საკლუბო სეზონი ტრადიციულად გაიხსნება უეფას სუპერთასის დაპირისპირებით - კვლავ პარი სენ-ჟერმენი, რომელმაც ჩემპიონთა ლიგაზე იმარჯვა მიყოლებით მეორედ და მისი მოწინააღმდეგე, ევროპა ლიგის ტრიუმფატორი ასტონ ვილა. აღნიშნულ შეხვედრას არც ინტრიგა აკლია და არც ისტორიული კონტექსტი.
პსჟ-ს გამარჯვების შემთხვევაში, რეალ მადრიდისა და მილანის შემდეგ უეფას სუპერთასს ეყოლება კიდევ ერთი გუნდი, რომელიც ამ ტიტულს მიყოლებით მეორედ მოიგებს. გავიხსენოთ "სამეფო კლუბისა" და "როსონერის" ისტორიული მიღწევა, ბოლოს კი "ლურჯ-წითელთა" შანსებზეც ვისაუბროთ.
მილანი 1989-1990 | როცა კრუიფის ოცნების გუნდს ვან ბასტენმა გაუტანა
უეფას სუპერთასი არსებობს 1973-დან, თუმცა პირველი დომინანტი გამარჯვებული მილანის სახით ამ ტურნირზე მხოლოდ 1989-1990 წლებში გამოჩნდა. იმ დროს ფორმატი იყო განსხვავებული: გუნდები ერთმანეთის წინააღმდეგ ატარებდნენ 2 შეხვედრას, 1 თამაში იმართებოდა ევროპის მთავარი საკლუბო ტურნირის ტრიუმფატორის სტადიონზე, მე-2 კი თასების თასისის მომგების არენაზე.
უეფას სუპერთასის თანამედროვე ეპოქაში ჩემპიონთა ლიგის გამარჯვებული უპირისპირდება ევროპა ლიგის ტრიუმფატორს, თუმცა წარსულში, როგორც აღვნიშნეთ, საქმეში თასების თასის მომგები გუნდი ფიგურირებდა. "როსონერი" 2-ვე წელს იყო ევროპის მთავარი საკლუბო ტურნირის ტრიუმფატორის რანგში, ოპონენტები კი იყვნენ ჯერ ბარსელონა, შემდეგ კი გენუის სამპდორია.
კატალონიურ გუნდსა და "დიავოლოს" შორის გამართული პირველი მატჩი, რომელიც ჩატარდა კამპ ნოუზე, დასრულდა ფრედ, ანგარიშით 1:1. მარკო ვან ბასტენის ზუსტად შესრულებულ 11-მეტრიანს შეხვედრის მე-2 ნახევარში გილერმო ამორმა უპასუხა. 2 კვირის შემდეგ, სან სიროზე არიგო საკის შეგირდებმა ალბერიკო ევანის ბურთით მოიგეს.
ასე დაამარცხა გენიალურმა იტალიელმა ტაქტიკოსმა არანაკლებ ლეგენდარული და ეპოქალური მეტოქე იოჰან კრუიფის სახით. დიახ, "ბლაუგრანას" იმ დროს სწორედ ნიდერლანდელი დამრიგებელი ხელმძღვანელობდა. ცალკე გამოსარჩევია ის ფაქტი, რომ ესპანურ-იტალიურ დუელში მოედანზე "მფრინავ ჰოლანდიელთა" მთელი ელიტა იყო წარმოდგენილი.
უკვე ხსენებული კრუიფისა და ვან ბასტენის გარდა, იმ ორმატჩიან დაპირისპირებაში მონაწილეობას ფრანკ რაიკაარდი და რონალდ კუმანიც იღებდნენ. შეხვედრას დააკლდა რუდ გულიტი, რომელმაც ბარსას წინააღმდეგ თამაში ტრავმის გამო ვერ შეძლო. უნდა ვახსენოთ ისიც, რომ ამ დუელიდან 4 წლის შემდეგ, მილანმა კატალონიელები ევროპის მთავარი საკლუბო ტურნირის მთავარ შეხვედრაში 4:0 გაანადგურა.
როგორც აღვნიშნეთ, "როსონერიმ" უეფას სუპერთასზე გამარჯვება მოიპოვა ზედიზედ ორჯერ და "ბლაუგრანას" შემდეგ, სამპდორიაც დაამარცხა. ეს იყო კლასიკური იტალიური დუელი, რომელშიც "დიავოლომ" 2 შეხვედრის ჯამში გენუელებს 3:1 მოუგო. საინტერესოა ისიც, რომ კამპ ნოუს მკვიდრები და "მეზღვაურები" 2 წლის შემდეგ ერთმანეთს ევროპის მთავარი საკლუბო ტურნირის მთავარ შეხვედრაში დაუპირისპირდნენ.
