2026 წლის მსოფლიო ჩემპიონატი წარმატების მომტანი არ აღმოჩნდა ბრაზილიისა და გერმანიისთვის, იტალიისთვის კი მითუმეტეს, რომელიც მუნდიალზე ვერც მოხვდა. საუბარია მსოფლიოს მთავარი ტურნირის 3 ყველაზე ტიტულოვან ეროვნულ გუნდზე, რომელიც მოგებული თასების რაოდენობით სხვებზე მაღლა დგას.
ხუთგზის მსოფლიო ჩემპიონი "სელესაო" პირველად 1990 წლის შემდეგ ვერ მოხვდა მეოთხედფინალში და ამის გარდა, ბოლო ტრიუმფიდან უკვე 24 წელზე მეტი გადის. უფრო დიდი შუალედი "კანარინიოს" ჰქონდა მხოლოდ 1930-1958 წლებში, პირველ ჩემპიონობამდე. ესპანეთი/პორტუგალია/მაროკოს მუნდიალისთვის უტიტულობა 28 წლამდე გაგრძელდება.
ოთხგზის მსოფლიო ჩემპიონი "ბუნდესნაკრები" 2014 წლის შემდეგ, მერვედფინალში არ ყოფილა. ჯგუფში ჩარჩენა ზედიზედ ორჯერ, 2018 და 2022 წლების მუნდიალებზე, აშშ-ს ტურნირზე კი წაგება 1/16 ფინალში პარაგვაისთან. იყო დრო, როცა "მანშაფტისთვის" ცუდ შედეგად ითვლებოდა ზედიზედ 2-ჯერ წაგება 1/4 ფინალში, 1994 და 1998 წლებში.
ბოლოს კი მსოფლიოს ასევე ოთხგზის ჩემპიონი "სკუადრა აძურა", რომელიც ტურნირზე არ ყოფილა 2014 წლის შემდეგ, პლეიოფში კი 2006-ის შემდეგ. "ლურჯებს" დროის ამ შუალედში გაეზარდათ ფეხბურთელთა მთელი თაობა, რომელმაც სოლიდურ ასაკს მიაღწია ისე, რომ მუნდიალზე ერთხელაც ვერ ითამაშა.
