წარმოგიდგენთ ყველაზე დასამახსოვრებელ ქამბექებს მსოფლიო ჩემპიონატების ისტორიაში 21-ე საუკუნიდან. მუნდიალის პლეიოფის მატჩები, რომელთა მიმდინარეობა თავდაყირა დადგა.
არგენტინა 3:2 ეგვიპტე | 2026 წლის მსოფლიო ჩემპიონატი, 1/8 ფინალი
მატჩი, სადაც არგენტინა მარცხთან ძალიან ახლოს აღმოჩნდა. მსოფლიოს მოქმედი ჩემპიონის მდგომარეობა დაამძიმა ლიონელ მესის გამოუყენებელმა 11-მეტრიანმაც, ეგვიპტის მე-2 ბურთმა კი "ალბისელესტე" პრაქტიკულად კატასტროფის წინაშე დააყენა. მოგებისთვის საჭირო იყო 3 გოლი, ტაბლოზე კი "ფარაონთა" სასარგებლოდ 2:0 ციმციმებდა.
საბოლოოდ ყველაფერი დასრულდა "სელესიონის" რემონტადათი - სამი ბურთი 13 წუთის შუალედში. ყურადღების ცენტრში კვლავ აღმოჩნდა ინტერ მაიამის კაპიტანი, რომელმაც ჯერ ასისტი გააკეთა კრისტიან რომეროზე, შემდეგ კი მან თავადაც შეაგდო. საბოლოო წერტილი დასვა ენცო ფერნანდესმა, ლაუტარო მარტინესის პასით.
ბელგია 3:2 იაპონია | 2018 წლის მსოფლიო ჩემპიონატი, 1/8 ფინალი
ერთ-ერთი საუკეთესო მატჩი, რომელიც ბელგიის ე.წ. არშემდგარ ოქროს თაობას ჩაუტარებია. 69-ე წუთამდე იაპონია იყო წინ ორი გოლით და მეოთხედფინალისტის ვინაობა თითქოს გარკვეული ჩანდა. შემდეგ დაიწყო "ეშმაკთა" ქამბექი, რომელიც აღმოჩნდა უბრალოდ ბრწყინვალე მოვლენა, თანაც ეს ყველაფერი ძირითად დროში.
იან ვერტონგენი, მარუან ფელაინი და ნასერ შადლი - "წითლებმა" მატჩის შემობრუნება სწორედ ამ ფეხბურთელების გოლებით მოახერხეს. ეს არ იყო რობერტო მარტინესის შეგირდების შესაძლებლობების ლიმიტი, 1/4 ფინალში მათ ბრაზილიის ეროვნულ გუნდსაც მოუგეს. ზღაპარი დასრულდა 1/2 ფინალში, მომავალ ტრიუმფატორთან, საფრანგეთთან წაგებით.
ბრაზილია 2:1 ინგლისი | 2002 წლის მსოფლიო ჩემპიონატი, 1/4 ფინალი
მატჩი, რომელიც რონალდინიო გაუჩოს ბენეფისად იქცა. ახალგაზრდა შემტევმა ჯერ რივალდო ვიტორ ბორბა ფერეირას გაატანინა, შემდეგ კი ბრაზილიელმა ფლეიმეიქერმა თავადაც შეაგდო. შორეული დისტანციიდან ჩახვეული საჯარიმო დარტყმა დევიდ სიმენის კარში და იდეალური რემონტადა "სელესაოსგან".
მაიკლ ოუენის ადრეულ გოლს ბარსელონას ყოფილმა შემტევმა სწორედ ასე უპასუხა. როგორი გასაკვირიც არ უნდა იყოს, ეს მატჩი მან მოედნიდან გაძევებით დაასრულა. გოლის შეგდებიდან რამდენიმე წუთში, "კანარინიოს" მე-11 ნომერი ეუხეშა დენი მილსს, რის გამოც წითელი ბარათი მიიღო. ღიმილი "ჯადოქრის" სახეზე ვერც აღნიშნულმა ფაქტმა გადაფარა.