დიახ, სან სიროს ბინადრების მიერ დამარცხებულმა ორმა გუნდმა ჩემპიონთა თასის ტიტული გაათამაშა. ისმის კითხვა - სად იყო ამ დროს თავად მილანი? პასუხი: დისკვალიფიკაციას იხდიდა. ყველაფერი კი დაიწყო ევროპის მთავარი საკლუბო ტურნირის 1990/91-ის სეზონის 1/4 ფინალში, მარსელის ოლიმპიკთან შეხვედრაში.
საქმე ისაა, რომ "როსონერისა" და პროვანსულ გუნდს შორის განმეორებითი მატჩი დამატებით დროში შეწყდა ცუდი ხილვადობის გამო, მას შემდეგ, რაც სტადიონზე არსებული 4 პროჟექტორიდან 2 მწყობრიდან გამოვიდა. ველოდრომის მკვიდრები უგებდნენ "დიავოლოს" მინიმალური ანგარიშით, 2 შეხვედრის ჯამში კი 2:1-ს.
15 წუთის შემდეგ, როცა ელექტროენერგია აღდგა, ადრიანო გალიანიმ გადაწყვიტა თავისი გუნდის ფეხბურთელები აღარ დაებრუნებინა მოედანზე, რის შედეგადაც შეხვედრა საბოლოოდ შეწყდა. უეფამ სან სიროს მკვიდრები დასაჯა 0:3-ით, ასევე 1 წლით ევროტურნირებიდან მოკვეთით, იტალიელ ფუნქციონერს კი ყველანაირი სპორტული საქმიანობა 2 წლით აეკრძალა.
სწორედ ამ მიზეზის გამო ჩაიარა კრუიფისა და ვუიადინ ბოშკოვის გუნდების ჩემპიონთა თასის ტიტულისთვის ბრძოლამ მილანის ჩარევის გარეშე. დიახ, "როსონერის" ჰეგემონია შეწყდა წაუგებლად, მაგრამ 2 სეზონის შემდეგ, ბარსას განადგურებით, საფეხბურთო სამყარომ ევროპის უძლიერესი კლუბის სრულფასოვანი ქამბექი იხილა.
რეალ მადრიდი 2016-2017 | ზიდანის გუნდის სრული დომინაცია ევროპაში
მილანის დომინაციის შემდეგ, ისე გავიდა ათწლეულები, რომ უეფას სუპერთასზე გამარჯვება ზედიზედ ორჯერ არავის უზეიმია. ნავსი გატეხა რეალმა: 2016-ში მოუგო სევილიას, 1 წლის შემდეგ კი მანჩესტერ იუნაიტედს, რომელსაც იმ დროს ჟოზე მოურინიო ხელმძღვანელობდა. დიახ, მადრიდელებმა თავიანთ ყოფილ/ამჟამინდელ დამრიგებელს აჯობეს.
განსაკუთრებით დრამატული გამოდგა ანდალუსიურ გუნდთან მატჩი, სადაც "სამეფო კლუბი" 90+3-ე წუთამდე მარცხდებოდა კიდეც, თუმცა ჩემპიონთა ლიგის მოქმედ ტრიუმფატორთა გადარჩენა შეძლო სერხიო რამოსმა, თანაც ჩვეულ სტილში, კომპენსირებულ დროში გოლის შეგდებით. ესპანელმა უკანახაზელმა არც აღნიშნვისგან შეიკავა თავი, მიუხედავად იმისა, რომ მოწინააღმდეგე მისთვის მშობლიური "ნერვიონენსესი" იყო.
რაც შეეხება საბოლოო წერტილს, ის დანი კარვახალმა დასვა. როგორც ვიცით, სანტიაგო ბერნაბეუს ბინადრებმა 2016 - 2018 წლებში ჩემპიონთა ლიგა მოიგეს მიყოლებით 3-ჯერ, მაგრამ უშუალოდ სუპერთასზე იგივეს გამეორება მათ ვერ შეძლეს. რეალმა მოუგო "წითელ ეშმაკებსა" და რამონ სანჩეს-პისხუანის მკვიდრებს, მაგრამ მეზობელ ატლეტიკოსთან ვერაფერი გააწყო.
ეს იყო ის უიშვიათესი შემთხვევა, როდესაც მადრიდული გრანდი ევროპაში თანაქალაქელი "როხიბლანკოსისგან" დაზარალდა. 2017/2018 წლების სეზონის დასრულების შემდეგ, "სამეფო კლუბი" დატოვეს ზინედინ ზიდანმა და კრიშტიანუ რონალდუმ, ახალი ერა კი დაიწყო ხულენ ლოპეტეგიმ, მაგრამ წარუმატებლად.
