ჩვენმა გუნდმა გოლი 52-ე წუთზე გაუშვა, თუმცა ხასიათი გამოავლინა და 61-ე წუთზე ჯერ ვასილიოს გორდეზიანის გოლით აღადგინა წონასწორობა, 71-ე წუთზე კი, წინ ნოდარ ლომინაძის გოლით გავიდა, რამაც ისტორიული შედეგი მოგვიტანა.
აღნიშნული მატჩი რამაზ სვანაძის ნაკრებისთვის უმნიშვნელოვანესი იყო და მხოლოდ გამარჯვება ესაჭიროებოდა, რადგან 2025 წლის ევროპის 21-წლამდე ნაკრებების ჩემპიონატზე, საკვალიფიკაციო რაუნდის ჯგუფური ეტაპიდან (მასპინძელი სლოვაკეთის გარდა) პირდაპირ მოხვდა 9 ჯგუფის გამარჯვებული ნაკრები და 3 საუკეთესო მეორეადგილოსანი, ხოლო დარჩენილი 6 მეორეადგილოსანი გუნდი ერთმანეთში, წყვილად 2-მატჩიან პლეი-ოფს ითამაშებს და ბოლო 3 საგზური სწორედ ამ გზით გადანაწილდება.
საქართველოს 21-წლამდე ნაკრები C ჯგუფში: ნიდერლანდებთან, შვედეთთან, მოლდოვასთან, ჩრდილოეთ მაკედონიასა და გიბრალტართან ერთად თამაშობდა, 19 ქულით მე-2 ადგილი დაიკავა და ისტორიულ პლეი-ოფში ითამაშებს. აქამდე, საქართველოს 21-წლამდე ნაკრებს მსგავსი მიღწევა არ ჰქონია, რადგან 2023 წელს, საქართველოს 21-წლამდე ნაკრებმა ევროპის ჩემპიონატზე მასპინძლის სტატუსით ითამაშა.
ისტორიულ პლეი-ოფში საქართველოს 21-წლამდე ნაკრების მეტოქე 17 ოქტომბერს, კენჭისყრის შემდეგ გაირკვევა. შესაბამისად, პლეი-ოფში მეტოქე, მასპინძელი სტადიონები და შეხვედრების ზუსტი თარიღები მოგვიანებით დაზუსტდება.
შენიშვნა: მასალაში გამოყენებულია ირაკლი ინასარიძის ფოტო
