"სელესიონს" დაუგროვდება ოთხი მსოფლიო ჩემპიონობა, რითაც ის ხსენებულ "ბუნდესნაკრებსა" და "სკუადრა აძურას" გაუთანაბრდება. არგენტინაზე ტიტულოვანი მუნდიალებზე მხოლოდ "პენტაკამპეონე" (5) დარჩება. ესპანეთი ჯერ შორსაა 4-ჯერ ჩემპიონობისგან, მაგრამ აღნიშნული ქვეყნის ეროვნული გუნდი ერთ საინტერესო ტენდენციას მიჰყვება.
"ფურია როხამ" 2008 - 2012 წლებში მოახდინა ფურორი, როდესაც ზედიზედ მოიგო მსოფლიო ჩემპიონატი და ორჯერ ევროპის ჩემპიონატი. 2024 წელს "წითლებმა" კვლავ მოიგეს ევრო, ახლა კი ისინი მუნდიალის მთავარი შეხვედრისთვის ემზადებიან. განმეორდება თუ არა ისტორია კიდევ ერთხელ? ყველაფერს დღეს გავიგებთ.
ბოლოს კი კიდევ ერთი საინტერესო ფაქტიც - მილანის ინტერი არის ერთადერთი გუნდი, რომელსაც 1982 წლის მსოფლიო ჩემპიონატიდან - 2026 წლამდე, ფინალში მინიმუმ 1 მოთამაშე ყოველთვის ჰყავს. "ნერაძურის" გარდა, აქამდე მსგავსი მიღწევა ჰქონდა მიუნხენის ბაიერნსაც, მაგრამ აშშ-ს მუნდიალის მთავარ შეხვედრაში აღნიშნული კლუბის მოთამაშეები მოედანზე არ იქნებიან.
"რეკორდმაისტერის" სერია გაგრძელდებოდა იმ შემთხვევაში, თუ ფინალში გავიდოდა ინგლისი, რომლის შემადგენლობაში თამაშობს ჰარი კეინი, მაგრამ წინ გავიდნენ სკალონის შეგირდები, ლაუტარო მარტინესთან ერთად. სწორედ ის იქნება ჯუზეპე მეაცას მკვიდრთა წარმომადგენელი აშშ-ს მუნდიალის მთავარ შეხვედრაში.
ცხადია, ჯერჯერობით ოფიციალურად არც ინტერის რეკორდი რჩება აქტიურად, რადგან საამისოდ არგენტინელმა თავდამსხმელმა ფინალში უნდა ითამაშოს. ალბათ ეჭვი არავის ეპარება იმაში, რომ მილანელთა კაპიტანი დე ლა ფუენტეს შეგირდების წინააღმდეგ შეხვედრაში მოედანზე აუცილებლად იქნება, თუნდაც სათადარიგოთა სკამიდან შემოსვლით.
ურთიერთმატჩები
ეს იქნება ამ ნაკრებების რიგით მე-15 მატჩი და რაც შეეხება განვლილ თამაშებს - 6-ჯერ იმარჯვა როგორც არგენტინამ, ისე ესპანეთმაც, 2 დაპირისპირებაც ფრედ დასრულდა. აღნიშნული ეროვნული გუნდების უკანასკნელ შეხვედრაში "ალბისელესტე" "ლა როხასთან" თავის ისტორიაში რეკორდული 1:6-ით განადგურდა.
ეს მოხდა 2018 წლის 27 მარტს, ამხანაგურ მატჩში და "სელესიონი" ამაზე დიდი ანგარიშით არასდროს დამარცხებულა. "წითლების" მხრიდან სამი ბურთი შეაგდო ისკო ალარკონმა და ის ერთადერთია, რომელმაც აღნიშნული ქვეყნის ეროვნული გუნდების შეხვედრებში ჰეთ-თრიქის გაფორმება შეძლო.
დე ლა ფუენტესა და სკალონის გუნდებს ერთმანეთის წინააღმდეგ უნდა ეთამაშათ 2026 წლის გაზაფხულზე, ფინალისიმაში, თუმცა ეს დაპირისპირება არ შედგა. შეხვედრა უნდა ჩატარებულიყო 27 მარტს, კატარის ლუსაილის სტადიონზე, მაგრამ ეს შეუძლებელი გახდა ახლო აღმოსავლეთში კონფლიქტის გამო.
განიხილებოდა მატჩის, მადრიდში, სანტიაგო ბერნაბეუზე გამართვაც, თუმცა ამაზე უარი განაცხადა არგენტინულმა მხარემ, რადგან არ სურდა მოწინააღმდეგის მოედანზე თამაში. სწორედ ამიტომ, მხარეებმა ახალი ლოკაცია და თარიღი დროულად ვეღარ შეარჩიეს და ფინალისიმა 2026-იც გაუქმდა.
როგორც ვხედავთ, ფინალისიმა მაინც შედგება, თანაც უფრო გრანდიოზულ ვითარებაში, ვიდრე უბრალოდ ევროპის ჩემპიონისა და კოპა ამერიკას ტრიუმფატორის შეხვედრა. "ალბისელესტესა" და ესპანეთის შეხვედრაში სასწორზე მსოფლიოს საუკეთესო ეროვნული გუნდის წოდება იდება.
