ბათუმი GRAND BELLAGIO | NOMAD CUP -ს უმასპინძლებს, ახობაძესთან ერთად ქართველთაგან გამარჯვებისთვის, ქრისტინე ჟორჟოლიანი, გიგა ბერაძე, ავთანდილ თუთბერიძე და ნოდარ ბოჯგუა იბრძოლებენ. საქართველოში ჩამოვლენ სპორტსმენები უკრაინიდან, თურქეთიდან, სომხეთიდან და ყირგიზეთიდან.
შეგახსენებთ, ფართო აუდიტორიამ ვახტანგ ახობაძე მას შემდეგ გაიცნო, რაც 2024 წლის აგვისტოში, პარამკლავჭიდში მსოფლიო ჩემპიონი გახდა. ქართველმა მოლდოვაში გამართულ ტურნირზე 60 კგ. წონით კატეგორიაში ყირგიზი ბეკბოსუნ ტოკტოსუნი დაამარცხა.
გულშემატკივრის ვნებათაღელვა გამოიწვია გავრცელებულმა ვიდეომ, სადაც ჩანს, რომ ყირგიზი შეჯიბრებამდე იცინოდა, ქართველის მოგების შემდეგ კი გამარჯვებულ ახობაძეს ხელი არ ჩამოართვა.
რემატჩის მოლოდინი, ახობაძის სამზადისი და პასუხი მეტოქეს, - ამ თემების შესახებ ვახტანგ ახობაძემ LaGazzetta.ge-სთან ისაუბრა:
- გამარჯვებას გისურვებთ, როგორ მიმდინარეობს მოსამზადებელი ეტაპი, ზაფხულში როცა შეხვედრის დაწყებამდე ბეკბოსუნ ტოკტოსუნი იცინოდა ეს დამატებითი მოტივაცია აღმოჩნდა?
- მე მხოლოდ გამარჯვებაზე ვფიქრობდი. იმ წამზე, როცა მეტოქე უკვე დამარცხებული უნდა მყოლოდა, როცა მოწინააღმდეგესთან მაგიდის პირისპირ ხარ, მხოლოდ გამარჯვებაზე ხარ კონცენტრირებული. მაშინაც ასე იყო. ისე კი, მისმა დამარცხებამ ჩემი ცხოვრება შეცვალა და შეიძლება ითქვას, რომ ესაა ჩემს კარიერაში ყველაზე ხმაურიანი მოგება, რომელიც საბოლოოდ თითქმის მთელმა მსოფლიომ ნახა. ახალა აქტიურად ვემზადები, შრომას არასდროს ვაკლებ და ახლა კიდევ უფრო მეტი მასუხისმგებლობა მაქვს აღებული, თან საქართველოში ვასპარეზობ.
- თქვენ გაიმარჯვეთ, მეტოქემ ხელი არ ჩამოგართვათ, რა უთხარით ბრძოლის შემდეგ?
- ჩვენ ბრძოლის შემდეგ ერთმანეთთან არ გვილაპარაკია. ჩემს მოწინააღმდეგეს როგორც ვიცი, საკმაოდ რთული დღეების გავლა მოუწია. არავინ მოუწონა მას ეს საქციელი. ახლა კიდევ ერთი შანსი ექნება და შეუძლია გამოასწოროს, ოღონდ ხელის ჩამორთმევა და არა ხელის გადაწევა.
- ქართველ გულშემატკივარს რას ეტყვით?
- გულშემატკივარს ვთხოვ, მოვიდეს ჩემს საგულშემატკივროდ. ძალიან ბევრს ვშრომობ GRAND BELLAGIO | NOMAD CUP - ის მოსაგებად. ორგანიზატორებიც ყველაფერს აკეთებენ, რომ შეჯიბრმა მაღალ დონეზე ჩაიაროს. ჩვენს გარდა კიდევ 4 დაპირისპირება იქნება. ქრისტინე ჟორჟოლიანი ხომ გახსოვთ? დროშის წინა პლანზე დაჭერას რომ ცდილობდა კვარცხლბეკზე და ასიათასობით ადამიანმა ნახა ეს ვიდეო. ისიც მიიღებს მონაწილეობას. ასევე გიგა ბერაძე, ავთანდილ თუთბერიძე, ნოდარ ბოჯგუა და კიდევ 4 სპორტსმენი თურქეთიდან, სომხეთიდან და უკრაინიდან. იმედია გულშემატკივარი მოვა და მოგვცემს დამატებით მუხტსა და სტიმულს. ასევე, პაუზებს შორის სპორტული ნაწილის გარდა იქნება მომღერლების და მოცეკვავეების შოუ, რაც მოსულ სტუმრებს კიდევ უფრო გაულამაზებს ამ საღამოს.
- რა იქნება მომავალ დაპირისპირებაში გადამწყვეტი?
- მომავალ დაპირისპირებაში მთავარია ჩემი, ქართველი გულშემატკივრების წინაშე გავიმარჯვო, მეც გავიხარო და გულშემატკივარი გავახარო.
ისე კი მთავარი, ადამიანური ურთიერთობებია, რისი განვითარებაც სპორტს ყველაზე კარგად შეუძლია. ყველა შედეგზე მაღლა ადამიანის სახელი დგას და ყველა სპორტსმენმა ამას უნდა მიაქციოს ყურადღება. მე ამ ცნობილმა გამარჯვებამ შეიძლება შედეგები მომიტანა და ცხოვრებაც უკეთესობისკენ შემიცვალა, მაგრამ ყველაზე დიდი რამ, რაც მოვიპოვე, ეს ხალხის სიყვარულია და ამისთვის ღმერთს ყოველდღე მადლობას ვეუბნები.
