32 წლის შემტევისთვის ვაკო ყაზაიშვილისთვის 2025 წელი განსაკუთრებული გამოდგა. შანდონგ ტაიშანის მაისურით ყაზაიშვილმა 27 გოლი გაიტანა და ჩინეთის ჩემპიონატის წლის საუკეთესო ფეხბურთელი გახდა.
ყაზაიშვილი ყველას ეროვნულ ნაკრებში ჩატარებული კარგი მატჩებიდან გვახსოვს. გადამწყვეტი გოლი, შოტლანდიასთან, ულამაზესი გოლი ესტონეთთან, ტოპ მატჩი უელსთან და 13 გატანილი ბურთი ეროვნულ გუნდში.
LaGazzetta.ge-სთან ინტერვიუში ყაზაიშვილმა მის ამჟამინდელ მდგომარეობაზე, საქართველოს ნაკრებსა და სამომავლო მიზნებზე ისაუბრა.
პირველ რიგში, მთავარი ამბით დავიწყოთ - ჩინეთის ჩემპიონატის საუკეთესო ფეხბურთელი გახდი და სეზონში 27 გოლი გაიტანე...
"ძალიან სასიხარულოა და ვამაყობ ამით, 30 თამაშში 27 გოლი გავიტანე, მადლობას ვუხდი ჩემს გუნდს ამისთვის და ვეცდები, რომ შემდეგი სეზონიც ასეთი წარმატებული მქონდეს, თავიდან ცოტა ცუდად დავიწყეთ, ახალი მწვრთნელი მოვიდა, ბევრი გადაწყობა იყო, ნდობის ფაქტორიც და სიტუაცია არეული იყო, თუმცა სეზონის მეორე ნახევარში მნიშვნელოვანი მატჩები მოვიგეთ. ვფიქრობ, ჩინეთის ლიგა ევროპის ბევრ ჩემპიონატს ჯობია."
თვლი თუ არა, რომ ეს სეზონი შენს კარიერაში საუკეთესო იყო?
"განსაკუთრებული გრძნობაა, როცა ფეხბურთელი 20 გოლზე მეტს იტანს. ვთვლი, რომ ეს ჩემს კარიერაში საუკეთესო სეზონი იყო. თან უნდა აღვნიშნო, რომ ბოლო ტურებში მთელი გუნდი ცდილობდა, გოლები გამეტანა და ჩემზე თამაშობდნენ, რაც დასაფასებელია და მადლობას ვუხდი მათ ამისთვის. ბომბარდირი მაინც ებრიუ გახდა. როცა წლის საუკეთესოდ დამასახელეს, დამირეკა და მომილოცა, ბომბარდრობა მეც ანალოგიურად მივულოცე."
როგორც ვიცით, შენი ჩინური კარიერის პირველი მატჩი შანხაის წინააღმდეგ იყო, სადაც ბრაზილიელი ოსკარი თამაშობდა...
"აქაურ ჩემპიოანტში საკმაოდ უხეში თამაში მიდის. შანხაისთან დებიუტი მქონდა, მატჩის დროს, ისე დაემთხვა, რომ ბურთი სულ ჰაერში იყო და გადაგდებები მიდიოდა, ამაზე გავბრაზდი და ჩემს თანაგუნდელებს ვუთხარი, ცოტა ბურთი გავაგოროთთქო, ამ დროს ოსკარი წინ მედგა, ჩემი ნათქვამი გაიგო და მითხრა - "Welcome to China", მაშინ მივხვდი, რომ აქ სულ ასეთი თამაშები იქნებოდა."
ვიტესში ჩატარებული კარგი სეზონების შემდეგ, ყველა ელოდა, რომ კარიერას ძლიერ ევროპულ გუნდებში გააგრძელებდი, თუმცა ჯერ იყო MLS, შემდეგ სამხრეთ კორეა, ახლა კი ჩინეთი...
"ჩემთვის ასეთ ჩემპიონატებში თამაში გამოწვევა იყო. 24 წლის ვიყავი, როცა MLS-დან, სან ხოსედან დამირეკეს და მითხრეს, რომ ჩემი ეიმედებოდათ და კარგი პირობები შემომთავაზეს. ეს ფაქტორები ჩემთვის ძალიან მნიშვნელოვანი იყო. ბევრს ჰგონია, რომ ვიტესში წარმატებული თამაშების შემდეგ, კარგი შემოთავაზებები მქონდა, მაგრამ ასე არ ყოფილა. როცა MLS-ში წასვლა გადავწყვიტე, მაშინ ევროპული კლუბებიდან შემოთავაზება საერთოდ არ მქონდა."
მოედნის და ფეხბურთს მიღმა, როგორია ჩინეთში ცხოვრება?
"ძირითადად ორჯერადი ვარჯიშები მაქვს. თავისუფალ დროს ფლეისთეიშენს ვთამაშობ, ბავშვები გასართობ ცენტრში დამყავს ხოლმე, მეუღლეც ჩემთან ერათადაა და ეს დიდი კომფორტია. ფეხბურთსაც ხშირად ვუყურებ. ბარსელონას და მესის გულშემატკივარი ვარ. გასულ სეზონში პსჟ-მ ჩემპიონთა ლიგა მოიგო და მგონია, რომ წელსაც ან პსჟ მოიგებს, ან ბარსელონა."
გადავიდეთ საქართველოს ნაკრებზე. წელს, ჩვენს ნაკრებს წარუმატებელი მატჩები ჰქონდა, თუმცა გასულ წელს ნაკრებმა ისტორია დაწერა, ადევნებდი თვალს ამ წარმატებებს?
