თბილისი პადელის სამოყვარულო ტურნირის Red Bull Padel Dash-ის მასპინძლობისათვის ემზადება. პადელის ქართველ მოყვარულებს პირველად აქვთ შანსი მოიპოვონ Red Bull Padel Dash-ის მსოფლიო ფინალის საგზური და საქართველოს სახელით 20 ქვეყანას შორის იასპარეზონ. დიდ სპორტულ თავგადასავალში მონაწილეობისათვის შესარჩევ ეტაპზე რეგისტრაცია უკვე ოფიციალურად დაიწყო.
ტურნირი მოყვარული, B და C კატეგორიის მოთამაშეებისათვის არის განკუთვნილი და როგორც ქალთა, ისე ვაჟთა გუნდებს აერთიანებს. მონაწილეობა შეუძლია ნებისმიერ პირს 18 წლიდან, რომელსაც საქართველოს მოქალაქეობა აქვს. შეჯიბრების მონაწილეები წყვილთა თანრიგში იასპარეზებენ. მსოფლიო ფინალზე 2 წყვილი გაემგზავრება (1-1 ქალთა და ვაჟთა კატეგორიებიდან).
Red Bull Padel Dush, რომელიც საქართველოში პირველად ტარდება ორი ნაწილისგან, - შესარჩევი ეტაპების და ეროვნული ფინალისგან შედგება. შესარჩევი თამაშები 4 სხვადასხვა ლოკაციაზე (კუს ტბა პადელი, პადელბადე დიღომი სტუდენტებისათვის, ჰიგს პადელი და პადელბადე კრწანისი) გაიმართება. მატჩები კლასიკური ფორმატით, საქართველოს პადელის ფედერაციის საშეჯიბრო წესდების სტანდარტების მიხედვით ჩატარდება. აღსანიშნავია, რომ სტუდენტებისათვის ტურნირში მონაწილეობა უფასოა.
ტურნირის მთავარი სანახაობა და გადამწყვეტი ბრძოლა საქართველოს ფინალში გაიმართება, სადაც 8-8 საუკეთესო წყვილი ერთმანეთის პირისპირ ითამაშებს. კულმინაციურ ეტაპზე უკვე Red Bull Padel Dash-ის წესები ამოქმედდება: ყველა შეხვედრა ერთდროულად იწყება და მთავრდება. თამაში იქამდე გრძელდება, სანამ ერთ-ერთი გუნდი 16 ქულას არ დააგროვებს. 16 ქულის აღებისთანავე, მოთამაშე აჭერს სპეციალურ წითელ ღილაკს და კორტებზე ერთმანეთის პარალელურად მიმდინარე ყველა თამაში მომენტალურად ჩერდება. თითოეული ქულა მნიშვნელოვანია და საერთაშორისო ასპარეზობაზე გამგზავრების მსურველთა ბედს წყვეტს.
საქართველოს ფინალი GymBreeze-ზე, 27 ივნისს 18 საათზე გაიმართება. Red Bull Padel Dash-ის მსოფლიო ტურნირს კი მიმდინარე წლის ნოემბერში ყატარი უმასპინძლებს.
პადელი, საერთაშორისო მასშტაბით, სპორტის ერთ-ერთი ყველაზე სწრაფად მზარდი სახეობაა, რომელიც ჩოგბურთის და სქვოშის ელემენტებს აერთიანებს. მატჩები დახურულ, მინისკედლებიან კორტზე იმართება. სწრაფი და აზარტული თამაში საქართველოშიც სულ უფრო პოპულარული ხდება. ახლა კი უკვე ქვეყნის ფარგლებს გასცდება და Red Bull Padel Dash-ის მონაწილეებს შესაძლებლობას მისცემს თავი საერთაშორისო ასპარეზზე გამოსცადონ.
შესარჩევი ეტაპი:
30-31 მაისი - კუს ტბა პადელი (მიმდინარობს რეგისტრაცია )
6-7 ივნისი პადელბადე დიღომი (მიმდინარეობს რეგისტრაცია ქალთა და ვაჟთა კატეგორიებში)
13-14 ივნისი ჰიგს პადელი
20-21 ივნისი პადელბადე კრწანისი
საქართველოს ფინალი:
27 ივნისი, 18:00 სთ, GymBreeze
დეტალური ინფორმაცია ტურნირში მონაწილეობის და წესების შესახებ
