პარი სენ-ჟერმენში მომდევნო სეზონისთვის მზადებას აქტიურად აგრძელებენ. როგორც ფრანგულ პრესაში იწერება, პარიზელები ზაფხულის სატრანსფერო ფანჯრის დროს 3-4 ახალი ფეხბურთელის დამატებას გეგმავენ, მათ შორის კი ერთ-ერთი პრიორიტეტი აუცილებლად ახალი ვინგერია.
ლუიშ კამპუშის სიაში რამდენიმე მოთამაშეა, თუმცა ლუის ენრიკეს მთავარი ფავორიტი მონაკოს 24 წლის ფრანგი მარჯვენა ვინგერი მაგნე აკლიუშია.
დადასტურებით შეიძლება ითქვას, რომ პარი სენ-ჟერმენი მონაკოს ერთ-ერთი გამორჩეული ფეხბურთელის მიმართ სერიოზულ ინტერესს იჩენს. მეტიც, ფეხბურთელის აგენტთან უკვე შედგა პირველი კონტაქტი, სადაც მხარეებმა პოტენციური ტრანსფერის საკითხი განიხილეს.
მაგნე აკლიუშის მიმართ ინტერესს სხვა ტოპ კლუბებიც იჩენენ, მათ შორის მანჩესტერ სიტიც, თუმცა პარიზელები ყველაფერს გააკეთებენ, რათა კონკურენტებს დაასწრონ და გარიგება რაც შეიძლება სწრაფად დახურონ.
24 წლის ფრანგ შემტევს მონაკოსთან კონტრაქტი 2028 წლამდე აკავშირებს, მისი სატრანსფერო ღირებულება კი დაახლოებით €60–65 მილიონს შეადგენს. ზაფხულის სატრანსფერო ფანჯრის მოახლოებასთან ერთად, მაგნე აკლიუშის მომავალთან დაკავშირებით უფრო მეტი დეტალი გახდება ცნობილი.
