15 ივნისს, 04:00 საათიდან, UFC Freedom 250-ის ფარგლებში, სპორტის ისტორიაში ერთ-ერთი ყველაზე უნიკალური ლოკაცია - თეთრი სახლი MMA-ს უმნიშვნელოვანეს დაპირისპირებას უმასპინძლებს. 66 კილოგრამ დივიზიონის დაპყრობისა და გასულ წელს 70 კილოგრამში ქამრის მოპოვების შემდეგ, ილია თოფურია (17-0) თავის პირველ ტიტულის დაცვას გამართავს.
ქართველი ჩემპიონის მეტოქე კი მსუბუქი წონითი დივიზიონის ერთ-ერთი ყველაზე საშიში, გამოცდილი და დაუნდობელი მებრძოლი, დროებითი ქამრის მფლობელი, ჯასტინ გეიჯია (27-5).ეს არ არის 2 ჩემპიონის უბრალო ჩხუბი, ეს არის სტილების, მენტალიტეტისა და თაობების ეპიკური შეჯახება, რომელსაც ბოლო კვირებში პირადი დაპირისპირების მძაფრი ელფერიც დაემატა.
ილია თოფურიას MMA-ს მთავარ სცენაზე დაბრუნება
თოფურიას ბოლო წლების პროგრესი ფენომენალურია. ალექსანდერ ვოლკანოვსკისა და მაქს ჰოლოუეის განადგურების შემდეგ, მან წონა შეიცვალა და ჩარლზ ოლივეირას პირველივე რაუნდში გათიშვით, მსოფლიოს მთავარ პრომოუშენში ქართველი მსუბუქწონოსანი გახდა მე-10 მებრძოლი, რომელიც 2 დივიზიონის ქამარს დაეუფლა.
ილია ოქტაგონზე ქირურგიული სიზუსტით მოქმედებს. მისი კრივის ტექნიკა, სხეულზე მუშაობა და თაიმინგი ამჟამად საუკეთესოა ორგანიზაციაში. "მატადორის" თავდაჯერებულობა ზოგჯერ ამპარტავნებაში აირევა ხოლმე, მაგრამ ფაქტია, ის ყველაფერს ასრულებს, რასაც პროგნოზირებს. შეცდომა 29 წლის მსუბუქწონოსნის მხრიდან ჯერ არ ყოფილა.
ბრძოლამდე რამდენიმე დღით ადრე თოფურიამ ინსტაგრამის აღწერაში რეკორდი ისევ შეცვალა და 18-0 დაიწერა, რითაც ხაზი გაუსვა, რომ გეიჯისთან მოგება მისთვის უკვე გარდაუვალი რეალობაა. მიუხედავად იმისა, რომ ქართველი ჩემპიონი უკანასკნელ პერიოდში მოწინააღმდეგეებს სასტიკი დარტყმებით აძინებს, არ უნდა დაგვავიწყდეს მისი ბერძნულ-რომაული ჭიდაობის ბაზა და შავი ქამარი ბრაზილიურ ჯიუ-ჯიცუში.
თუ ბრძოლა პარტერში გადავა, ილიას იქ კოლოსალური უპირატესობა ექნება. აღსანიშნავია, რომ ბოლო პრესკონფერენციებსა და სოციალურ ქსელებში მებრძოლებს შორის სიტუაცია უკიდურესად დაიძაბა. დროებითი ქამრის ამერიკელი მფლობელი შეეხო მოწინააღმდეგის პირად ცხოვრებას, რის შემდეგაც "მატადორის" აგრესიულმა პასუხმაც არ დააყოვნა.
რაც შეეხება ბრძოლის სცენარსა და სავარაუდო შედეგს, 29 წლის ჩემპიონმა უნდა შეინარჩუნოს ცივი გონება და არ აყვეს ჯასტინს ე.წ. ემოციურ ჩხუბში. "ჰაილაითის" მარჯვენა ჰუკები საშიშია, მაგრამ ის ხშირად იხსნება კონტრდარტყმებისთვის. თუ თოფურია გამოიყენებს თავის საფირმო კომბინაციებს კორპუსი-თავის მიმართულებით და დროულად ჩართავს ჭიდაობას, მას აქვს შანსი, რომ 37 წლის ოპონენტი 1-ელ ან მე-2 რაუნდში დააფინიშოს (ან ნოკაუტით, ან სუბმიშენით).
