ზედიზედ 10 გამარჯვება - შთამბეჭდავი სერია, რომლის ავტორები UFC-ში მხოლოდ რჩეული მებრძოლები არიან. გავიხსენოთ მსოფლიოს მთავარი პრომოუშენის ლეგენდები, ბოლოს კი ვისაუბროთ ილია თოფურიაზეც, რომელიც ამ ნიშნულთან 1 ნაბიჯში იმყოფება. 70 კილოგრამ წონითი დივიზიონის ჩემპიონს მხოლოდ ჯასტინ გეიჯისთან მოგება სჭირდება.
მერაბ დვალიშვილი - ზედიზედ 10 გამარჯვება, შემდეგ კი ნანატრი ჩემპიონობა
დვალიშვილი ელიტური სიის იშვიათი წევრია, ვინც ზედიზედ 10 ბრძოლაში გამარჯვებული ჯერ კიდევ ჩემპიონობამდე გახდა. UFC-ში ორი მარცხით დაწყებული გზა გაგრძელდა შთამბეჭდავი მოგებათა სერიით, საიუბილეო, მე-10 გამარჯვება კი ქართველმა სუპერმსუბუქწონოსანმა ჰენრი სეხუდოსთან მოიპოვა.
მერაბი იმ ბრძოლამდეც ითვლებოდა დივიზიონის ნომერ პირველ ქონთენდერად, ამერიკელი ყოფილი ჩემპიონისთვის ჩატარებულმა ჭიდაობის მასტერკლასმა კი ყველა ეჭვი საბოლოოდ გააქრო. "ტრიპლ სი"-სთან მოგების შემდეგ, "მანქანა" 61 კილოგრამ დივიზიონის მთავარ დომინანტად იქცა. ველოდებით პიოტრ იანთან ტრილოგიას და ქამრის დაბრუნებას.
ტონი ფერგიუსონი - ყველაზე დიდი მათ შორის, ვინც ჩემპიონი არ ყოფილა
მართალია, ფერგიუსონი არ ყოფილა UFC-ის რეგულარული ჩემპიონი და თავისი შთამბეჭდავი კარიერის განმავლობაში ის შემოიფარგლა მხოლოდ დროებითი ტიტულით, ლეგენდების გვერდით ყოფნას ის მაინც იმსახურებს. ამერიკელ მსუბუქწონოსანს დაღმასვლამდე ჰქონდა სერია 12 მოგებით, საიუბილეო, მე-10 კი მან კევინ ლის სამკუთხედზე დაჭერით მოიპოვა.
სწორედ იმ ბრძოლაში გახდა ტონი დივიზიონის დროებითი ჩემპიონი, თუმცა ტიტულის დაცვა მან ტრავმის გამო ვერ მოახერხა. MMA-ს ახალგაზრდა მაყურებლისთვის "ელ კუკუი" არის ვეტერანი, რომელმაც მსოფლიოს მთავარ პრომოუშენში კარიერის მიწურულს წააგო ზედიზედ 8 ჩხუბი, მაგრამ სტაჟიანმა ფანებმა კი იციან, თუ რას წარმოადგენდა ის გასულ დეკადაში.
მაქს ჰოლოუეი - ქვემსუბუქი დივიზიონის მთავარი დომინანტი ალექს ვოლკანოვსკიმდე
ჰოლოუეიმ ზედიზედ მე-10 გამარჯვება იზეიმა ენტონი პეტისის დამარცხებით, რითაც ის ქვემსუბუქი წონითი დივიზიონის დროებითი ჩემპიონი გახდა. ჟოზე ალდოსთან 2-ჯერ მოგებითა და ასევე ბრაიან ორტეგას განადგურებით, ჰავაელი მებრძოლი 66 კილოგრამში ნამდვილ დომინანტ ძალად იქცა.
მაქსს ჯამში გამოუვიდა სერია ზედიზედ 13 გამარჯვებით, რის შემდეგაც იყო მარცხი დასტინ პორიესთან, მსუბუქი წონითი დივიზიონის დროებით ქამარზე, მოგვიანებით კი წაგებები ვოლკთან, 66 კილოგრამში. მართალია, "კურთხეული" მარცხდებოდა, მაგრამ ის ვერავინ გათიშა, სანამ ოქტაგონში თოფურიამ არ შეაბიჯა.
