მერაბ დვალიშვილი დღეს სამშობლოში დაბრუნდა. ქართველი მებრძოლი 11 ივლისს თბილისში გასამართ RAF-ის ღონისძიებაზე მთავარ დაპირისპირებაში იასპარეზებს.
საქართველოში დაბრუნებულმა მერაბ დვალიშვილმა მომავალ ივენთთან დაკავშირებით ისაუბრა:
“ძალიან მიხარია, რომ ასეთი მაღალი დონის სპორტული ღონისძიება ტარდება თბილისში. RAF-ი დიდი ორგანიზაციაა, უამრავი მაყურებელი ჰყავს. პირველ გასვლით ღონისძიებას თბილისში ვატარებთ. ასევე მიხარია, რომ ივენთის მთავარი დაპირისპირება ჩემსა და სეხუდოს შორის გაიმართება და ვეცდები ვასახელო ჩემი ქვეყანა.
RAF-ის ივენთის საქართველოში ჩატარება ძალიან დიდი მოტივაციაა ყველა მოჭიდავისთვის, წარმატებული სპორტსმენები მონაწილეობენ , დიდი აუდიტორია ჰყავს და ახალგაზრდებისთვის კარგი მოტივაციაა, ასევე MMA-ში ჭიდაობა მნიშვნელოვანია. მე უკან რომ დამაბრუნო ერთადერთი რასაც შევცვლიდი, თავიდან დავიწყებდი ჭიდაობაში ვარჯიშს.
რა თქმა უნდა, სეხუდოსთან ჭიდაობა მარტივი არ იქნება. მომავალ ერთ კვირას გამოვიყენებ მოსამზადებლად და იმისთვის, რომ ჭიდაობაშიც დავამარცხო სეხუდო. ჩემი უპირატესობა სეხუდოსთან იქნება გამძლეობა, როგორც იცით კარგი კარდიო მაქვს. მისი უპირატესობა იქნება ის რომ ფეხში კარგად შედის და კარგად მოძრაობს.
2011 წლის შემდეგ საქართველოში ჩატარებულ შეჯიბრებებში არ მიმიღია მონაწილეობა. მადლობა ქართველ გულშემატკივრებს, აშშ-ში ყოველთვის მოდიან ჩემ საგულშემატკივროდ, რაც ძალიან მაბედნიერებს. ყველაფერს გავაკეთებ რომ თბილისში გავიმარჯვო და გავახარო ქართველი ხალხი.
დღეს უკვე დაგეგმილი მაქვს ვარჯიში, ავთანდილ კენჭაძესთან ერთად. ზეგ უკვე გორში ვაპირებ ჩასვლას, ვლადიმერ ხინჩეგაშვილი დამეხმარება.
რაც შეეხება UFC-ის, ალბათ, სექტემბერში ან ოქტომბერში შევძლებ იანთან დაპირისპირებას.
საქართველოდან შტატებში დაბრუნების შემდეგ დავიწყებ მწვრთნელებისა და სპარინგ პარტნიორების ძებნას, არ მინდა იგივე შეცდომები დავუშვა, იანი უხერხული მეტოქეა და კარგად უნდა მოვემზადო. ვფიქრობ, ახლა სჯობს ინდივიდუალური ვარჯიშებით მოვემზადო,” - განაცხადა მერაბ დვალიშვილმა.
შეგახსენებთ, სეხუდოსა და დვალიშვილის დაპირისპირება დაგეგმილი იყო 18 აპრილს, მაგრამ ჭიდაობის დღეს ამერიკელი სპორტსმენი ტრავმის გამო ივენთს ჩაეხსნა.
11 ივლისს RAF-ის ივენთზე ქართველთაგან მერაბ დვალიშვილი, გენო პეტრიაშვილი, ვლადიმერ ხინჩგაშვილი, გივი მაჭარაშვილი და ვლადიმერ გამყრელიძე იასპარეზებენ.
გივი მაჭარაშვილი იჭიდავებს ზაკარი ელუმთან, არმან ცარუკიანი - კუატ ხამიტოვთან, კაილ სნაიდერი კი ქვემძიმე წონითი დივიზიონის ქამარს აბდულრაშიდ სადულაევთან გაათამაშებს. სხვა წყვილები: გენო პეტრიაშვილი იჭიდავებს ჯეიკ ვარნერთან, ლადო ხინჩეგაშვილი - კონორ ბიბისთან, ვლადიმერ გამყრელიძე კი კაილ დეიკისთან.
