გაგრამ და დილამ დავით პეტრიაშვილის სახელობის სტადიონზე, ნულოვანი ფრით (0-0) ქულები გაიყვეს, იდენტური ანგარიში დაფიქსირდა მესხი 2-ზეც, სადაც უმაღლესი ლიგის დებიუტანტმა საგარეჯოს გარეჯმა დინამო ბათუმს უმასპინძლა (0-0). 2025 წლის საფეხბურთო სეზონში კახური გუნდი საშინაო მატჩებს, საგარეჯოს ნაცვლად, სწორედ მიხეილ მესხის სათადარიგო მოედანზე ჩაატარებს.
დრამატული გამოვიდა მატჩი დინამო არენაზე, სადაც დინამო თბილისმა წყალტუბოს სამგურალს უმასპინძლა. მატჩში 3 გოლი გავიდა და დინამო თბილისის გამარჯვებით, ანგარიშით - 2-1 დასრულდა.
შეხვედრაში ანგარიში მე-10 წუთზე, ნოდარ ლომინაძის გადაცემის შემდეგ, ირაკლი იაკობიძემ გახსნა. მე-14 წუთზე თერთმეტმეტრიანი, რომელიც დავით მუჯირმა შეასრულა, მიხეილ მაქაცარიამ მოიგერია. 60-ე წუთზე, დინამო თბილისის კარში მეორე პენალტი დაინიშნა და ამჯერად, ბურთთან ლუკა ხორხელი მივიდა, თუმცა მაქაცარიამ დინამო თბილისის გადარჩენა ვეღარ შეძლო.
90+5 წუთამდე, შეხვედრაში ფრე ფიქსირდებოდა, თუმცა დინამო თბილისმა გაიბრძოლა და 3 ქულის გადარჩენა ნიკა ნინუას შორეული გასროლის შედეგად მოახერხა.
საინტერესოა, რომ ეროვნული ლიგის მეორე ტურში, დინამო თბილისის განაცხადში შესული ოცივე ფეხბურთელი თავად კლუბის აკადემიის აღზრდილი იყო, რაც ქართული ფეხბურთისა და ტურნირის ისტორიაში, პირველად მოხდა. სამგურალთან მატჩში, უმაღლეს ლიგაში დინამო თბილისის მაისურით დებიუტი ჰქონდა: ნიკოლოზ ჩიქოვანს, ლუკა წულაიას, გელა სადღობელაშვილს, თეიმურაზ ოდიკაძესა და საბა ახალკაცს.
საქართველოს ეროვნული ლიგის 2025 წლის სეზონი 1 მარტს განახლდა, თუმცა დასავლეთ საქართველოში არსებული დიდთოვლობისა და უამინდობის მიზეზით, დინამო თბილისს დინამო ბათუმთან დაგეგმილი მატჩი 1 აპრილისთვის გადაედო.
შესაბამისად, აღნიშნული მატჩი, თბილისური გუნდისთვის 2025 წლის სეზონში პირველი იყო.
ბოლოს, ინფორმაციისთვის გეტყვით, რომ ეროვნული ლიგის მე-3 ტური 9 მარტს დაიწყება - ქუთაისის ტორპედო თელავს რამაზ შენგელიას სახელობის სტადიონზე, 20:00 საათიდან უმასპინძლებს.
შენიშვნა: მასალა შეიცავს დინამო თბილისის ფოტოს
