ქუთაისის ტორპედო საქართველოს სუპერთასის გამარჯვებულია - დირკ შუსტერის გუნდმა ფინალში იბერია პენალტების სერიაში დაამარცხა და ამ ტიტულს მეოთხედ დაეუფლა.
ტორპედოს გერმანელმა სპეიცალისტმა დირკ შუსტერმა ტორპედოში პირველი ტიტული მოიგო და ევროტურნირებს კარგ განწყობაზე ხვდება.
შეგახსენებთ, რომ კონფერენს ლიგის პირველ საკვალიფიკაციო ეტაპზე ტორპედო აზერბაიჯანულ ზირას დაუპირისპირდება.
მოგებული ფინალის შემდეგ, შუსტერი LaGazzetta.ge-ს რამდენიმე საინტერესო თემაზე ესაუბრა.
მოგებული ფინალის ემოციები
"პირველ ტაიმში ორი გოლი გავიტანეთ და ყველაფერი კარგად მიდიოდა, თუმცა უკმაყოფილო ვარ, რადგან ორბურთიანი ჩამორჩენა გავანიავეთ და საქმე პენალტებამდე მივიყვანეთ. თერთმეტმეტრიანების სერია კი უბრალოდ ლატარეაა. თასი მოვიგეთ, მაგრამ ამ ტიტულს იბერიაც იმსახურებდა, მათ საკმაოდ ძლიერი გუნდი ჰყავთ."
მოლოდინები კონფერენს ლიგის მატჩის წინ
"ეს გამარჯვება კონფერენს ლიგის მატჩის წინ ძალიან მნიშვნელოვანი იყო. ბევრ სიტუაციებში ჩემი გუნდის შეტევის და დაცვით გარჯით მოვიხიბლე, ეს კი მოტივაციას გვაძლევს, რომ ევროასპარეზზე უკეთ ვითამაშოთ. ზირასთან მატჩამდე ბევრი უნდა ვიმუშავოთ, რათა სასურველ შედეგს მივაღწიოთ. ჩვენ ეს შეგვიძლია"
ქართულ ფეხბურთზე
"ბოლო წლებში ქართულ ფეხბურთს ძალიან დიდი პროგრესი აქვს, განსაკუთრებით ეროვნულ ნაკრებს. საკმაოდ მაღალი დონის მოთამაშეები გყავთ, ვითარდება შიდა ჩემპიონატიც. მაგალითად, დინამო ბათუმი დინამო თბილისის მატჩს ვუყურე და კარგი ატმოსფერო იყო, ასე უნდა იყოს ყოველ კვირა, ყველა მატჩში. დარწმუნებული ვარ, მომავალში ეროვნული ლიგა კიდევ უფრო განვითარდება."
ქართველ ფეხბურთელებთან მუშაობაზე
"რამდენიმე ქართველ ფეხბურთელს სუპერ მენტალობა აღმოაჩნდა, რამდენიმე ქართველი ფეხბურთელისგან კი ეს დამაკლდა. მაგალითად, როცა ამა თუ იმ მატჩში მეტოქემ გოლი გაგვიტანა, ზოგი ფეხბურთელისგან გუნდურობა და სულისკვეთება დამაკლდა. დღევანდელი ფეხბურთი არის ტვინი da კარგი ფიზიკა. ეს არის ის ყველაფერი, რაზეც გუნდში ვმუშაობთ. ვეცდებით, რომ მომავალში ჩვენი მენტალობა უკეთ გამოვავლინოთ."
მესიჯი ტორპედოს გულშემატკივრებს
"დიდი მადლობა ტორპედოს გულშემატკივრებს, რომ ჩვენს გვერდში არიან. ჩვენ ერთად უნდა შევძლოთ ევროტურნრირებზე წარმატების მიღწევა, რადგან ქუთაისი ამას იმსახურებს. ზირასთან მატჩში მათი თანადგომის იმედი გვაქვს, განსაკუთრებით საშინაო მატჩში, სადაც კარგ ატმოსფეროს ველოდებით. გულშემატკივრების თანადგომას მატჩის პირველი წუთიდან ბოლო წუთამდე ვგრძნობთ და ვიცი, რომ ახლა ისინი ამ თასის მოგებით ამაყები არიან."