"საქართველოს ნაკრებს თავიდან ბოლომდე ვგულშემატკივრობდი და საოცარი სანახავი იყო იმ ვიდეოების და მომენტების ნახვა, რაც ამ ბიჭებმა შემოგვთავაზეს. ნაკრების მატჩები ჩემი დროით 4-5 საათზე იყო და ღამე არ ვიძინებდი, რომ მათთვის მეყურებინა, ნაკრებში 9 წელი გავატარე, სამწუხარო იყო, რომ იმ დროს მათთან ერთად არ ვიყავი, თუმცა მომავალში მზად ვარ, რომ ნაკრებს ნებისმიერ მომენტში დავეხმარო. 3 წელი გავიდა, რაც საქართველოს ნაკრებში არ ვარ და ვფიქრობ, ისეთ ფორმაში ვარ, რომ ნაკრების დახმარება შემიძლია."
საქართველოს ნაკრებისთვის ეს წელი წარუმატებელი იყო, რის გამოც დიდი კრიტიკა წამოვიდა, შეუძლია ჩვენს ნაკრებს მომავალში იგივე რელსებზე დაბრუნება?
"რა თქმა უნდა, ეს ფეხბურთია და ყველაფერი ხდება. მთავარია, ჩვენი ბიჭები არ დანებდნენ და დარწმუნებული ვარ, ქართველ გულშემატკივარს ისევ გაახსენებენ იმ დროს, როცა ყველაზე ბედნიერები იყვნენ."
რამდენიმე თვის წინ, ინტერვიუ თორნიკე ოქრიაშვილთან გვქონდა, რომელმაც გვითხრა, რომ თქვენი თაობის ნაკრებს ამ წარმატების მისაღწევად ცოტა პროფესიონალიზმი დააკლდა, შენ როგორ ფიქრობ?
"ალბათ, პატარ-პატარა ყველაფერი დაგვაკლდა. შეიძლება პროფესიონალიზმის ფაქტორიც ყოფილიყო, მწვრთნელის ფაქტორიც, ბოლომდე არამზადყოფნა, მაგრამ ისიც უნდა ვთქვა, რომ ჩვენ დროს ერთა ლიგა არ იყო და საკვალიფიკაციო ეტაპზე რთულ ჯგუფში თამაში გვიწევდა. ის ფორმატი რომ ყოფილიყო, რაც დღესაა, მსგავსი წარმატების მიღწევა წინა ნაკრებებსაც შეეძლო. ჯერ გავიხსენოთ ის საოცარი თაობა, რომელიც არველაძეების და ქინქლაძის დროს იყო."
ისიც უნდა აღინიშნოს, რომ დღეს, ქართველი ფეხბურთელის ტოპ კლუბში მოხვედრა უკვე მარტივი გახდა, რაც თქვენი თაობის და იმის წინა თაობის დროს არ იყო...
"ამაში დიდი წვლილი ხვიჩა კვარაცხელიას მიუძღვის. მისი დამსახურებაა, რომ დღეს ამდენი ქართველი ფეხბურთელი კარგ ევროპულ გუნდში თამაშობს. თავად გაიბრწყინა და ამასთანავე, ყველა ქართველ მოთამაშეს გაუხსნა გზა, რომ თავი გამოიჩინოს. კვარას დამსახურებით, ქართველ ფეხბურთელებს ევროპაში უკვე ყველა დადებითად უყურებს."
კარიერის განმავლობაში ბევრი მაღალი დონის ფეხბურთელის წინააღმდეგ მოგიწია თამაში, ვინ არის ყველაზე უხერხული მეტოქე?
"გეთანხმებით, ბევრი მსოფლიო დონის მოთამაშების წინააღმდეგ მითამაშია, თუმცა ესპანეთის ნაკრები და მათი ფეხბურთელები მაინც სხვაგან იყვნენ, მათი "დაჭერა" ძალიან რთული იყო, თითქოს 4-5 წამით წინ იყვნენ."
ესპანეთი ვახსენეთ და შენ იმ ისტორიული მატჩის მონაწილე ხარ, როცა 2016 წელს, ესპანეთს 1:0 მოვუგეთ....
"ამის არავის არ ეჯერა, წინა მატჩები წაგებული გვქონდა, ცუდი განწყობა იყო, მაგრამ ბურთი მრგვალია და მოვიგეთ. კარგად მახსოვს, ხორდი ალბამ არასწორი გადაცემა გააკეთა, ჩავჭერი, წავიღე რამოსი და პიკე მედგნენ, ჯიღაურს მივეცი, ჯიღამ ოქრის და გოლი გავიდა, საოცარი ემოციები იყო."
ვინ არის ყველაზე კომფორტული თანაგუნდელი მოედანზე?
"საქართველოს ნაკრენიდან ოქრიაშვილს გამოვარჩევდი. მე და ოქრი ერთმანეთს თვალდახუჭული ვუგებდით და მასთან თამაში ძალიან კომფორტულ იყო. ვარჯიშებზეც და თამაშებზეც ერთმანეთს კარგად ვეწყობოდით. ზეპირად ვიცოდით ერთმანეთის მოძრაობები."
როგორია იქნება შენი მომავალი, აპირებ ჩინეთში დარჩენას თუ ახალ გამოწვევებს მიიღებ?
"99%-ით ისევ აქ დავრჩები. მწვრთნელებს და მთლიან გუნდს ძალიან ვუყვარვარ, მეც ანალოგიურად - თავს ისე ვგრძნობ, როგორც საკუთარ სახლში. მოლაპარაკებები მიმდინარეობს და დიდი ალბათობით, კვლავ ჩინეთში ვითამაშებ."
