საქართველოს 21-წლამდე ნაკრებში ნათამაშები წარმატებული მატჩების შემდეგ, ნოდარ ლომინაძე კარიერას პორტუგალიის ჩემპიონატში, ეშტორილში გააგრძელებს.
ლომინაძემ ახალ კლუბში სადებიუტო მატჩები უკვე ჩაატარა და ეშტორილის მიერ გამართულ ორივე შეხვედრაში ძირითად შეამდგენლობში იყო.
LaGazzetta.ge ლომინაძეს დაუკავშირდა და ინტერვიუ ჩაწერა.
პორტუგალიის ჩემპიონატში სადებიუტო თამაშები ჩაატარე, როგორ მიდის შენი ადაპტაცია ახალ კლუბში?
"პირველი თამაში რთული გამოვიდა. მაღალი ინტენსივობა და მაღალი სიჩქარეები ჩემთვის ახალი იყო. ვფიქრობ, ნორმალური დებიუტი მქონდა. პირველ ტაიმში კონტრშეტევის ჩაშლის გამო ყვითელი ბარათი მომცეს, რის შემდეგაც რამდენიმეჯერ დავჯარიმდი და მწვრთნელმა ჩემი მოედანზე დატოვება აღრ გარისკა, რადგან ჩემი სტილი აგრესიული თამაშია."
რას გვეტყვი გუნდში შექმნილ ვითარებაზე, ვარჯიშებსა და თანაგუნდელებთან კომუნიკაციაზე?
"ყველა ცდილობს დამეხმაროს - ეს იქნება ფეხბურთელი, მწვრთნელი თუ სტაფის წევრი. ყველა მათგანში ვგრძნობ თბილ დამოკიდებულებას ჩემს მიმართ, რაც ყველაზე მეტად მომწონს ისაა, რომ ტიპიურ 8 ნომერზე მათამაშებს, შეტევაშიც ვერთვები თავისუფლად და საყრდენის მოვალეობასაც ვითავსებ, ვარჯიშების ტემპი მაღალია. ფიზ.მომზადების მწვრთნელიც ბევრ რამეში მეხმარება და კმაყოფილი ვარ."
....ანუ შენთვის ყველაზე კომფორტული 8 ნომრის პოზიციაა?
"ჩემთვის კომფორტულია როგორც 8 ნომერი, ასევე 6. ამ ორ პოზიციაზე თავს თანაბრად კარგად ვგრძნობ და ეს ჩემთვის ძალიან კომფორტულია."
ლეგიონერის სტატუსი პირველად მოირგე. უცხო ქვეყანაში დამკვიდრება ბევრისთვის ადვილი არ არის, როგორია შენს შემთხვევაში?
"გეთანხმებით, ძალიან რთულია. სულ მქონდა იმის განცდა, რომ წასვლის ,,მეშინოდა” და უცხო გარემოს ვერ შევეგუებოდი, მაგრამ შემოთავაზება რომ მივიღე, პორტუგალიისკენ გული მიმიწევდა და გამიმართლდა კიდეც. ძალიან თბილი და სტუმართმოყვარე ხალხია, რითიც ქართველებს მაგონებს.,მომწონს ქალაქი, მომწონს გუნდი, მომწონს ხალხი და ხალხის დამოკიდებულება ფეხბურთელების მიმართ. აქ თავს კარგად ვგრძნობ."
როგორია შენი ყოველდღიურობა პორტუგალიაში?
"ვარჯიშები ძირითადად დილით გვაქვს. შუადღის 3 საათისთვის უკვე სახლში ვარ, ვისვენებ, ვმეცადინეობ პორტუგალიურს და საღამოს ვსეირნობ სანაპიროსთან ახლოს."
როგორც ვიცით, ხელის ოპერაცია გაიკეთე, ამჟამად რა მდგომარეობაში გაქვს?
