ლივერპულმა მეკარეების საკითხთან დაკავშირებით საბოლოო გადაწყვეტილება მიიღო — მერსისაიდულმა კლუბმა ალისონ ბეკერის შენარჩუნება გადაწყვიტა, მიუხედავად იმისა, რომ ბოლო კვირებში ბრაზილიელი კიპერის მიმართ დიდ ინტერესს იუვენტუსი იჩენდა. ინგლისური მედიის ინფორმაციით, "წითლები“ გამოცდილ ფეხბურთელს გუნდის ერთ-ერთ მნიშვნელოვან ფიგურად მიიჩნევენ და მის გაყიდვას არ განიხილავენ.
როგორც ზემოთ მოგახსენეთ, განსაკუთრებულ ინტერესს ალისონის მიმართ ტურინის იუვენტუსი იჩენდა. იტალიური კლუბი ზაფხულის სატრანსფერო ფანჯრის დროს მეკარის დამატებას აქტიურად გეგმავს და #1 სამიზნე სწორედ ბრაზილიელი კარის დარაჯი იყო, თუმცა ლივერპულმა "ბიანკონერის“ უკვე აცნობა, რომ 33 წლის ფეხბურთელი არ იყიდება.
რაც შეეხება გიორგი მამარდაშვილს, ქართველი მეკარის მომავალი ჯერ საბოლოოდ გადაწყვეტილი არ არის. გავრცელებული ინფორმაციით, ლივერპული არ გამორიცხავს, რომ 25 წლის კიპერმა მომდევნო სეზონი იჯარის წესით სხვა კლუბში გაატაროს, რათა რეგულარული სათამაშო დრო მიიღოს. მამარდაშვილის მიმართ ინტერესი ყოველდღიურად იზრდება, მეტიც — ალისონის მსგავსად, ისიც ტურინის იუვენტუსს დაუკავშირეს, თუმცა ამ მომენტისთვის მეტი არაფერი ხდება. უახლოეს კვირებში ქართველი მეკარის მომავალთან დაკავშირებით კიდევ უფრო მეტი დეტალი გახდება ცნობილი.
