პირველი ნახევარი ნულოვანი ფრით დასრულდა, შეხვედრაში გასული სამივე გოლი კი მეორე ტაიმში ვიხილეთ - ჩვენი გუნდი აქტიური იყო, თუმცა მომენტების რეალიზაცია უჭირდა, შედეგად, ანდორამ ისარგებლა და შეხვედრაში ანგარიში 69-ე წუთზე გახსნა, რასაც 83-ე წუთზე ჯერ მაიკო ბებიას ზუსტად შესრულებული თერთმეტმეტრიანი მოჰყვა, ხოლო 87-ე წუთზე, წინ თეონა ბაქრაძის გოლით გავედით.
საქართველოს ქალთა ეროვნულ ნაკრებს საერთო სცენარის შესაცვლელად და გამარჯვებისთვის მხოლოდ 4 წუთი დასჭირდა.
ჩვენს გუნდს შესარჩევი ციკლის მომდევნო მატჩი რამდენიმე დღეში, 25 თებერვალს, სტუმრად - კვიპროსში, თბილისის დროით 21:00 საათიდან ელის.
შეგახსენებთ, რომ C ლიგა 6 ჯგუფისგან შედგება. B ლიგის საგზურს ჯგუფების გამარჯვებულები მოიპოვებენ. 2 საუკეთესო მეორეადგილოსანი დაწინაურების დამატებით შანსს მიიღებს და პლეი-ოფში B ლიგის მესამეადგილოსანს დაუპირისპირდება.
შენიშვნა: მასალაში გამოყენებულია საქართველოს ფეხბურთის ფედერაციის ფოტოები
