ლაცაბიძეს 21-წლამდე ნაკრების მთავარი მწვრთნელი, რამაზ სვანაძე ქვეყნის რანგით მეორე ნაკრებში სისტემატურად იძახებს.
დონეცკის შახტარმა ლუკა ლაცაბიძე ოდესის ჩერნომორეცში გასული წლის სექტემბერში გაანათხოვრა. მას შემდეგ, ლუკასთვის ბევრი რამ მოხდა: ისტორიულ პლეი-ოფებში უდიდესი სამუშაო გასწია და შეუცვლელი იყო - საქართველოს ახალგაზრდულ ნაკრებთან ერთად ევროპის 2025 წლის ჩემპიონატზე გავიდა და კლუბთან ერთადაც, წლის ბოლო მატჩები ასევე შეუცვლელად ითამაშა, რის შემდეგაც, მედიასთან ჩერნომორეცის მთავარი მწვრთნელის შექება საჯაროდ დაიმსახურა:
“გუნდში იჯარით 6 ფეხბურთელი გვყავს, მათ შორის ყველაზე დიდი პროგრესი ლუკა ლაცაბიძემ აჩვენა.
ლუკას უკრაინის პრემიერლიგაში თამაშის გამოცდილება არ ჰქონია და დატვირთვებს ვერ უძლებდა, თუმცა ჩვენ შრომა ერთად გავწიეთ, მან კი საქართველოს 21-წლამდე ნაკრებთან ერთად 120 წუთი ითამაშა და გადამწყვეტი პენალტიც გაიტანა. როცა ფუნქციურად მზად ხარ, მოედანზე გაცილებით გააზრებულ გადაწყვეტილებებს იღებ და მარტივ სიტუაციებში შეცდომებს არ უშვებ. ლუკა ბურთთან მუშაობით გამოირჩევა. შემიძლია გითხრათ, რომ ის განსაკუთრებულად მგრძნობიარე, თუმცა ამავდროულად, ნამდვილად დიდი პროფესიონალია და ყოველ ჯერზე, მასთან, შესანიშნავი კომუნიკაცია მაქვს”.
ლუკა ლაცაბიძე 2004 წლის 18 მარტს, ხაშურში დაიბადა. არის 1.93 სმ სიმაღლის, ქერა - დასამახსოვრებელი გარეგნობის ცენტრალური მცველი. ლუკა ყოფილი ფეხბურთელის, ზაზა ლაცაბიძის შვილია, რომელსაც სხვადასხვა დროს ხაშურის ივერიაში, თბილისის ლოკომოტივში, გორის დილაში, ასევე, ექსტრაკლასასა და საქართველოს ასაკობრივ ნაკრებებში უთამაშია.
ლუკა ლაცაბიძემ ფეხბურთის თამაში 7 წლის ასაკში დაიწყო. თავიდან სწორედ მშობლიური ხაშურის ივერიას საფეხბურთო სკოლაში ვარჯიშობდა. 9 წლის ასაკში, პატარა ტალანტი დინამო თბილისმა ერთ-ერთ ტურნირზე შენიშნა და 2013 წელს აკადემიაში მიიწვია. დიდ აუდიტორიასთან ლუკას გამოჩენა სწორედ ამ პერიოდს უკავშირდება, როცა ჯერ დინამო თბილისის მეორე შემადგენლობაში ვარჯიშობდა, შემდეგ მთავარ გუნდში დაწინაურდა და დებიუტი საქართველოს დავით ყიფიანის სახელობის თასზე, სამტრედიას წინააღმდეგ ჰქონდა.
საინტერესოა, რომ თავიდან, ლუკას დინამო თბილისის აკადემიაში შემტევ ნახევარმცველად ათამაშებდნენ.
2022 წლის ბოლოს, საქართველოს ფეხბურთის ფედერაციის ყოველწლიურ შემაჯამებელ ღონისძიებაზე, ლუკა ლაცაბიძემ ალექსანდრე ჩივაძის სახელობის ოქროს მედალი, როგორც 19-წლამდე ასაკის გამორჩეულმა ტალანტმა, მიიღო.
შენიშვნა: მასალა შეიცავს საქართველოს ფეხბურთის ფედერაციის ფოტოს
