საქართველოში ახალი იტალიურ-ქართული საფეხბურთო სააგენტო New Way დაფუძნდა. კომპანიის ოფიციალურ პრეზენტაციაზე New Way-ის თანადამფუძნებელმა და აღმასრულებელმა დირექტორმა, დავით მორგოშიამ ქართული ფეხბურთის წარმატებულ სახეებზე ისაუბრა და აღნიშნა, რომ New Way ევროპულ საფეხბურთო სივრცეში ქართველი ტალანტების ადაპტაციას ხელს შეუწყობს.
კომპანიის წარდგენის შემდეგ, New Way-სა და ევროპულ საფეხბურთო სააგენტო First-ს შორის ურთიერთთანამშრომლობის მემორანდუმი გაფორმდა. შეთანხმებას ხელი New Way-ის თანადამფუძნებელმა და აღმასრულებელმა დირექტორმა, დავით მორგოშიამ და First-ის აღმასრულებელმა დირექტორმა, მარკო ბუზიელომ მოაწერეს.
„ურთიერთთანამშრომლობის მემორანდუმი გაფორმდა ევროპის ერთ-ერთ მოწინავე საფეხბურთო სააგენტოსთან, რაც ძალიან მნიშვნელოვანია ქართული ფეხბურთისთვის. მჯერა, ჩვენი შემართება დაგვეხმარება ახალი ქართველი ტალანტების აღმოჩენაში და შემდეგ ტოპ ჩემპიონატებსა და ტოკ კლუბებში რეალიზებაში. New Way-ს და First-ის სკაუტები უკვე ახორციელებენ დაკვირვებას რამდენიმე ფეხბურთელზე, არიან გამორჩეული ნიჭის მოთამაშეები, მათზე მაღალი მოთხოვნაა, სახელებისა და გვარების დასახელებისგან ამ დროისთვის თავს შევიკავებ, საუბარია პირველი და მეორე დონის იტალიურ კლუბებზე, ინგლისის საშუალო რანგისა და ბუნდესლიგის გუნდებზე, ასევე მოლაპარაკება გვაქვს დინამო ზაგრებთან,“ - განაცხადა New Way-ის თანადამფუძნებელმა და აღმასრულებელმა დირექტორმა, დავით მორგოშიამ.
პრეზენტაციას ცნობილი იტალიელი ვეტერანი ფეხბურთელი ფრანჩესკო კოკო დაესწრო, რომელმაც საქართველოში ახალი ტალანტების აღმოჩენის შესახებ ისაუბრა:
„მქონდა შესაძლებლობა დავკვირვებოდი ახალგაზრდა ფეხბურთლებს, ვგულისხმობ 12-14 წლის მოზარდებს, რადგან აღნიშნული ასაკი ძალიან მნიშვნელოვანია. მინდა ვთქვა, რომ საქართველოს ყოველთვის ყავდა სერიოზული ტალანტები, თუმცა ხვიჩა კვარაცხელიამ განსაკუთრებული ყურადღება მიიპყრო, რამაც საქართველოსა და ქართველი ფეხბურთელების მიმართ ინტერესი გააძლიერა. ჩვენს თანამშრომლობაში მნიშვნელოვანია ადგილობრივი პარტნიორი, სწორედ ამიტომ დავით მორგოშიასთან თანამშრომლება ძალიან კარგი იქნება. საქართველოს ამ დროისთვის მაღალი რანგის მოთამაშეები ჰყავს, ვგულისხობ იმ ფეხბურთელებს, რომლებიც ახლა ევროპის წამყვან გუნდებში თამაშობენ მაღალ დონეზე ასპარეზობენ.“ა
