რეალ მადრიდში მომდევნო სეზონისთვის მზადება აქტიურად დაიწყეს. როგორც ესპანურ პრესაში იწერება, ჟოზე მოურინიო მუშაობას უკვე შეუდგა და კლუბს მისი მოთხოვნების შესახებ აცნობა. პორტუგალიელმა სპეციალისტმა 3-4 ახალი მოთამაშის დამატება მოითხოვა, საიდანაც ერთ-ერთი აუცილებლად მარჯვენა მცველი უნდა იყოს.
ესპანურ პრესას თუ დავუჯერებთ, მარჯვენა მცველის პოზიციაზე ამ ეტაპზე სამი კონკრეტული კანდიდატი გამოიკვეთა. გავრცელებული ინფორმაციით, სამეფო კლუბის ინტერესის სფეროში არიან ინტერის ერთ-ერთი ლიდერი დენზელ დუმფრისი, ტოტენჰემის ფეხბურთელი პედრო პორო და სპორტინგის ახალგაზრდა უკანახაზელი ივან ფრესნედა.
დუმფრისი ინტერის დატოვებას სერიოზულად განიხილავს, რასაც მისი გამოსასყიდი თანხაც ემატება, რომელიც საქმეს ბევრად ამარტივებს. ნიდერლანდელი ფეხბურთელის კონტრაქტში გამოსასყიდი თანხა €20 მილიონი წერია.
რეალ მადრიდის გარდა, დუმფრისით სხვა ევროპული კლუბებიც ინტერესდებიან.
პედრო პოროს შემთხვევა გაცილებით რთულია — ტოტენჰემი ესპანელი მცველის შენარჩუნებას გეგმავს და მის გაყიდვას არ აპირებს, რის გამოც ტრანსფერის განხორციელება მხოლოდ ძალიან მაღალი შეთავაზების შემთხვევაში შეიძლება გახდეს შესაძლებელი
რაც შეეხება ივან ფრესნედას, ახალგაზრდა ესპანელი მადრიდელთა გრძელვადიან გეგმებში ჯდება და კლუბის სკაუტებმა მასზე დაკვირვება უკვე დაიწყეს. სპორტინგი მის გაშვებას მხოლოდ იმ შემთხვევაში განიხილავს, თუ სასურველ ფინანსურ წინადადებას მიიღებს.
ზაფხულის სატრანსფერო ფანჯრის მოახლოებასთან ერთად, რეალ მადრიდის პოტენციურ ტრანსფერებზე უფრო მეტი ინფორმაცია გახდება ცნობილი.
