ლივერპულში ახალი სეზონისთვის მზადებას აგრძელებენ. კლუბმა ჟერემი ფრიმპონგი უკვე დაიმატა, ძალიან მალე კი მილოშ კერკეზისა და ფლორიან ვირცის ტრანსფერებიც დადასტურდება, თუმცა, კლუბი ამაზე გაჩერებას არ აპირებს. დადასტურებულად შეგვიძლია იმის თქმა, რომ არნე სლოტის გუნდი მინიმუმ 3-4 ფეხბურთელს კიდევ დაიმატებს.
მას შემდეგ, რაც კივინ კელეჰერმა ლივერპული დატოვა, კლუბმა ახალი მეკარის დამატება გადაწყვიტა და როგორც ჩანს მთავარი სამიზნეც ცნობილია — 20 წლის უნგრელი მეკრაე არმინ პეჩი! ახალგაზრდა ფეხბურთელი პუშკაშ აკადემიას ფეხბურთელია, თუმცა მისი მერსისაიდულ კლუბში ტრანსფერი აშკარად დროის საკითხია. მხარეები გარიგების ბოლო დეტალებს უახლოეს დღეებში მოაგვარებენ, რის შემდეგაც არმინ პეჩი ლივერპულთან კონტრაქტს გააფორმებს.
არმინ პეჩი პუშკაშ აკადემიას აღზრდილია, 2023 წლიდან მოყოლებული კი პირველი გუნდის ღირსებას იცავს. უნგრელმა მეკარემ ამ დროში 52 მატჩის ჩატარება მოასწრო, კარის მშრალად შენახვა კი 15-ჯერ შეძლო. ფეხბურთელი უნგრეთის 21-წლამდე ნაკრების შეუცვლელი წევრია.
ბოლო მომენტში რაიმე გაუთვალისწინებელი თუ არ მოხდება, არმინ პეჩი ლივერპულს უახლოეს დღეებში შეუერთდება და ახალ სეზონში, ალისონ ბეკერთან და გიორგი მამარდაშვილთან ერთად ლივერპულის კარს დაიცავს.
