ჩვენმა ნაკრებმა სადებიუტო ევროპის ჩემპიონატზე 1/8 ფინალამდე მიაღწია. როცა ვიწყებთ იმ გამორჩეული ფეხბურთელების ჩამოთვლას, რომლებმაც საქართველოს ნაკრებში ამ ევროპაზე ითამაშეს, უნდა გაგვახსენდეს ლაშა დვალი, რომელიც დაცვაში საუკეთესო იყო.
დვალმა 4-ვე თამაში მაღალ დონეზე ჩაატარა, აზღვევდა როგორც სხვა ცენტრალურ მცველებს, ისე მარცხენა მცველს და ბევრ ასპექტში იყო გამორჩეული. ამას გარდა, დვალმა საბერძნეთთან პენალტების სერიაში თერთმეტმეტრიანი ბრწყინვალედ შეასრულა და გამარჯვებაში თავისი წვლილი შეიტანა.
LaGazzetta.ge დვალს დაუკავშირდა და ბევრ საინტერესო საკითხზე ესაუბრა.
"პირველ რიგში, ვიტყვი იმას, რომ ბოლო წლებში საქართველოს ნაკრებმა ბევრი განსაცდელი და გულისტკივილი გამოიარა. ფეხბურთი ყოველთვის სამართლიანი არ არის, მაგრამ რაიმე სამართლიანობა თუ არსებობდა, ის საოცარი თვეები, რაც საქართველოს ნაკრებმა ახლა გაიარა, ნამდვილად დამსახურებული იყო. თავი ღირსეულად წარმოვაჩინეთ. ჩემპიონთა ლიგაზე და ევროპა ლიგაზე მითამაშია, მაგრამ ამჟამინდელი პერიოდი ჩემს კარიერაში მაინც საუკეთესოა."
- რა გრძნობა იყო, როცა ევრო 2024-ის მატჩში სტადიონზე პირველად შედგი ფეხი?
- ევროპის ჩემპიონატი უმაღლეს დონეზე იყო ორგანიზებული. თავიდან ცოტა შოკის ეფექტი მქონდა, რადგან ამ დონის ტურნირზე პირველად ვიყავით, თუმცა ყველაფერს მალევე შევეჩვიეთ და ეს ჩვენს თამაშზეც აისახა. უნდა აღვნიშნო გულშემატკივრობა. რომ არა ქართველი ხალხი, ამას ვერ გავაკეთებდით. საქმის ნახევარი სწორედ მათი დამსახურებაა.
- მთელი ევროპა ჩვენზე ლაპარაკობს, ადევნებ თვალს ამ ყველაფერს?
- დიახ, ამ ყველაფერს თვალს დიდი სიამაყით ვადევნებ. ეს საქართველოს კიდევ ერთი დიდი წარმატებაა. როცა ამდენი გავლენიანი გამოცემა და ჟურნალისტი გაღიარებს, პატარა საქმე არ არის. როცა თბილისში შეკრებილი ხალხი ჩემს სახელს სკანდირებდა, საოცრება იყო, თავი ასე კარგად ჯერ არ მიგრძვნია.
როგორც ზემოთ მოგახსენეთ, დვალი დაცვაში საკმაოდ დიდ სამუშაოს ასრულებდა, პასების სიზუსტითაც გამოირჩა და თითქმის ყველა არეალში იყო, რაზეც ქვემოთ მოცემული სტატისტიკაც მეტყველებს.
- რა ხდებოდა საქართველოს ნაკრების შეკრებაზე, თავისუფალ დროს?
- ნაკრებში ძალიან კარგი ურთიერთობაა ჩამოყალიბებული, ნაკლები დაძაბულობაა და ერთი ოჯახივით ვართ, რაც წარმატების ერთ-ერთი მთავარი მიზეზია. ვარჯიშების შემდეგ სასტუმროში სხვადასხვა თამაშით ვერთობოდით - იყო დომინო, ნარდი, კარტი, ფლეისთეიშენი. რომ შემოგეხედათ, პატარა კაზინო გეგონებოდათ. ეს ხუმრობით, ისე კი, ამ ერთად ყოფნამ მოიტანა ის შედეგი, რაც დავაფიქსირეთ. ამაში დიდი წვლილი ვილი სანიოლს მიუძღვის, რომელმაც კარგად დაალაგა სიტუაცია მოედანზეც და მოედნის გარეთაც.
