La Gazzetta Georgia-ს ინფორმაციით, დაინტერესებამ სერიოზული სახე მიიღო და ბოლო ინფორმაციით, გიორგის სამომავლო კარიერასთან დაკავშირებული საკითხები სეზონის ბოლომდე უნდა გაირკვეს. გიორგი ჩუბინიძის მენეჯერი ბენფიკას წარმომადგენლებს უკვე შეხვდა. გაცნობითი ხასიათის შეხვედრა და პირველადი მოლაპარაკებები მადრიდში გაიმართა, საპასუხოდ კი ბენფიკამ ინგლისში, გიორგისთვის თვალის მისადევნებლად, სკაუტები გაამგზავრა. საბოლოო დეტალების შეთანხმება დაგეგმილი მიმდინარე წლის აპრილის ბოლოსაა. ტრანსფერის სავარაუდო თანხა €1.5 მილიონია.
აღსანიშნავია, რომ მიუხედავად ბენფიკას აქტიურობის, ჩუბინიძის ტრანსფერთან დაკავშირებით ინტერესს მადრიდის ატლეტიკო კვლავ ინარჩუნებს.
გიორგი ჩუბინიძემ საქართველოს ასაკობრივი ნაკრების ფორმა 14 წლის ასაკში მოირგო. ამ დრომდე, ფეხბურთელმა საქართველოს 17-წლამდე ნაკრებში 5 ამხანაგური და 6 ოფიციალური შეხვედრა ჩაატარა, ჯამურად 410 წუთი ითამაშა და 1 გოლი გაიტანა.
გასულ წელს, სეზონის განახლებამდე 1 წლით ადრე, 17 წლის ჩუბინიძემ ბორნმუთის U18-ის სკოლარშიპი მიიღო, რომლის გათვალისწინებითაც მიმდინარე საფეხბურთო სეზონში უნაზღაურდება ცხოვრების ხარჯები, უზრუნველყოფილია განათლება და ხელფასი.
ფეხბურთელს ორმაგი მოქალაქეობა აქვს - საქართველოს და პორტუგალიის. გიორგის მამა ქართველია - თორნიკე ჩუბინიძე, დედა პორტუგალიელი - კარლა გონსალვესი და ასევე, ჰყავს 4 წლით უფროსი ძმა.
