პარი სენ-ჟერმენში მომდევნო სეზონისთვის მზადებას აქტიურად შეუდგნენ. თუ გავლენიან ფრანგულ წყაროებს დავუჯერებთ, ლუიშ კამპუში არსებული შემადგენლობის სერიოზულ გაძლიერებას გეგმავს და ეს პირველ რიგში, შეტევის ხაზს ეხება.
როგორც იწერება, პსჟ-ს მინიმუმ სამი შემტევი დატოვებს, კერძოდ: გონსალუ რამუში (კარიერას მილანში გააგრძელებს), კანგ-ინ ლი (ახლოსაა ატლეტიკო მადრიდში გადასვლასთან) და რანდალ კოლო მუანი (ახლოსაა იუვენტუსში დაბრუნებასთან). ეს კი იმას ნიშნავს, რომ პარიზული კლუბი მინიმუმ ორ ახალ შემტევს დაიმატებს.
რამდენიმე საათის წინ, როგორც უკვე გაცნობეთ, პირველი ფეხბურთელი, რომელიც შესაძლოა პარიზულ კლუბში გადაბარგდეს, იან დიომანდეა. ფეხბურთელთან პირადი კონტრაქტის დეტალები უკვე შეთანხმებულია, უახლოეს დღეებში კი პსჟ ლაიფციგთან ტრანსფერის დახურვას შეეცდება. რაც შეეხება მეორე მოთამაშეს, ლუიშ კამპუში მანიე აკლიუშის ტრანსფერზეც აქტიურად მუშაობს. მონაკოს შემტევი დიომანდეს ალტერნატივა არ არის და ლუის ენრიკეს ორივე მათგანის დამატება სურს.
რაც შეეხება ბრედლი ბარკოლას, ძალიან დიდია იმის ალბათობა, რომ ფრანგმა ფეხბურთელმა პსჟ მიმდინარე სატრანსფერო ფანჯრის დროს დატოვოს. იმის ფონზე, რომ მხარეები ახალ კონტრაქტზე შეთანხმებას ვერ ახერხებენ, პარიზული კლუბი 23 წლის ვინგერის გაყიდვას სერიოზულად განიხილავს. ფრანგი შემტევით უკვე რამდენიმე კლუბი ინტერესდება, თუმცა მათ შორის ყველაზე აქტიური ლივერპულია.
ხვიჩა კვარაცხელია, უსმან დემბელე და დეზირე დუე ახალი შემტევების მოლოდინში არიან და თუ ყველაფერი გეგმის მიხედვით წარიმართა, დიომანდე და აკლიუში მომდევნო სეზონში პარიზული კლუბის მაისურს მოირგებენ.