ესპანელი მწვრთნელის კრახი სანტიაგო ბერნაბეუზე სწორედ "ინდიელებთან" უეფას სუპერთასზე მარცხით დაიწყო. განვლილ ათწლეულში ფლორენტინო პერესის კლუბი პირველ რიგში ასოცირდებოდა პორტუგალიელ გოლეადორთან, მაგრამ უშუალოდ სუპერთასზე 2016-2017 წლებში ის პრაქტიკულად არ ფიგურირებდა.
ხორხე სამპაოლის გუნდთან მატჩი რეალის ყველა დროის საუკეთესო ბომბარდირმა გამოტოვა ევროპის ჩემპიონატის ფინალში მიღებული ტრავმის გამო, ოლდ ტრაფორდის მკვიდრებთან შეხვედრაში კი ის მოედანზე 83-ე წუთზე შემოვიდა. მადრიდელთა მე-7 ნომერს ამჯერად არაფერი აწუხებდა, ფრანგმა სპეციალისტმა მას კონფედერაციის თასზე თამაშის შემდეგ უბრალოდ დასვენების საშულება მისცა.
როგორც ვხედავთ, "სამეფო კლუბი" რონალდუს გარეშეც ბრწყინვალედ გაუმკლავდა თავის იმდროინდელ მეტოქეებს. ევროპის ყველაზე ტიტულოვანმა გუნდმა სუპერთასი მოიგო 2022 და 2024 წლებშიც, მაგრამ ეს უკვე სულ სხვა ისტორიაა. სახსენებელია ისიც, რომ ბერნაბეუს მკვიდრებზე ხშირად (6) აღნიშნულ ტიტულს არავინ დაუფლებია.
პარი სენ-ჟერმენი 2025-2026 | კვარას ისტორიული შანსი და თბილისური საღამოს აჩრდილი
პარი სენ-ჟერმენი უეფას სუპერთასის გამარჯვებული გახდა გასულ სეზონში, ტოტენჰემის დამარცხებით, წელს კი მეტოქე არის პრემიერ ლიგის კიდევ ერთი წარმომადგენელი, ასტონ ვილა. პსჟ-ს უკვე აქვს აღნიშნულ კლუბთან მოგების გამოცდილება, ლუის ენრიკეს კი უნაი ემერის დამწუხრება რუტინულ საქმედ ექცა.
თავად განსაჯეთ - ესპანელმა მწვრთნელმა თანამემამულე მეტოქე 12 მატჩიდან 8-ში დაამარცხა. ერთ-ერთი დაპირისპირება მან მოიგო თბილისშიც, 2015-ის სუპერთასზე. "ლურჯ-წითელთა" ამჟამინდელი დამრიგებელი მაშინ ხელმძღვანელობდა ბარსას, ბასკი თავკაცი კი სევილიას. კატალონიელებს მოგება უხვგოლიან დუელში (5:4) დარჩათ.
იმ მატჩის ქრონიკა იყო ასეთი - ანგარიში საჯარიმო დარტყმით მესამე წუთზე გახსნა ევერ ბანეგამ, რითაც ანდალუსიური გუნდი წინ გაიყვანა. "ნერვიონენსესის" ფლეიმეიქერის სტანდარტიდან ზუსტად 4 წუთში, ჯარიმა შეაგდო ლიონელ მესიმაც და 9 წუთის შემდეგ, მეორეც. პირველი ნახევრის მიწურულს ემერის შეგირდების კარი რაფინია ალკანტარამაც აიღო.
მეორე ტაიმის დასაწყისში ლუის სუარესმა სხვაობა გახადა დამანგრეველი და მატჩის ინტრიგაც თითქოს მოკლა, თუმცა რამონ სანჩეს პისხუანის მკვიდრები დანებებას არ აპირებდნენ. 57-ე - 81-ე წუთების შუალედში სევილიამ "ბლაუგრანას" 3 ბურთი შეუგდო. თავი გამოიჩინეს ხოსე ანტონიო რეიესმა, კევინ გამეირომ და იევგენ კონოპლიანკამ.
მატჩის ძირითადი დრო დასრულდა ანგარიშით 4:4, დამატებითი დროის დამთავრებამდე ხუთი წუთით ადრე კი პედრო როდრიგესმა კამპ ნოუს მკვიდრთათვის ტიტულის მომტანი ბურთი შეაგდო. ეს იყო ენრიკესა და ბასკი თავკაცის 1-ელი შეხვედრა სამშობლოს ფარგლებს გარეთ, მაგრამ დრომ გვიჩვენა, რომ არა უკანასკნელი.
ასტურიელი მწვრთნელი და უნაი ფიგურირებდნენ ბარსელონას ეპოქალურ რემონტადაშიც პარკ დე პრენსის ბინადრებთან, როდესაც 0:4-ის შემდეგ, საფეხბურთო სამყარომ 6:1 იხილა. 1-ელი შეხვედრა პარი სენ-ჟერმენის იმდროინდელი თავკაცისთვის დასრულდა ზღაპრულად: ანხელ დი მარიას დუბლი, ასევე თითო გოლი ედინსონ კავანისა და იულიან დრაქსლერისგან.