ცნობისთვის, პორტუგალიასთან და ესპანეთთან მატჩებში ლაშა დვალი იმ ტოპ 5 ფეხბურთელს შორის იყო, რომელმაც მოედანზე ყველაზე მეტი დისტანცია დაფარა.
- პირველ მატჩებში ფიზიკურად ცოტა გამიჭირდა, ბოლო შეხვედრებში კი ორგანიზმი ამ ყველაფერს შეეჩვია და ფიზიკურად იდეალურად ვიყავი, ამიტომ ვირბინე ბევრი. იყო თამაშები, სადაც ცენტრალური მცველის დაზღვევა უფრო მიწევდა, თუმცა პორტუგალიასთან მარცხენა მცველსაც ვაზღვევდი, რადგან პორტუგალიელები სულ სხვა სტილის ფეხბურთს თამაშობდნენ. ფიზიკურად და ფსიქოლოგიურად ძალიან ბევრს ვმუშაობდი, რადგან ვიცოდი, რა გამოცდა მელოდა წინ.
- როგორც უკვე თქვი, ნაკრების წარმატება ერთმუშტად შეკვრამ გამოიწვია. 10 წელია უკვე ნაკრებში ხარ. შენი გადმოსახედიდან, რამ გამოიწვია ის, რომ დღეს საქართველოს ნაკრებში ყველა ფეხბურთელი პროფესიონალია, ყველამ იცის თავისი კვებისა და ვარჯიშის რეჟიმი?
- ეს ადრეც იყო, უბრალოდ ასე მასიურად არა. თუ ადრე სავარჯიშო დარბაზში ფეხბურთელების ნახევარი ჩადიოდა და შედარებით ზერელე დამოკიდებულება იყო, ახლა ყველა ვარჯიშობს და სიტუაცია შეცვლილია. ამ თაობამ ნახა, რომ თუ კარგად ითამაშებ და კარგად მოემზადები, ტოპ გუნდებში წასვლა შეგიძლია და ეს მათთვის ორმაგი მოტივაცია გახდა. ჩემი აზრით, დღესდღეობით, ტოპ ჩემპიონატებში თამაშს საქართველოს ნაკრების ყველა ფეხბურთელი იმსახურებს.
- როგორც ცენტრალურ მცველს, ბურთის ამოტანა ხშირად გევალებოდა, ვინ იყო ყველაზე კომფორტული თანაგუნდელი, რომელმაც ყველაზე მეტად შეგეწყო მოედანზე?
- ამის თქმა და აღნიშვნა ძალიან მინდოდა. როგორც ცენტრალური მცველისთვის, კიტეიშვილთან და ქოჩორაშვილთან ერთად თამაში უდიდესი კომფორტია. როცა მეტოქე გვაპრესინგებს, ბურთს მთხოვენ, ამ მოკლე მანძილზე კაცს მაინც ატყუებენ და ბურთს ინარჩუნებენ. თუ რთულ სიტუაციაში ჩავარდებიან, გამოსავალს მაინც პოულობენ და სივრცეებს ხსნიან. ჩემთვის ასეთ ფეხბურთელებთან თამაში დიდი ფუფუნებაა. ბევრი თანაგუნდელი მყოლია, რომლებიც ასეთ დროს იმალებიან და პასი არ უნდათ, ამათ კი პირიქით, რა სიტუაციაც არ უნდა იყოს, მაინც ბურთი უნდათ.
და ბოლოს... "საქართველოს ნაკრები საკმაოდ ძლიერ და ყველა მეტოქისთვის პატივსაცემ გუნდად ჩამოყალიბდა. პასუხისმგებლობა იზრდება და ამ ტემპის გაუმჯობესება გვინდა, რაც ადვილი არ იქნება. ყველა ფეხბურთელმა თავის თავზე უნდა იმუშაოს და დარწმუნებული ვარ, ასეც იქნება. გულშემატკივრებს ვპირდები, რომ არასდროს არაფერს დავაკლებთ და ვეცდებით, სიურპრიზებით კიდევ ბევრჯერ გაგახაროთ."