დემეტრიუს ჯონსონი - უმსუბუქესი დივიზიონის ყველა დროის საუკეთესო
დვალიშვილის მსგავსად, ზედიზედ მე-10 გამარჯვება ჯონსონმა UFC-ში სეხუდოს წინააღმდეგ ბრძოლაში მოიპოვა. განსხვავება არის ის, რომ თუ ქართველ სუპერმსუბუქწონოსანს იმ დროს ჯერ კიდევ არ ჰქონდა ქამარი, ამერიკელი მებრძოლი 57 კილოგრამ წონითი დივიზიონის სტაჟიანი დომინანტი იყო.
დემეტრიუსის გამარჯვებების სერია საერთო ჯამში მოიცავს საჩემპიონო ტიტულის ზედიზედ 11-ჯერ დაცვას, რაც UFC-ის რეკორდად დღემდე რჩება. სწორედ ეს არის მიზეზი, რის გამოც "თაგვს" ბევრი აყენებს ყველა დროის საუკეთესოების გვერდით. 2012 წლის სექტემბრიდან-2018 წლის აგვისტომდე, ჯონსონის გარდა 57 კგ-ში ქამარს ვერავინ ეუფლებოდა.
ჯონ ჯონსი - დოპინგ სკანდალით შეწყვეტილი სერია
ჯონსი ოქტაგონში არასდროს დამარცხებულა, თუმცა მის რეზიუმეში ფიგურირებს ორი ბრძოლა, სადაც ის გამარჯვებულად გამოცხადებული არ არის. მეტ ჰემილთან არალეგალური დარტყმის შედეგად წაგებული ჩხუბის შემდეგ, ამერიკელი ქვემძიმეწონოსანი 13 ბრძოლის მანძილზე შეუჩერებელი იყო.
საიუბილეო, ზედიზედ მე-10 გამარჯვება ჯონმა მოიპოვა ალექსანდერ გუსტაფსონის დამარცხებით და ეს საჩემპიონო ტიტულის მე-6 დაცვა იყო. მოგვიანებით, "ბოუნსმა" მოიგო კიდევ 3 ჩხუბი და ის გამარჯვებულად გამოცხადდა დანიელ კორმიეს გათიშვის შემდეგაც, მაგრამ დოპინგ ტესტზე აღმოჩენილმა ტურინაბოლმა მისი მიღწევა გაანულა.
ისლამ მახაჩევი - ერთი ნაბიჯი აბსოლუტურ რეკორდამდე
მახაჩევმა UFC-ში მოიპოვა ზედიზედ 16 გამარჯვება და ამ მაჩვენებლით ის პირველ ადგილს ანდერსონ სილვასთან ერთად იყოფს. იმ შემთხვევაში, თუ დაღესტნელი ქვესაშუალოწონოსანი თავის შემდეგ ჩხუბში მოიგებს კვლავ, ის ერთპიროვნული ლიდერი გახდება. რაც შეეხება მის განვლილ გზას, ისლამი 2015 წლის ოქტომბრიდან წაუგებელია.
დვალიშვილის მსგავსად, ზედიზედ მე-10 გამარჯვების მოპოვების მომენტისთვის ჩემპიონი კავკასიელი მებრძოლიც არ ყოფილა. საუბარია ბობი გრინთან ჩხუბზე, რომელიც მახაჩევმა ნოკაუტით მოიგო. არსებობს მოსაზრება, მსოფლიოს მთავარ პრომოუშენში მას შეაჩერებს მხოლოდ თოფურია, მაგრამ მათი ბრძოლა გარკვეული მიზეზების გამო კითხვის ნიშნის ქვეშ დგას.
ხაბიბ ნურმაგომედოვი - ზედიზედ 10 გამარჯვება, შემდეგ კი კონორ მაკგრეგორთან ეპოქალური დუელი
ნურმაგომედოვმა UFC-ში მოიპოვა ზედიზედ 13 გამარჯვება, მოგვიანებით კი კარიერა დაასრულა. საიუბილეო, მე-10 მოგება მან იზეიმა ელ იაკვინტასთან ჩხუბში, რის შემდეგაც დაღესტნელი მებრძოლი 70 კილოგრამ დივიზიონის ქამრის მფლობელიც გახდა. რა მოხდა მოგვიანებით, ეს უკვე სულ სხვა ისტორიაა.