"ჯერ მოტეხილი მქონდა, შემდეგ ოპერაცია გავიკეთე. ცოტა ძალის ნაკლებობას ვუჩივი მარცხენა ხელში, მაგრამ რეაბილიტაციის შემდეგ ესეც გამოსწორდება. აგვისტოს ბოლოს კონსულტაცია მაქვს ექიმთან და თუ ყველაფერი კარგად იყო, დამცავის გარეშეც ვითამაშებ."
ზოგადად ცენტრალური ნახევარმცველისთვის გოლის ალღო იშვიათი თვისებაა, თანამედროვე ფეხბურთში კი ეს საჭიროა. შენ ეს თვისება გაქვს, საიდან გამოიმუშავე თვისება, რომელიც შენთვის დიდი პლიუსია?
"სიმართლე გითხრათ, არვიცი როგორ გამოვიმუშავე. ალბათ, რასაც ვშრომობდი, ეს გოლები უბრალოდ აფასებს ამ ყველაფერს. გეთანხმებით, გოლის გატანა ჩემთვის ძალიან დიდი პლიუსია."
21-წლამდე ნაკრებში შენი ასპარეზობა ევროპის ჩემპიონატზე დასრულდა, სადაც დიდი კვალი დატოვე, რა მოგცა ამ ნაკრებმა?
"ვისარგებლებ და მადლობას ვეტყვი კიდევ ერთხელ რამაზ სვანაძეს და მის სტაფს. ჩვენ ერთი დიდი ოჯახი ვართ. არ აქვს მნიშვნელობა, დავასრულეთ თუ არა 21-წლამდე ასაკი, ჩვენ სულ ერთი ოჯახი ვიქნებით. ჩემთვის ეს პერიოდი ძალიან კარგი იყო. ჩემი თავის დავიჯერე, უფრო თამამი გავხდი, ბევრი რამ ტაქტიკურადაც ვისწავლე და რაც მთავარია, ვისწავლე ის, როგორ უნდა თქვა შენს ხასიათზე უარი, რადგან ეს ისევ შენ გაზარალებს. ვთვლი, რომ ამ ყველაფრის და 21-წლამდელებში გატარებული პერიოდის შემდეგ, ფეხბურთელად ჩამოვყალიბდი. მადლობა ყველა იმ ფეხბურთელს, ვინც ამ პერიოდში ნაკრებში ერთხელ მაინც იყო. ჩვენ ერთმანეთისგან ვსწავლობდით და ყველანი ჩემს გულში დარჩებიან."
შემდეგი ნაბიჯი უკვე ეროვნული ნაკრებია...
"რა თქმა უნდა, ნაკრებში მოხვედრა ყველას ოცნებაა, მათ შორის ჩემიც. იმედია, ამ ოცნებას მალე ავისრულებ, თუ არადა, უფრო მეტს ვიშრომებ, რომ მომავალში იქ ყოფნა დავიმსახურო."
ეროვნულ ნაკრებს სექტემბერში მნიშვნელოვანი მატჩები ელის. როგორ შეაფასებდი შანსებს?
"თურქეთს კარგი ნაკრები ჰყავს, ტოპ ლიგებში თამაშობენ, მაგრამ ჩვენი ბიჭები მათზე უკეთესები არიან, ისინი ლამაზ ფეხბურთს თამაშობენ და პროგრესიც სახეზეა. მჯერა, რომ არამარტო სექტემბრის თამაშებში, არამედ შემდეგ მატჩებშიც კარგად წარმოვაჩენთ თავს, მსოფლიო ჩემპიონატზე გავალთ და კიდევ ერთ ისტორიას დავწერთ!"
წარმატებული მატჩების და კარიერული პროგრესის შემდეგ, უკვე გულშემატკივარიც ბევრი გყავს...
"მადლობა ყველა გულშემატკივარს. სადაც არ უნდა ვიყო, მათ თანადგომას ყოველთვის ვგრძნობ. ჩემი გულშემატკივარი ძალიან მიყვარს და ვპირდები, რომ თქვენი ლომინა თავდადებას, შრომას და თქვენი გულების გახარებას გააგრძელებს."
