შვეიცარიის ქალაქ ნიონში UEFA-ს ახალგაზრდული ლიგის წილისყრა გაიმართა, რომელმაც დინამო თბილისის მეტოქე გამოარკვია. საქართველოს ყველაზე ტიტულოვანი კლუბის აკადემიის 19-წლამდე შემადგენლობა მონტენეგროს ბუდუჩნოსტს დაუპირისპირდება.
ტურნირის დებულების მიხედვით, გუნდები 2 მატჩს ითამაშებენ: სახლში და სტუმრად. შეხვედრები 18 სექტემბერს და 2 ოქტომბერს გაიმართება.
იმ შემთხვევაში, თუ დინამო თბილისის 19-წლამდე გუნდი ბუდუჩნოსტის ბარიერს გაივლის, მეტოქეობას ტრაბზონსპორს გაუწევს. გათამაშების მეორე რაუნდის მატჩები: 23 ოქტომბერსა და 6 ნოემბერს ჩაინიშნა.
ცნობილია მესამე რაუნდის სავარაუდო მეტოქეებიც: თუ დინამო თბილისი შეძლებს და ორ ეტაპს გადალახავს, მესამე რაუნდში ისრაელის პეტაჰ-ტიკვა მაკაბის, მაკედონიურ ბრერა შტრუმიცას ან ბოსნიურ სარაევოს შეხვდება. ასეთ შემთხვევაში, დაპირისპირებები 27 ნოემბერსა და 11 დეკემბერს გაიმართება.
შენიშვნა: მასალაში გამოყენებულია დინამო თბილისის ფოტო
UEFA-ს ახალგაზრდულ ლიგაზე დინამოს პირველი მეტოქე გაირკვა
