საქართველოს დედაქალაქი თბილისი 11 ივლისს უმასპინძლებს RAF-ის მორიგ ივენთს, სადაც მერაბ დვალიშვილი თავისუფალი სტილით ჭიდაობაში მისთვის კარგად ნაცნობ ჰენრი სეხუდოს დაუპირისპირდება. შეგახსენებთ, მათი დუელი უნდა შემდგარიყო 18 აპრილს, მაგრამ ჭიდაობის დღეს ამერიკელი მებრძოლი ტრავმის გამო ივენთს ჩაეხსნა.
რაც შეეხება ქართველ მებრძოლს, გასულ კვირას მან დაამარცხა ფრენკი ედგარი და როგორც ვხედავთ, "ტრიპლ სი"-სთან ჭიდაობის შესაძლებლობა მას უახლოეს მომავალში კვლავ ექნება. ორგანიზატორების თქმით, ეს იქნება RAF-ის ყველაზე გრანდიოზული ივენთი, რაც აქამდე ყოფილა. "მანქანისა" და სეხუდოს გარდა, 11 ივლისის ღონისძიებაზე სხვა არაერთი ცნობილი სახე იქნება.
უკვე დადასტურდა, რომ გივი მაჭარაშვილი იჭიდავებს ზაკარი ელუმთან, არმან ცარუკიანი - კუატ ხამიტოვთან, კაილ სნაიდერი კი ქვემძიმე წონითი დივიზიონის ქამარს აბდულრაშიდ სადულაევთან გაათამაშებს. დვალიშვილმა ასევე აღნიშნა, ხამზატ ჩიმაევის მონაწილეობაც, მაგრამ RAF-ს აღნიშნული ინფორმაცია ოფიციალურად ჯერ არ დაუდასტურებია.
სხვა ოფიციალურად უკვე დადასტურებული წყვილები - გენო პეტრიაშვილი იჭიდავებს ჯეიკ ვარნერთან, ვლადიმერ გამყრელიძე კი კაილ დეიკისთვის ქვემძიმე წონითი დივიზიონის ქამრის წართმევას ეცდება.
