ლანჩხუთმა მეტოქესთან ორივე ტაიმი წააგო: ორი გოლი პირველივე ტაიმის მიწურულს, დაახლოებით 6 წუთის ინტერვალში გაუშვა, მეორე ნახევარში ტაბლოზე ნაჩვენები ანგარიშის შეცვლა ვეღარ შეძლო და საბოლოოდ, მესამე ბურთი 82-ე წუთზე მიიღო (3-0).
ნომინალური მასპინძელი ალბანური გუნდი იყო, თუმცა მატჩი ქუთაისის რამაზ შენგელიას სახელობის სტადიონზე შედგა.
მატჩების მასპინძელი საქართველო გახლავთ. ქუთაისის პარალელურად წყალტუბოში, შეხვედრა ავსტრიული სტ.პოლტენსა და ბაქოს ნეფთჩის შორის მიმდინარეობდა, რომელიც ვლაჟნია-ლანჩხუთის წყვილში გამარჯვებულების მეტოქეს არკვევდა. დაპირისპირება ავსტრიული გუნდის სრული დომინირებით წარიმართა, რომელმაც ბაქოს ნეფთჩის 5 უპასუხო გოლი გაუტანა (5-0).
გათამაშების ფორმატის მიხედვით, ფინალურ ეტაპზე ვლაჟნიასა და სტ.პოლტენის შეხვედრას ვიხილავთ. მატჩს კვლავ საქართველო, 7 სექტემბერს უმასპინძლებს.
შენიშვნა: მასალაში გამოყენებულია საფეხბურთო კლუბ ლანჩხუთის ფოტო
