დაანონსდა, რომ ახალგაზრდული ნაკრები 17-25 მარტს, თურქულ შეკრებას ანტალიაში გაივლის, სადაც 2025 წლის ევროპის ჩემპიონატის მზადების პროცესში, 2 ამხანაგურ შეხვედრას ჩაატარებს: პირველი მეტოქე ცნობილია - ფინეთი, მატჩი 22 მარტს შედგება, ხოლო მეორე ამხანაგური შეხვედრის შესახებ ინფორმაცია ცნობილი მოგვიანებით გახდება.
ასევე, სიახლეა ისიც, რომ საქართველოს ეროვნული ნაკრების ვეტერანი, გიორგი დეკანოსიძე, რომელიც 10 წელზე მეტია, რაც სამწვრთნელო საქმიანობაში აქტიურად არის ჩართული, ევროპის ჩემპიონატის მოსამზადებელი ეტაპის წინ, რამაზ სვანაძის სამწვრთნელო შტაბს შეუერთდება და გიორგი ადამიასთან და ზაურ სვანაძესთან ერთად, მთავარი მწვრთნელის ერთ-ერთი ასისტენტის პოზიციას დაიკავებს.
გიორგი დეკანოსიძე: “მიხარია, რომ დღეს იმ გუნდის წევრი გავხდი, რომელიც მონაწილეობას ზაფხულში, კონტინენტის ერთ-ერთ საუკეთესო საფეხბურთო ფორუმზე მიიღებს და იმედი მაქვს, რომ გუნდს დასახული მიზნების მიღწევაში დავეხმარები. ჩემდამი ნდობისთვის, გუნდის მთავარ მწვრთნელს, რამაზ სვანაძეს და ფეხბურთის ფედერაციის ხელმძღვანელობას მინდა, რომ მადლობა გადავუხადო”, - დეკანოსიძის კომენტარს საქართველოს ფეხბურთის ფედერაცია ავრცელებს.
21-წლამდე ნაკრებების ევროპის ჩემპიონატი 2025 წლის 11 ივნისიდან 28 ივნისის ჩათვლით, სლოვაკეთის 8 ქალაქის 8 სტადიონზეა დაგეგმილი.
შენიშვნა: მასალაში გამოყენებულია საქართველოს ფეხბურთის ფედერაციის ფოტოები
