BMF-ის სიმბოლური ტიტული, რომლის ბოლო სამი მფლობელი არიან ჩარლზ ოლივეირა, მაქს ჰოლოუეი და ჯასტინ გეიჯი. რა აერთიანებს ამ სამეულს? ილია თოფურიამ მოუგო ჰავაელ და ბრაზილიელ ჩემპიონებს, ამერიკელ მსუბუქწონოსანთან ჩხუბი კი მას ელის 15 ივნისს, თეთრ სახლში, UFC Freedom 250-ზე.
"ჰაილაითის" დამარცხების შემთხვევაში, ქართველი ჩემპიონის ანგარიშზე BMF-ის ქამრის ბოლო სამ მფლობელთან გამარჯვება იქნება. მსგავსი მიღწევა მსოფლიოს მთავარ პრომოუშენში არავის აქვს. იქვე ახლოს არის დასტინ პორიე, რომელმაც თავის დროზე მოუგო "კურთხეულსა" და გეიჯის, მაგრამ წააგო "დუ ბრონქსთან".
გამოსარჩევია ისიც, რომ ამერიკელი ყოფილი მებრძოლი კარიერის მიწურულს ორივესთან დამარცხდა. რაც შეეხება "ელ მატადორს", მას საერთოდ არ წაუგია და ჯასტინთან მოგების შემდეგ, ის იზეიმს მე-18 გამარჯვებას, უშუალოდ მსოფლიოს მთავარ პრომოუშენში კი ზედიზედ მეათეს.
