აქამდე, საქართველოს 21-წლამდე ნაკრებს მსგავსი მიღწევა არ ჰქონია, რადგან 2023 წელს, 21-წლამდე ნაკრებების ევროპის ჩემპიონატზე ჩვენი ნაკრები მასპინძლის სტატუსით მოხვდა.
- ალბათ, საჭირო დროს, საჭირო ადგილას ვიყავი და დავალება სწორად შევასრულე. თითოეული გოლი მართლაც გამორჩეული და მნიშვნელოვანი გამოვიდა. ამ სეზონში, გოლებით ვერ გამოვირჩეოდი, მაგრამ თუ გავიტანე, შემდეგ გოლს გოლი მოსდევს ხოლმე.
LaGazzetta.ge 21-წლამდე ნაკრების ერთ-ერთ ლიდერს, ნოდარ ლომინაძეს დაუკავშირდა, რომელმაც უმნიშვნელოვანესი გოლების გატანა ზედიზედ სამ მატჩში მოახერხა.
- სატელევიზიო კადრებში არ ჩანს და არც ისმის, რომ როდესაც პენალტების სერია დაიწყო და მეტოქეს თერთმეტმეტრიანი გაუტანე, მაშინვე ნაკრების მეკარესთან, ლუკა ხარატიშვილთან მიირბინე და შეუძახე: ,,შენს იმედზეა მთელი საქართველო". თქვენი ფსიქოლოგიური მდგომარეობა როგორი იყო?
- კი, ამ დროს დასარტყმელი ბოლო 2 პენალტი იყო. ხარატიშვილის ნამდვილად მეიმედებოდა. ფსიქოლოგიური მომენტი იყო. ვიფიქრე, გავამხნევებდი. მივაძახე, რომ მისი იმედი მთელს საქართველოს ჰქონდა.
ლუკასთან მისვლამდეც, როდესაც პენალტების სერია დაინიშნა, მჯეროდა, რომ ეს აუცილებლად გამოგვივიდოდა, რადგან ხორვატებზე მეტად გამარჯვებას ჩვენ ვიმსახურებდით.
- მატჩისწინა დღეს პენალტებზე ივარჯიშეთ. ,,პანენკის" დარტყმა გადაწყვეტილი გქონდა?
- არა, ეს პენალტების სერიის წინ მიღებული გადაწყვეტილება უფრო იყო. როდესაც 120 წუთი ამოიწურა და მატჩი პენალტებისკენ წავიდა, სწორედ იმ წამებში, საკუთარ თავში ფიქრი დავიჭირე, რომ თუ პენალტს დავარტყამდი, ეს აუცილებლად ,,პანენკა" იქნებოდა.
- როცა გასახდელში შეხვედით, სადაც კამერები აღარ იყო, რა იყო პირველი სიტყვები, რომელიც თანაგუნდელებმა გაცვალეთ და მთავარმა მწვრთნელმა რა გითხრათ?
- გასახდელებში რომ შევედით, მოზღვავებული ემოციები იყო. ერთმანეთს ვეხუტებოდით: ზოგი ჩვენგანი ტიროდა, ზოგი ცეკვავდა, ზოგიც მღეროდა... როგორც ამას ყოველთვის ვაკეთებდით - ვილოცეთ, უფალს მადლობა ვუთხარით, რომ ყველაფერი ისე, სასიკეთოდ დასრულდა, როგორც უნდა დასრულებულიყო.
მახსოვს, რამაზმა გვითხრა: ,,თქვენ ეს დაიმსახურეთ, ჩვენ ეს დავიმსახურეთ... რადგან აქამდე, რთული და დიდი გზა გავიარეთ"-ო.
- ბოლო 3 მატჩში 3 გოლი გაიტანე, თანაც ყველა ერთმანეთზე მნიშვნელოვანი...
- ალბათ, საჭირო დროს, საჭირო ადგილას ვიყავი და დავალება სწორად შევასრულე. თითოეული გოლი მართლაც გამორჩეული და მნიშვნელოვანი გამოვიდა. ამ სეზონში, გოლებით ვერ გამოვირჩეოდი, მაგრამ თუ გავიტანე, შემდეგ გოლს გოლი მოსდევს ხოლმე.
- ხორვატიის ქალაქ რიეკაში სულ რამდენიმე ჟურნალისტი ვიყავით. მატჩისწინა დღეებში, თითოელმა ჩვენგანმა მეტოქისგან არასასიამოვნო დამოკიდებულება ვიგრძენით. მაგალითად, მატჩისწინა პრესკონფერენციაზე ხორვატებმა კითხვა ინგლისურად არ დაგვასმევინეს. თქვენს შემთხვევაში როგორ იყო?
- მატჩისწინა დღეებში ნეგატიური დამოკიდებულება არ გვიგვრძვნია. მე რაც შემიძლია გითხრათ არის ის, რომ მატჩამდე, ჩვენს ჰიმნზე გამაყრუებელი სტვენა იყო. ასევე, გვისტვენდნენ მაშინაც, როდესაც ბურთს ვიღებდით, მაგრამ ეს ყველაფერი ჩვენთვის, რა თქმა უნდა, დამატებითი მოტივაცია იყო.
- სლოვაკეთში, 2025 წლის ევროპის ჩემპიონატზე, ჩვენი ნაკრებისგან რას უნდა ველოდოთ?
- ყველა მიზეზ გარეშე, ევროპის ჩემპიონატზე მთავარი მიზანი ჯგუფიდან გასვლა იქნება. მჯერა, რომ ამასაც შევძლებთ, რადგან სამწვრთნელი სტაფისა და ჩემი თანაგუნდელების მჯერა, მათ შესაძლებლობებში დარწმუნებული ვარ.
მიმაჩნია, რომ ეს ყველაფერი რაღაც ახლის, კიდევ უფრო დიდი წარმატების საწყისი უნდა იყოს.
ტურნირის დებულების მიხედვით, 2025 წლის ევროპის 21-წლამდე ნაკრებების ჩემპიონატზე საკვალიფიკაციო რაუნდის ჯგუფური ეტაპიდან (მასპინძელი სლოვაკეთის გარდა) პირდაპირ მოხვდა 9 ჯგუფის გამარჯვებული ნაკრები და 3 საუკეთესო მეორეადგილოსანი, ხოლო დარჩენილი 6 მეორეადგილოსანი ნაკრები ერთმანეთს დაუპირისპირდა და 3 საგზური სწორედ ამ გზით გადანაწილდა.
საქართველოს 21-წლამდე ნაკრების გარდა, პლეი-ოფის გავლით, ევროპის ჩემპიონატზე ჩეხეთი და ფინეთი გავიდნენ. ასევე, ევრო 2025-ზე ითამაშებენ: სლოვაკეთი (მასპინძელი), დანია, ინგლისი (მოქმედი ჩემპიონი, რომელმაც ტიტული ბათუმში ჩაიბარა), საფრანგეთი, გერმანია, იტალია, ნიდერლანდები, პოლონეთი, პორტუგალია, რუმინეთი, სლოვენია, ესპანეთი და უკრაინა.
ტურნირის წილისყრას 3 დეკემბერს, სლოვაკეთის დედაქალაქი, ბრატისლავა უმასპინძლებს, სადაც 16 ნაკრები 4 ჯგუფში მოხვდება.
21-წლამდე ნაკრებების ევროპის ჩემპიონატი 2025 წლის 11 ივნისიდან 28 ივნისის ჩათვლით, სლოვაკეთში გაიმართება.
შენიშვნა: მასალაში გამოყენებულია საქართველოს ფეხბურთის ფედერაციის ფოტოები
