შეიძლება თამამად ითქვას, რომ მთელი მატჩი რამაზ სვანაძის საქართველოს 21-წლამდე ნაკრების აქტიურობითა და კარნახით წავიდა: სამივე საგოლე გადაცემა ლაშა ოდიშარიას ანგარიშზეა. პირველ ტაიმში, მე-14 წუთზე მოლდოვას გიზო მამაგეიშვილმა გაუტანა, მეორე ნახევარში, 49-ე წუთზე ჯერ გიორგი კვერნაძემ (2-0), ხოლო 72-ე წუთზე კი შეცვალზე შემოსულმა გიორგი აბუაშვილმა (3-0).
საქართველოს 21-წლამდე ნაკრები C ჯგუფში: ნიდერლანდებთან, შვედეთთან, მოლდოვასთან, ჩრდილოეთ მაკედონიასა და გიბრალტართან ერთადაა. 7 მატჩის შემდეგ, ჩვენს გუნდს 16 ქულა აქვს (5 მოგება/1 ფრე/1 მარცხი) და სატურნირო ცხრილში მე-2 ადგილს იკავებს. 10 ქულით შვედეთი მესამეა, ხოლო პირველადგილოსან ნიდერლანდებს 24 ქულა აქვს.
ბათუმის შემდეგ, რამაზ სვანაძის გუნდი ნიდერლანდებში გაემგზავრება, სადაც 2025 წლის ევროპის ჩემპიონატის შესარჩევი ციკლის მატჩს, ვენლოში, სწორედ სატურნირო ცხრილის ლიდერთან გამართავს.
მატჩი 9 სექტემბერს შედგება და თბილისის დროით 22:00 საათიდან დაიწყება.
მეკარეები: მიხეილ მაქაცარია (დინამო თბილისი), ლუკა ხარატიშვილი (დინამო ბათუმი), ლევან თანდილაშვილი (თელავი).
მცველები: დავით გოგოტიშვილი (თელავი), საბა ხვადაგიანი (დინამო თბილისი), ნიკოლოზ უგრეხელიძე (დინამო თბილისი), საბა მამაცაშვილი (სირიუსი, შვედეთი), ზურაბ რუხაძე (დილა გორი), დავით ზურაბიანი (კოლხეთი ფოთი 1913), ლადო ოდიშვილი (თელავი), საბა საზონოვი (ტორინო, იტალია).
ნახევარმცველები: ლაშა ოდიშარია (რფს რიგა, ლატვია), ოთარ მამაგეიშვილი (იბერია 1999), გიზი მამაგეიშვილი (იბერია 1999), ლევან ოსიყმაშვილი (დინამო თბილისი), ირაკლი იეგოიანი (ვიტესი, ნიდერლანდები), ლუკა გაგნიძე (დინამო მოსკოვი, რუსეთი), ნოდარ ლომინაძე (დილა გორი), თორნიკე მორჩილაძე (თელავი).
თავდამსხმელები: ვასილიოს გორდეზიანი (დინამო თბილისი), გიორგი კვერნაძე (ფროზინონე, იტალია), გიორგი აბუაშვილი (კოლხეთი ფოთი 1913), ჯადული იობაშვილი (დინამო თბილისი).
შენიშვნა: მასალაში გამოყენებულია საქართველოს ფეხბურთის ფედერაციის ფოტო
