ქართველი მენეჯერის, მამუკა ჯუღელის პარტნიორმა გავლენიან სააგენტოსთან 2009 წლის 30 მარტს დაბადებულ, 15 წლის ანდრია ბართიშვილზე ისაუბრა, რომელიც საქართველოს 17-წლამდე ნაკრების წევრია. ანდრია ბართიშვილმა 2025 წლის ევროპის ჩემპიონატის საკვალიფიკაციო ეტაპის 3 მატჩში 2 გოლი გაიტანა და 1 საგოლე გადაცემა შეასრულა.
ანდრიას მიერ საკვალიფიკაციო ეტაპზე, სლოვენიას კარში, 31-ე წუთზე გატანილი პირველი გოლი, გიორგი ჩაკვეტაძის ერთა ლიგის ისტორიაში პირველ გოლს გაგახსენებთ.
ანდრია ბართიშვილი, რომელიც როგორც ფლანგზე, ისე შემტევ ნახევარმცველად თამაშობს, დინამო თბილისის აკადემიის აღზრდილია, თუმცა ამჟამად უკვე კოლხეთი 1913-ის ფეხბურთელია, რომლის მფლობელიც სწორედ მისი მენეჯერი, მამუკა ჯუღელია.
1,70 სმ სიმაღლის ფეხბურთელის ძლიერი მხარეები: სისწრაფე, ტექნიკურობა, მოქნილობა, დრიბლინგი.
2024 წლის მიწურულს, საქართველოს ფეხბურთის ფედერაციის ყოველწლიურ დაჯილდოვებაზე, ანდრია ბართიშვილმა ალექსანდრე ჩივაძის სახელობის ვერცხლის მედალი, როგორც 17-წლამდე ასაკის გამორჩეულმა ტალანტმა, მიიღო. ჯილდოსთან ერთად, ანდრიას Coca-Cola Bottlers Georgia-ს მიერ დაწესებული ფულადი თანხა - 5 000 ლარის ოდენობით გადაეცა.
შენიშვნა: მასალაში გამოყენებულია საქართველოს ფეხბურთის ფედერაციის ფოტოები