ეს იქნება დაძაბული, ტაქტიკური, თუმცა ამავდროულად საკმაოდ ძალისმიერი ბრძოლა. გეიჯის კარდიო და გამძლეობა ეჭვგარეშეა, მაგრამ ქართველი ჩემპიონი ამჟამად თავისი შესაძლებლობების პიკშია. მისი ტექნიკური არსენალი ბევრად უფრო მრავალფეროვანია. სიტყვების საქმით განმტკიცება, ილია სწორედ ამას აპირებს.
ალექს პერეირა - ისტორიული, მე-3 დივიზიონის ქამრის მოგების მოლოდინში
გადავინაცვლოთ მძიმე წონის ელიტაში, სადაც აბსოლუტურად ფანტასტიკური და სტილისტურად იდეალური ბრძოლა გველოდება. აქ ერთმანეთს ხვდება 2 უმაღლესი დონის სტრაიკერი, რომლებმაც კარიერა კიკბოქსინგით დაიწყეს, მაგრამ ოქტაგონზე სრულიად განსხვავებული ფილოსოფია შემოიტანეს.
ეს არის მძიმე წონის ტიტულისთვის ბრძოლა - პერეირას მესამე ქამარი თუ სირილ განის კარიერის მთავარი შანსი?! სამხრეთ ამერიკელი მებრძოლი შერეული საბრძოლო ხელოვნებების ცოცხალი ლეგენდა უკვე არის. ალექსმა ჯერ 84 კილოგრამ დივიზიონის ქამარი აიღო, შემდეგ 92 კილოგრამი დაიპყრო და ტიტული რამდენჯერმე ეპიკურად დაიცვა, ახლა კი სპორტის ისტორიაში ოქროს ასოებით ჩაწერას აპირებს.
რაც შეეხება ფრანგ მებრძოლს, ჯონ ჯონსთან, ფრენსის ნგანუსა და ტომ ასპინალთან სამ საჩემპიონო ბრძოლაში ვერმოგების შემდეგ, კარიერის მთავარ ნიშნულამდე მისვლას ის ბრაზილიელი მოწინააღმდეგის დამარცხებით ეცდება. რაც შეეხება ჩხუბის სცენარს, გვაქვს 2 უკიდურესობა: ყველაფერი დასრულდება 1 დარტყმით ან მსაჯთა გადაწყვეტილებამდე მივა.
სირილი ზედმეტად ჭკვიანი და ფრთხილია იმისთვის, რომ "პოატანის" მახეში ადვილად გაებას. ის პირველ ორ რაუნდს თავისი აქტიურობითა და გადაადგილებით მოიგებს, მაგრამ 2 დივიზიონის 38 წლის დომინანტის საჩემპიონო რაუნდების გამოცდილება და წარმოუდგენელი სიმშვიდე თავისას იზამს.
"ბონ ჟამინი" ერთ-ერთი საუკეთესო მებრძოლია მძიმე წონით დივიზიონში, თუმცა პერეირას ეფექტური დარტყმები მას მესამე ქამართან აახლოვებს. ყველა სპორტსმენს აქვს თავისი გზა და მოტივაცია, მაგრამ ობიექტურად, 3 დივიზიონის ქამარი, ეს არის უნიკალური ისტორია, რომელიც მთელ სამყაროს უნდა რომ მოხდეს.
სხვა ბრძოლები
თოფურია - გეიჯისა და პერეირა - განის გარდა, თეთრ სახლში კიდევ ხუთი ბრძოლა გაიმართება. შონ ო'მალი დაუპირისპირდება აიმან ზაჰაბის, დერიკ ლიუისი - ჯოშ ჰოკიტს, მაიკლ ჩენდლერი - მაურისიო რუფის, ბო ნიკალი - კაილ დოკასს, დიეგო ლოპესი კი სტივ გარსიას. როგორც ვხედავთ, ივენთზე ამერიკელი სპორტსმენები ჭარბობენ.
სამი მებრძოლი ჰყავს ბრაზილიას - პერეირა, ლოპესი, რუფი, ასევე თითო საქართველოს (თოფურია), საფრანგეთსა (განი) და კანადას (ზაჰაბი). როგორც ვხედავთ, ილიას ჩხუბი აღნიშნული მიზეზის გამოც იქნება განსაკუთრებული. 15 ივნისი, 04:00 საათი, ისტორიული ივენთის დაწყებამდე სულ ცოტა დრო რჩება.
