სიგუამ ბაზელის ფორმით ზაფხულის შემდეგ პირველად ითამაშა.
ვილი სანიოლმა ახალგაზრდა ფეხბურთელი 2024 წლის ევროპის ჩემპიონატის განაცხადში შეიყვანა. სიგუა გერმანიაში ეროვნულ ნაკრებთან ერთად იმყოფებოდა, რის შემდეგაც, შვეიცარიაში დაბრუნების შემდეგ, ტრავმა მიიღო და ამ დრომდე, რეაბილიტაციის ხანგრძლივ პერიოდს გადიოდა.
საქართველოს 21-წლამდე ნაკრების მთავარმა მწვრთნელმა, რამაზ სვანაძემ სიგუა მოახლოებული, ხორვატიის წინააღმდეგ დაგეგმილი, უმნიშვნელოვანესი პლეი-ოფების მატჩებისთვის გამოიძახა:
“გაბრიელ სიგუა ჩვენთვის ძალიან მნიშვნელოვანი ფეხბურთელია. ევროპის ჩემპიონატის სანაკრებო განაცხადში სწორედ ამიტომ იყო. სამწუხაროდ, ბოლო პერიოდში ხშირად ჰქონდა ტრავმები, თუმცა ახლა თავს კარგად გრძნობს და დიდი იმედი მაქვს, 21-წლამდე ნაკრებს წარმატების მიღწევაში დაეხმარება. ვიტოვებ იმედებს, რომ შეძლებს ტრავმებს თავი გაართვას. ახალგაზრდა ფეხბურთელისთვის ჯანმრთელად ყოფნა და რაც შეიძლება მეტი თამაში მნიშვნელოვანია”, - უთხრა მედიას საქართველოს ფეხბურთის ფედერაციის ვიცე-პრეზიდენტმა და სანაკრებო მიმართულების ხელმძღვანელმა, ალექსანდრე იაშვილმა.
საქართველოს 21-წლამდე ნაკრები 15 ნოემბერს, 21-წლამდე ევროპის ჩემპიონატის საკვალიფიკაციო რაუნდის პლეი-ოფის პირველ მატჩს მიხელ მესხზე გამართავს, ხოლო 19 ნოემბერს სტუმრად, ხორვატიის ქალაქ რიეკაში ჩავა.