ხორვატია 1:1 (პენ. 4:2) ბრაზილია | 2022 წლის მსოფლიო ჩემპიონატი, 1/4 ფინალი
მატჩი, სადაც რემონტადას პრინციპმა უკვე ბრაზილიის საწინააღმდეგოდ იმოქმედა. ძირითად დროში უგოლო ფრეს შემდეგ, მსოფლიოს ხუთგზის ჩემპიონები ექსტრა ტაიმში წინ გაიყვანა ნეიმარ ჟუნიორმა, რითაც თავისი ეროვნული გუნდი 1/2 ფინალს მიაახლოვა. "სელესაოში" სუფევდა საზეიმო განწყობა, მაგრამ შეხვედრის დასრულებამდე 3 წუთით ადრე, ბრუნო პეტკოვიჩმა ანგარიში გაათანაბრა.
დაინიშნა მატჩის შემდგომი პენალტების სერია, სადაც "პენტაკამპეონეს" ხორვატიაზე ნაკლებად გაუმართლა. თავისი დარტყმა ვერ გამოიყენა მარკინიოს კორეამ, იქამდე კი როდრიგო გოესმაც. ასე გაგრძელდა ბალკანელთა ზღაპარი, რომელიც დაიწყო კატარის მუნდიალამდე 4 წლით ადრე, რუსეთში გამართულ ტურნირზე.
საფრანგეთი 4:3 არგენტინა | 2018 წლის მსოფლიო ჩემპიონატი, 1/8 ფინალი
ერთ-ერთი ყველაზე დასამახსოვრებელი მატჩი მსოფლიო ჩემპიონატების ისტორიაში. შვიდგოლიანი დრამა არგენტინისა და საფრანგეთის მონაწილეობით. რატომ ქამბექი? ბევრს აღარც ახსოვს ის ფაქტი, რომ შეხვედრის მსვლელობისას "ალბისელესტე" რაღაც დროის მანძილზე იგებდა კიდეც.
ანტუან გრიზმანის პენალტს "სელესიონმა" ანხელ დი მარიასა და გაბრიელ მერკადოს გოლებით უპასუხა. შემდეგ იყო ბენჟამინ პავარის შორეული გასროლა და კილიან მბაპეს დუბლი. ხორხე სამპაოლის შეგირდების მხრიდან შეაგდო სერხიო აგუერომაც, მაგრამ "მამლებთან" მოსაგებად ეს საკმარისი არ გამოდგა.
გერმანია 1:1 (პენ. 4:2) არგენტინა | 2006 წლის მსოფლიო ჩემპიონატი, 1/4 ფინალი
მსოფლიო ჩემპიონატის კლასიკა - გერმანიისა და არგენტინის დაპირისპირება, სადაც გამარჯვებული 2006 წლის ტურნირის მასპინძელი გამოვიდა. რობერტო აიალას მიერ შეგდებულ ბურთს უპასუხა მიროსლავ კლოზემ, შეხვედრის ძირითადი დროის ამოწურვამდე 10 წუთით ადრე. უგოლო ექსტრა ტაიმების შემდეგ, 11-მეტრიანებში მოგება "ბუნდესთიმს" დარჩა.
"მანშაფტის" ფეხბურთელებმა პენალტები შეასრულეს უნაკლოდ, "ალბისელესტეს" მხრიდან კი როგორი პარადოქსულიც არ უნდა იყოს, თავისი დარტყმა ვალენსიას ყოფილმა კაპიტანმა ვერ გამოიყენა. მის გარდა, არც ესტებან კამბიასოს გაუმართლა. მოგვიანებით, გერმანია "სელესიონს" სამხრეთ აფრიკისა და ბრაზილიის მუნდიალებზეც მოუგებს.
იტალია 1:1 (პენ 5:3) საფრანგეთი | 2006 წლის მსოფლიო ჩემპიონატი, ფინალი
21-ე საუკუნეში მსოფლიო ჩემპიონატის ერთადერთი ფინალი, სადაც ტურნირის გამარჯვებული ნაკრები მატჩის მიმდინარეობისას მარცხდებოდა. ზინედინ ზიდანის პანენკას მარკო მატერაციმ უპასუხა თავურით, მაგრამ გატანილი გოლების გარდა, აღნიშნული დუეტი ყურადღების ცენტრში სხვა მიზეზის გამოც მოექცა.
სიტყვიერი შელაპარაკება, ფრანგი ნახევარმცველის დარტყმა თავით იტალიელი მეტოქის მკერდში, წითელი ბარათი, პენალტების სერია და ბოლოს, "აძურის" მოგება. აღსანიშნავია, რომ გერმანიის მუნდიალზე ჩემპიონობის შემდეგ, 4-გზის ტრიუმფატორებს ტურნირის პლეიოფში აღარ უთამაშიათ, უშუალოდ მსოფლიოზე კი "ლურჯები" 2014-დან აღარ ჩანან.
