შეხვედრაში ანგარიში ჩვენმა გუნდმა ძალიან სწრაფად, მე-7 წუთზე, კაპიტნის - საბა გეგუჩაძის გოლით გახსნა და აქტიურიც იყო, თუმცა მეორე ტაიმი განსხვავებული გამოვიდა. მეტოქემ 58-ე და 88-ე წუთებზე მათე საურის კარი აიღო, აქტივში 3 ქულა ჩაიწერა და 19-წლამდე ნაკრებების 2025 წლის ევროპის ჩემპიონატის საგზური მოიპოვა, რომელიც 13-26 ივნისს, რუმინეთში შედგება.
იმ შემთხვევაში, თუ საქართველოს 19-წლამდე ნაკრები მონტენეგოს დამარცხებას შეძლებდა, პარალელურად მიმდინარე შეხვედრაში პოლონეთს სლოვაკეთისთვის არ უნდა მოეგო, თუმცა ამ შემთხვევაშიც უიმედო სურათი გვქონდა, ვინაიდან, სლოვაკეთი პირველი ტაიმის ბოლოს 10 კაცით დარჩა, პოლონეთმა კი შეხვედრა, დავით პეტრიაშვილის სახელობის მოედანზე, ორბურთიანი სხვაობით მოიგო (2-0).
ჯგუფიდან ფინალურ ეტაპზე გასვლას მხოლოდ პირველადგილოსანი ნაკრები შეძლებდა. ეს მონტენეგრომ, 7 ქულით მოახერხა, 6 ქულა პოლონეთს აქვს, 3 ქულა საქართველოს, ხოლო 1 ქულა - სლოვაკეთს.
შეგახსენებთ, რომ ლაშა ფირცხალაიშვილის გუნდმა, ელიტ-რაუნდის საგზური შვედეთში გამართულ საკვალიფიკაციო რაუნდში მოიპოვა, სადაც მასპინძელი შვედეთის დამარცხებისა და ესტონეთთან ნათამაშები ფრის შემდეგ, ჯგუფიდან გასვლა 4 ქულით შეძლო.
შენიშვნა: მასალა შეიცავს საქართველოს ფეხბურთის ფედერაციის ფოტოს
