Red Bull Padel Dash-ის სამოყვარულო ტურნირი დასკვნით ფაზაშია. შესარჩევი ეტაპი ოფიციალურად დასრულდა და მოთამაშეები ახლა ეროვნული ფინალისთვის ემზადებიან. გადამწყვეტი მატჩები 4 ივლისს, GymBreeze-ზე გაიმართება, სადაც ვაჟთა და ქალთა 8-8 გუნდი იასპარეზებს. პადელის ქართველ მოყვარულებს პირველად აქვთ შანსი მოიპოვონ Red Bull Padel Dash-ის მსოფლიო ფინალის საგზური და საქართველოს სახელით 20 ქვეყანას შორის იასპარეზონ. ორი გამარჯვებული წყვილი (1-1 ქალთა და ვაჟთა კატეგორიებიდან) ნოემბერში კატარში გაემგზავრება.
ტურნირი მოყვარული, B და C კატეგორიის მოთამაშეებისათვის არის განკუთვნილი და როგორც ქალთა, ისე ვაჟთა გუნდებს აერთიანებს. ტურნირში ჩართულები არიან სტუდენტებიც და მათთვის მონაწილეობა უფასოა.საერთო ჯამში შესარჩევ ეტაპზე 71 გუნდი და 142 მოყვარული მოთამაშე მონაწილეობდა. თამაშები სამ სხვადასხვა ლოკაციაზე გაიმართა და მატჩები კლასიკური ფორმატით, საქართველოს პადელის ფედერაციის საშეჯიბრო წესდების სტანდარტების მიხედვით მიმდინარეობდა.
ტურნირის მთავარი სანახაობა და გადამწყვეტი ბრძოლა საქართველოს ფინალში გაიმართება, სადაც 8-8 საუკეთესო წყვილი ერთმანეთის პირისპირ ითამაშებს. კულმინაციურ ეტაპზე უკვე Red Bull Padel Dash-ის წესები ამოქმედდება: მატჩები ოთხ კორტზე ერთდროულად იმართება. თამაში 16 ქულამდე ან 7 წუთის ამოწურვამდე გრძელდება. 16 ქულის აღებისთანავე, მოთამაშე აჭერს სპეციალურ წითელ ღილაკს და კორტებზე ერთმანეთის პარალელურად მიმდინარე ყველა თამაში მომენტალურად ჩერდება. გუნდებს ის ანგარიში უფიქსირდებათ, რა ქულებიც მატჩის გაჩერებისას ჰქონდათ. წითელი ღილაკის ამოქმედება კი ერთ დამატებით ქულას ნიშნავს. თითოეული ქულა მნიშვნელოვანია და საერთაშორისო ასპარეზობაზე გამგზავრების მსურველთა ბედს წყვეტს.
ეგნატე ნინოშვილის 64 ნომერში, GymBreeze-ზე კარი 16:00-ზე გაიხსნება. მონაწილეებთან ერთად კორტებზე მათი მხარდამჭერები შეიკრიბებიან. 18 :00-დან კორტებს ქალთა გუნდები დაიკავებენ. 20:30-დან კი გამარჯვებისათვის ერთმანეთს ვაჟთა გუნდები დაუპირისპირდებიან.
პადელი, საერთაშორისო მასშტაბით, სპორტის ერთ-ერთი ყველაზე სწრაფად მზარდი სახეობაა, რომელიც ჩოგბურთის და სქვოშის ელემენტებს აერთიანებს. მატჩები დახურულ, მინისკედლებიან კორტზე იმართება. სწრაფი და აზარტული თამაში საქართველოშიც სულ უფრო პოპულარული ხდება. ახლა კი უკვე ქვეყნის ფარგლებს გასცდება და Red Bull Padel Dash-ის მონაწილეებს შესაძლებლობას მისცემს თავი საერთაშორისო ასპარეზზე გამოსცადონ.
მანამდე Red Bull Padel Dash-ის სამოყვარულო ტურნირის მონაწილეები გულშემატკივარს ელოდებიან. დასწრება თავისუფალია.
