მიხაილო მუდრიკი ფეხბურთს ოფიციალურად დაუბრუნდა და ჩელსის პრე-სეზონურ შეკრებასაც შეუერთდა, თუმცა ეს სულაც არ ნიშნავს, რომ უკრაინელი ახალ სეზონს ლონდონურ კლუბში დაიწყებს. ინგლისური მედიის ინფორმაციით, მისი მომავალი კვლავ ბუნდოვანია და ჩელსის უფროსობა სხვადასხვა ვარიანტს განიხილავს.
არსებული ინფორმაციით, "ლურჯები“ მზად არიან 25 წლის გარემარბი როგორც იჯარით გაუშვან, ისე სრულფასოვანი ტრანსფერითაც გაყიდონ. კლუბში მიიჩნევენ, რომ ფეხბურთელს რეგულარული სათამაშო პრაქტიკა სჭირდება, შესაბამისად, დიდი შანსია უკრაინელმა მიმდინარე თვეში ჩელსი დატოვოს.
მუდრიკს უკვე უკავშირებენ სტრასბურგსა და ქოვენთრის, თუმცა მოსალოდნელია, რომ უახლოეს პერიოდში სხვა კლუბებიც გააქტიურდებიან. უკრაინელის მოედანზე დაბრუნების შემდეგ სატრანსფერო ბაზარზე ინტერესი გაიზარდა, რაც იმას ნიშნავს, რომ უახლოეს კვირებში მუდრიკის თაობაზე უფრო მეტ დაზუსტებულ ინფორმაციას გავიგებთ.