პსჟ-ს ფეხბურთელები მორალურად უკვე მეოთხედფინალისთვის ემზადებოდნენ. რაც შეეხება საპასუხო მატჩს - კატალონიური გუნდის დღესასწაული, რომელიც "ლურჯ-წითელთათვის" კოშმარად იქცა. 1-ელი შეხვედრის შედეგიდან გამომდინარე, "ბლაუგრანას" სჭირდებოდა მოგება მინიმუმ 4-გოლიანი უპირატესობით, ბურთის გაშვების შემთხვევაში კი 5-ით.
დიახ, კამპ ნოუს ბინადრებმა გაუშვეს ერთი გოლი, თუმცა საპასუხოდ ექვსი გაიტანეს. ზღაპრულ განწყობაზე ამჯერად იყო ლუისი და არა ემერი. ყველაფერი დაიწყო სუარესის მიერ შეგდებული თავურით, რასაც 1-ელი ნახევრის ბოლომდე მოყვა ლევენ კურზავას ავტოგოლი და მესის 11-მეტრიანი.
ენრიკეს გუნდმა იგრძნო, რომ რემონტადას მოხდენა სულაც არ იყო არარეალური და ეს სულისკვეთება ვერც პარკ დე პრენსის ბინადრების ცხრიანის მიერ 62-ე წუთზე შეგდებულმა ბურთმა ჩააქრო. უნდა აღინიშნოს ისიც, რომ "მატადორის" გოლის შემდეგ, ბარსას ამოცანა უფრო გართულდა: საჭირო იყო უკვე არა 2-ის, არამედ 3 ბურთის შეგდება.
კატალონიური გუნდის სასწაული დაიწყო 88-ე წუთიდან, როდესაც ნეიმარ ჟუნიორმა შეაგდო ჯერ საჯარიმო დარტყმით, სამი წუთის შემდეგ კი პენალტითაც. ტაბლოზე ანათებდა 5:1, მაგრამ 1/4 ფინალში გასასვლელად "ბლაუგრანასთვის" ეს საკმარისი არ იყო. კულმინაცია მოხდა 95-ე წუთზე: ბრაზილიელი ფორვარდის ჩაწოდებას ოპერატიულად გამოეხმაურა სერხი რობერტო, რომელმაც ემერის შეგირდებს მე-6 ბურთი შეუგდო.
კამპ ნოუ დაინგრა, ისევე როგორც პარი სენ-ჟერმენი, თუმცა მიზეზი განსხვავებული იყო. ასე გაანადგურა ასტურიელმა მწვრთნელმა თავისი ბასკი მოწინააღმდეგე. რაც შეეხება პსჟ-ს მოგებას ვილა პარკის მკვიდრებზე ევროპის მთავარი საკლუბო ტურნირის 2024/25-ის სეზონის 1/4 ფინალში, ლუჩოსთვის აღნიშნული გამარჯვებაც ისტორიულია.
"ლურჯ-წითლებმა" ემერის გუნდი დაამარცხეს ჩემპიონთა ლიგის თავიანთი პირველი ტიტულისკენ მიმავალ გზაზე და ამ ყველაფერში თავისი როლი ხვიჩა კვარაცხელიამაც შეასრულა. ენრიკეს შეგირდებმა საშინაო შეხვედრა მოიგეს 3:1, მე-2 ბურთი კი ასტონ ვილას კარში სწორედ ქართველმა ვინგერმა შეაგდო.
პარკ დე პრენსის ბინადრების შემტევი მოგვიანებით მატჩის საუკეთესო ფეხბურთელადაც დასახელდა. იმ დაპირისპირებიდან გავიდა წელიწადნახევარი და პარი სენ-ჟერმენის მე-7 ნომერს კვლავ უწევს ემილიანო მარტინესის კარის აღება ტიტულის მოსაგებად. საინტერესოა ისიც, რომ 1-ელი დუელის მომენტისთვის პსჟ-ს ანგარიშზე იყო ევროპის მთავარი საკლუბო ტურნირის 0 ტიტული, დღეს კი უკვე 2-ია, თანაც მიყოლებით.
ვნახოთ, შეძლებს თუ არა 25 წლის შემტევი ჩემპიონთა ლიგის ზედიზედ ორი ტიტულისთვის, უეფას სუპერთასის ასევე მიყოლებით მეორე ჯილდოს მიმატებას. 12 აგვისტო, ზალცბურგი, რებ ბულ არენა..."ლურჯ-წითლები" კვარასთან ერთად რეალისა და მილანის ისტორიული მიღწევის გამეორებას ეცდებიან.
