12 სექტემბერს, ჩვენი დროით 18:00 საათიდან, დუბაიში გაიმართება VFL-ის პირველი ივენთი, რომლის მთავარ ბრძოლაში გურამ ქუთათელაძე ჯერემი კენედის შეხვდება. ეს იქნება ქართველი მებრძოლის რიგით მე-4 ჩხუბი მსოფლიოს მთავარი პრომოუშენის დატოვების შემდეგ. გამოსარჩევია ისიც, რომ "ვიკინგს" 3/3 მოგება აქვს.
34 წლის სპორტსმენმა ბოლო პერიოდში დაამარცხა ვიქტორ ჰიუგო ACA 194-ზე, მოგვიანებით - კადირ დალკირანი და ლუკას ალმეიდა Karate Combat-ზე. უკანასკნელი 2 ჩხუბი იყო კარატეს წესებით, მოახლოებული დუელი კი იქნება ქუთათელაძისთვის ჩვეულ შერეულ საბრძოლო ხელოვნებების სტილში.
რაც შეეხება გურამის კანადელ მეტოქეს, მისი მონაგარი შეადგენს 21 გამარჯვებასა და 7 მარცხს. კარიერული გზა იყო საკმაოდ საინტერესო: 2016-2018 წლებში "ჯეიბისი" ჩხუბობდა მსოფლიოს მთავარ პრომოუშენში, რომელშიც მან 2-ჯერ წააგო მომავალ ლეგენდასთან, ალექს ვოლკანოვსკისთან. ავსტრალიელ მოწინააღმდეგესთან მე-2 მარცხის შემდეგ, 33 წლის მებრძოლმა პრომოუშენი დატოვა.
მოგვიანებით, კენედის გზაზე იყო Bellator-ი, სადაც მან გაიმარჯვა აარონ პიკოს წინააღმდეგ, თუმცა შემდეგ მან საჩემპიონო ბრძოლაში პატრისიო პიტბულთან წააგო. კანადელი მებრძოლის კარიერის უკანასკნელ პერიოდში გამოსარჩევია, რომ 2025-ში ის BFL-ის ქამარს ფლობდა. როგორც აღვნიშნეთ, ჯერემის ანგარიშზეა 21 მოგება, რომლის უმეტესობა, უფრო კონკრეტულად კი 11 გადაწყვეტილებით იყო.