მაროკო 1:1 (პენ. 3:2) ნიდერლანდები | 2026 წლის მსოფლიო ჩემპიონატი, 1/16 ფინალი
2022 წლის მსოფლიო ჩემპიონატზე ნახევარფინალში გასვლით, მაროკო გახდა პირველი აფრიკული ნაკრები, რომელიც მოხვდა ოთხ საუკეთესოს შორის, რითაც ახალი ისტორია დაწერა. აშშ-ს მუნდიალზე კი "ატლასის ლომები" უკვე არიან 1/4 ფინალში, რითაც ამტკიცებენ, კატარში მომხდარი მოვლენები შემთხვევითობა სულაც არ იყო.
რაც შეეხება ნიდერლანდებთან მატჩს, 91-ე წუთზე ისა დიოპის მიერ ანგარიშის გათანაბრების შემდეგ, მოჰამედ უაჰბის გუნდმა პენალტების სერიაში მოიგო. დიახ, მაროკომ ბრძოლას გამოთიშა "მფრინავი ჰოლანდიელები", ვნახოთ, რა იქნება მუნდიალის ერთ-ერთ მთავარ ფავორიტთან, საფრანგეთთან.
პორტუგალია 2:1 ხორვატია | 2026 წლის მსოფლიო ჩემპიონატი, 1/16 ფინალი
მატჩი, სადაც კრიშტიანუ რონალდუმ გაიტანა თავისი ერთადერთი გოლი მსოფლიო ჩემპიონატის პლეიოფში. მერვედფინალში მოხვედრისთვის პორტუგალიას დასჭირდა რემონტადას მოხდენა, რადგან 68-ე წუთამდე ხორვატია იგებდა. თამაშში დაბრუნება მოხერხდა სწორედ ალ ნასრის კაპიტნის ზუსტად შესრულებული 11-მეტრიანით.
გამარჯვების მომტანი გოლი კი პირენეელების მხრიდან გაიტანა შეცვლაზე შემოსულმა გონსალუ რამუშმა, თანაც 94-ე წუთზე! ეს იყო მადრიდის რეალის ლეგენდარული მოთამაშეების დუელი, რომელშიც უბერებელმა პორტუგალიელმა გოლეადორმა ლუკა მოდრიჩს მოუგო. შეგახსენებთ იმასაც, რომ "ლუზიტანთა" მე-7 ნომერი ერთადერთი მოთამაშეა, რომელმაც გოლის გატანა 6 მუნდიალზე შეძლო.
ურუგვაი 1:1 (პენ. 4:2) განა | 2010 წლის მსოფლიო ჩემპიონატი, 1/4 ფინალი
როგორც აღვნიშნეთ, მაროკო 2026 წლის მსოფლიო ჩემპიონატზე გავიდა ნახევარფინალში, რითაც გახდა პირველი აფრიკული ნაკრები, რომელიც ოთხ საუკეთესოს შორის მოხვდა. "ატლასის ლომების" სენსაციამდე 16 წლით ადრე, აღნიშნულ მიღწევასთან ახლოს სამხრეთ აფრიკის მუნდიალზე განა იყო.
ურუგვაისთან მეოთხედფინალურ მატჩში თავდაპირველად წინ იყვნენ სწორედ "შავი ვარსკვლავები", თუმცა მოგვიანებით, მსოფლიოს ორგზის ჩემპიონები თამაშში დიეგო ფორლანმა დააბრუნა. რა მოხდა შემდეგ? ლუის სუარესის გაძევების ფასად შესრულებული სეივი ხელით, ასამოა გიანის გაფუჭებული 11-მეტრიანი და ბოლოს, მოგებული "სელესტე".
ასევე გამოსარჩევია: არგენტინა 2:1 მექსიკა (2006), ბელგია 3:2 სენეგალი (2026), ბრაზილია 2:1 იაპონია (2026), ხორვატია 1:1 (პენ. 3:2) დანია (2018), ხორვატია 2:1 ინგლისი (2018), ხორვატია 1:1 (პენ. 3:1) იაპონია (2022), ინგლისი 2:1 კონგო დრ (2026), საფრანგეთი 3:1 ესპანეთი (2006), ნიდერლანდები 2:1 ბრაზილია (2010), ნიდერლანდები 2:1 მექსიკა (2014), სენეგალი 2:1 შვედეთი (2002).