ხაბიბმა თავისი მე-11 გამარჯვება მოიპოვა ბრძოლაში, რომელმაც მისი კარიერა და ზოგადად MMA პოპულარობის თვალსაზრისით ახალ საფეხურზე აიყვანა. საუბარია მაკგრეგორთან ჩხუბზე და იმ ყველაფერზე, რაც აღნიშნულ ბრძოლას თან ახლდა. მთავარ მოწინააღმდეგესთან მოგების შემდეგ, "არწივმა" ქამარი პორიესა და გეიჯისთან დაიცვა.
ჩარლზ ოლივეირა - ფორმის პიკში შესვლა 30 ბრძოლის შემდეგ
ოლივეირა არის მებრძოლი, ვინც 36 წლის ასაკისთვის 49 ბრძოლის ჩატარება მოასწრო. მან გამოიარა ყველაფერი, უშუალოდ მთავარი, კარიერის პიკი კი ბრაზილიელ მსუბუქწონოსანს 30 ჩხუბის შემდეგ დაეწყო. 2018-2022 წლებში მან მოიგო ზედიზედ 11 ბრძოლა, მათ შორის იყო საჩემპიონო დუელი მაიკლ ჩენდლერთან და ქამრის დაცვა პორიესთან.
მოგვიანებით, საჩემპიონო ტიტულის მეორედ დაცვისას მან დაამარცხა გეიჯიც, თუმცა იმ ბრძოლას თან ახლდა ერთი უსიამოვნო ფაქტიც - ჩარლზმა წონა ვერ ჩააბარა. "დუ ბრონქსმა" მოიგო, მაგრამ ქამარი დარჩა ვაკანტურად, რომელიც შემდგომ უკვე მახაჩევმა დაისაკუთრა. გამოსარჩევია ისიც, რომ მოგებათა სერიის დროს, ოლივეირამ საკუთარ ანგარიშზე რეკორდული, მე-17 ფინიში ჩაიწერა.
ანდერსონ სილვა - 6 წლის მანძილზე დაუმარცხებელი
MMA-ს ისტორიაში ერთ-ერთი საუკეთესო მებრძოლი, ვინც მთელი ეპოქა შექმნა. სილვამ გაიმარჯვა ზედიზედ 16 ბრძოლაში, რაც როგორც აღვნიშნეთ, მახაჩევის გამოჩენამდე უნიკალური მიღწევა იყო. საიუბილეო მე-10 ჩხუბი ბრაზილიელმა საშუალოწონოსანმა მოიგო ფორესტ გრიფინთან, თანაც 93 კგ-ში.
ანდერსონი დაუმარცხებელი ჯამში რჩებოდა ექვსი წლის განმავლობაში, 2006 წლის აპრილიდან - 2012 წლის ოქტომბრამდე. არსებობს მოსაზრება - კარიერის მიწურულს წაგებათა სერია რომ არა, "ობობა" შერეულ საბრძოლო ხელოვნებებში ულაპარაკოდ ყველა დროის საუკეთესოდ იქნებოდა აღიარებული.
ჟორჟ სენ-პიერი - ულამაზეს ნოტაზე დასრულებული კარიერა
ქვესაშუალო წონითი დივიზიონის საუკეთესო მებრძოლად აღიარებულ სენ-პიერს კარიერაში აქვს მხოლოდ ორი მარცხი, ორივე მეტებთან - ჰიუზსა და სერასთან. კანადელმა მებრძოლმა ორივესთან აიღო რევანში, რაც ნიშნავს იმას, რომ მის გზაზე არ ყოფილა მოწინააღმდეგე, რომლისთვისაც მას არ მოუგია.
"ტერორთან" გამარჯვების შემდეგ, ჟორჟმა კარიერის ბოლომდე იარა დაუმარცხებლად, ჯამში 13 ბრძოლაში. საიუბილეო მე-10 ჩხუბში მან მოუგო კარლოს კონდიტს, კიდევ 2 ტრიუმფის შემდეგ კი ჯიესპიმ კარიერა დაასრულა. წლების შემდეგ ვიხილეთ მისი დაბრუნება და მაიკლ ბისპინგისთვის 84 კგ დივიზიონის ქამრის წართმევა.
კარლოს ულბერგი - ჩემპიონობით დაგვირგვინებული სერია
ქვემძიმე წონითი დივიზიონის სულ ახალი ჩემპიონი, ვინც ზედიზედ მე-10 გამარჯვებით ქამრის მფლობელი გახდა. UFC-ში სადებიუტო ბრძოლაში წაგების შემდეგ, ულბერგის შეჩერება ვეღარავინ შეძლო. მან მოუგო იან ბლახოვიჩს, დომინიკ რეიესს, ვოლქან ოზდემირსა და სხვებს. რაც შეეხება სატიტულო ჩხუბს, ახალ ზელანდიელმა ქვემძიმეწონოსანმა ირჟი პროხაზკას აჯობა.
