რატომ არის ნორვეგია ყველაზე უხერხული მეტოქე ბრაზილიის ნაკრების ისტორიაში?

მსოფლიო ჩემპიონატის მერვედფინალის ფარგლებში ბრაზილია ნორვეგიას დაუპირისპირდება. საინტერესოა, რომ მუნდიალის ყველაზე ტიტულოვანი ეროვნული გუნდი ხვდება თავის მთავარ უხერხულ მოწინააღმდეგეს, რომელთანაც 4 შეხვედრაში ვერცერთხელ ვერ მოიგო. 2 ფრე და 2 წაგება, ასეთია "სელესაოს" შედეგი.

სკანდინავიელების ნაკრები არის ერთადერთი, რომელთანაც "პენტაკამპეონეს" გამარჯვება არ აქვს. ცხადია, ვგულისხმობთ იმ ეროვნულ გუნდებს, რომელსაც ბრაზილია შეხვედრილა. რაც შეეხება აღნიშნულ წარუმატებელ სერიას, "ვიკინგებს" ყველაზე ტიტულოვან ნაკრებთან მოუგიათ მუნდიალზეც კი, საფრანგეთში.

1998 წლის მსოფლიო ჩემპიონატის ჯგუფური ეტაპის ბოლო ტურში "სელესაო" ეგილ ულსენის გუნდთან ანგარიშით 2:1 დამარცხდა. მუნდიალის იმ დროისთვის მოქმედ ტრიუმფატორ "კანარინიოს" განაღდებული ჰქონდა 1-ელი პოზიცია და 1/8 ფინალში გასვლა, ნორვეგია კი პლეიოფში სწორედ აღნიშნული მოგების ხარჯზე გავიდა.

რაც შეეხება ბრაზილიასა და სკანდინავიელებს შორის გამართულ დანარჩენ სამ მატჩს, ეს ამხანაგურებში მოხდა. მარცხი ანგარიშით 2:4 1997 წელს, ასევე 2-ჯერ 1:1, 1988-სა და 2006-ში. ვნახოთ, შეძლებს თუ არა "სელესაო" ნავსის გატეხვას ამჯერად, უხერხულ მოწინააღმდეგესთან, რომელიც ძლიერია ისე, როგორც არასდროს.