მსოფლიო ჩემპიონატის დასრულების შემდეგ, მოსალოდნელია, რომ ევროპულ ფეხბურთში არაერთი ხმაურიანი ტრანსფერი განხორციელდება. რამდენიმე კლუბმა შემადგენლობის გაძლიერება უკვე დაიწყო, ბევრი კი მუნდიალის დასრულებას ელოდება, რადგან, როგორც წესი, ყველაზე მასშტაბური ტრანსფერები სწორედ ამის შემდეგ ხორციელდება.
თუ ბოლო მომენტში რაიმე გაუთვალისწინებელი არ მოხდა, მორგან როჯერსი უახლოეს პერიოდში ასტონ ვილას დატოვებს და ახალ სეზონს ახალი გუნდის შემადგენლობაში დაიწყებს. 23 წლის შემტევი ნახევარმცველის მიმართ ინტერესს არაერთი ტოპ კლუბი იჩენს და, როგორც ჩანს, მხოლოდ დროის საკითხია, თუ როდის დაემშვიდობება პრემიერ ლიგის ერთ-ერთი გამორჩეული ფეხბურთელი ასტონ ვილას.
არსენალი, ჩელსი, მანჩესტერ იუნაიტედი, ბაიერნი და პარი სენ-ჟერმენი — ამ კლუბების ინტერესი რეალურია და უკვე დადასტურებული. მეტიც, როჯერსის აგენტთან პირველი კონტაქტიც შედგა, რომლის დროსაც მხარეებმა პოტენციური ტრანსფერის დეტალები განიხილეს.
ასტონ ვილას როჯერსის შენარჩუნება სურს, თუმცა თუ რომელიმე კლუბი მის სანაცვლოდ დაახლოებით €100 მილიონს გადაიხდის, ბირმინგემელები ინგლისელი ფეხბურთელის ტრანსფერს მწვანე შუქს აუნთებენ.