როგორც ვხედავთ, კარლოსის განვლილი გზა UFC-ში ძალიან ჰგავს იმ ყველაფერს, რაც ხდება თოფურიას გარშემო, თუმცა განსხვავებები მაინც არის. ქართველი მსუბუქწონოსანი ზედიზედ მე-10 მოგებისკენ მიდის წაგების გარეშე, პლიუს ის 2 დივიზიონის ქამრის მფლობელი უკვე არის. ბოლოს კიდევ ერთი საინტერესო ფაქტი "შავ იაგუარზე" - 10 გამარჯვებიდან 6, ნოკაუტით იყო.
კამარუ უსმანი - ქვესაშუალო წონითი დივიზიონის კოშმარი
უსმანს ჰქონდა ზედიზედ მოპოვებული გამარჯვებების შთამბეჭდავი სერია, რომელიც 15 ბრძოლას მოიცავდა. მასზე გამორჩეული შედეგი ამ მხრივ აქვთ მხოლოდ სილვასა და მახაჩევს, მიყოლებით 16 მოგება. დროის ფაქტორი რომ გავითვალისწინოთ, ნიგერიელი ქვესაშუალოწონოსანი წაუგებელი ბრაზილიელ ლეგენდაზე დიდხანსაც რჩებოდა.
ანდერსონი - ექვსი წელი, კამარუ კი რვა. საიუბილეო, მე-10 გამარჯვება მან იზეიმა ტაირონ ვუდლისთან, მაშინ, როდესაც აფრიკელი მებრძოლის დომინაცია 77 კილოგრამ წონით დივიზიონში უკვე დაწყებული იყო. საინტერესოა, რომ "კოშმარის" სერია დაასრულა ლეონ ედვარდსმა, ქვესაშუალოწონოსანმა, რომელსაც მან მსოფლიოს მთავარ პრომოუშენში სადებიუტო ჩხუბში მოუგო.
ალექს ვოლკანოვსკი - "დიდებულის" დიდებული სერია
მებრძოლი, ვის სახელსაც ქვემსუბუქ წონით დივიზიონში ჰოლოუეის დომინირების დასრულება უკავშირდება. აღსანიშნავია, რომ ვოლკანოვსკიმ თავად ჰავაელ მოწინააღმდეგეს 3/3 ჩხუბი მოუგო. ავსტრალიელი ჩემპიონის ტრიუმფი ჯამში გაგრძელდა 12 ბრძოლა, შემდეგ კი იყო წაგება მახაჩევთან, 70 კგ-ში.
ალექსანდერი დაღესტნელ მებრძოლთან მოგვიანებით დამარცხდა მეორეთაც, რის შემდეგაც კარიერის გაგრძელება მან კვლავ ქვემსუბუქ წონით დივიზიონში ისურვა. "დიდებულმა" მოუგო იაირ როდრიგესსა და დიეგო ლოპესს, მაგრამ ვერაფერი მოუხერხა თოფურიას. ამ უკანასკნელის 70 კგ კილოგრამში ასვლის შემდეგ, 37 წლის მებრძოლის დომინირება ქვემსუბუქში გაგრძელდა.
ილია თოფურია - ზედიზედ მე-10 გამარჯვებისთვის ყველაფერი მზად არის
თოფურიას უყვარს გამარჯვების წინასწარ ზეიმი და ამ მიდგომას ის არასდროს დაუღალატებია. მოვლენებს წინასწარ გავუსწრებთ ჩვენც და მიყოლებით მე-10 მოგებაზე ვისაუბრებთ. ქართველი მსუბუქწონოსნის გამარჯვება სხვების მიღწევაზე განსაკუთრებული რამდენიმე მიზეზის გამო იქნება.
უპირველეს ყოვლისა გამოსარჩევია ის ფაქტი, რომ ილია ზედიზედ მე-10 გამარჯვებამდე მიდის დაუმარცხებლად, თანაც ისე რომ მის სახელზე ორ წონაში ჩემპიონობა უკვე არის. გეიჯისთან მოგებით, "მატადორი" დაიცავს ქამარს 70 კილოგრამ დივიზიონში, დონალდ ტრამპის დაბადების დღეზე, თეთრ სახლში.
