თურქულ შეკრებაზე, საქართველოს 21-წლამდე ნაკრებმა 7 გოლი გაიტანა და 3 გაუშვა.
სერბეთთან მატჩში, რომელიც ახლახანს დასრულდა, ანგარიში გაბრიელ სიგუამ გახსნა, რასაც ტაიმის ბოლოს თორნიკე მორჩილაძის შესრულებული თერთმეტმეტრიანი მოჰყვა. მეორე ტაიმში, შეხვედრის საბოლოო ანგარიშს წერილი გიორგი იაკობიძემ დაუსვა.
აღსანიშნავია, რომ ამხანაგურ მატჩებში, რამაზ სვანაძემ დრო მარტის შეკრებაზე გამოძახებულ ყველა ფეხბურთელს მისცა. ფინეთთან შეხვედრა სრულად ლუკა ხარატიშვილმა ჩაატარა, ხოლო სერბეთთან მატჩის პირველ ტაიმში, ჩვენი გუნდის კარს ლევან თანდილაშვილი იცავდა, რომელიც მეორე ნახევარში მიხეილ მაქაცარიამ შეცვალა.
აღნიშნული შეხვედრით, ევროპის ჩემპიონატისთვის მზადების პროცესში დაგეგმილი ამხანაგურების ციკლი დავასრულეთ.
შეგახსენებთ, რომ 21-წლამდე ნაკრებების ევროპის ჩემპიონატი 2025 წლის 11 ივნისიდან 28 ივნისის ჩათვლით, სლოვაკეთის 8 ქალაქის 8 სტადიონზეა დაგეგმილი. უშუალოდ ჩვენი ნაკრები მატჩებს 8 ქალაქიდან 2-ში: პოლონეთისა (11ივნისი) და საფრანგეთის (14 ივნისი) წინააღმდეგ - ჟილინაში, ხოლო პორტუგალიის (17 ივნისი) წინააღმდეგ - ტრენჩინში გამართავს.
ტურნირის დებულების მიხედვით, 2025 წლის ევროპის 21-წლამდე ნაკრებების ჩემპიონატზე საკვალიფიკაციო რაუნდის ჯგუფური ეტაპიდან (მასპინძელი სლოვაკეთის გარდა) პირდაპირ მოხვდა 9 ჯგუფის გამარჯვებული ნაკრები და 3 საუკეთესო მეორეადგილოსანი, ხოლო დარჩენილი 6 მეორეადგილოსანი ნაკრები ერთმანეთს დაუპირისპირდა და 3 საგზური სწორედ ამ გზით გადანაწილდა. საქართველოს 21-წლამდე ნაკრების გარდა, პლეიოფის გავლით, ევროპის ჩემპიონატზე ჩეხეთი და ფინეთი გავიდნენ. ასევე, ევრო 2025-ზე ითამაშებენ: სლოვაკეთი (მასპინძელი), დანია, ინგლისი (მოქმედი ჩემპიონი, რომელმაც ტიტული ბათუმში ჩაიბარა), საფრანგეთი, გერმანია, იტალია, ნიდერლანდები, პოლონეთი, პორტუგალია, რუმინეთი, სლოვენია, ესპანეთი და უკრაინა.
21-წლამდე ნაკრებების ევროპის ჩემპიონატის ჯგუფურ ეტაპზე ბილეთების საფასური 12 და 15 ევროა. ბილეთების შეძენა შესაძლებელი ტურნირის ოფიციალურ ვებგვერდზეა. ამისათვის საჭიროა რეგისტრაციის უმარტივესი პროცედურის გავლა, შემდეგ კი სასურველი ადგილისა და კატეგორიის ბილეთის შერჩევა.
შენიშვნა: მასალა შეიცავს საქართველოს ფეხბურთის ფედერაციის ფოტოს
ფეხბურთთან ახლოს #5 | მოგება სომხეთთან და უსიამოვნო ინციდენტი მატჩის შემდეგ
