ჩემპიონთა ლიგის ფინალში პარი სენ-ჟერმენის ზედიზედ მეორე გამარჯვებას ხვიჩა კვარაცხელიას ფაქტორის გარეშე არ ჩაუვლია. ახალგაზრდა ქართველმა ვინგერმა პსჟ-სთვის მოიპოვა 11-მეტრიანი დარტყმა, რომელიც შემდეგ ზუსტად უსმან დემბელემ შეასრულა. ამ მომენტთან ერთად, გავიხსენოთ სხვა ყველაზე გამორჩეული პენალტები ევროპის მთავარი საკლუბო ტურნირის გადამწყვეტი დუელებიდან.
ჩაბი ალონსო - ისტორიული ქამბექის ბოლო დეტალი | ლივერპული 3:3 (პენ. 3:2) მილანი
ფინალი, სადაც პირველი ტაიმის დასრულებისას მილანი ლივერპულს ანგარიშით 3:0-ს ანადგურებდა. მეორე ნახევარი დაიწყო თამაშში დაბრუნების მცდელობით მერსისაიდელებისგან და 56-ე წუთისთვის ტაბლოზე უკვე 3:2 იყო. ქამბექში საბოლოო წერტილი დასვა ალონსომ, რომელიც მე-60 წუთზე 11-მეტრიანის ნიშნულთან მივიდა.
"როსონერის" კარში პენალტის დანიშნვა ჯენარო გატუზოს მიერ სტივენ ჯერარდის წაქცევამ გამოიწვია. კაპიტანს იმ მატჩში უკვე ჰქონდა გატანილი ერთი ბურთი და 11-მეტრიანის ნიშნულთან როგორც აღვნიშნეთ, ესპანელი შუახაზელი აღმოჩნდა. მიუხედავად იმისა, რომ ნელსონ დიდამ მისი დარტყმული მოიგერია, ჩაბიმ დამატებაზე "დიავოლოს" კარის აღება მაინც შეძლო.
პირველი ტაიმის მერე კარლო ანჩელოტის ფეხბურთელების გონებაში ტრიალებდა მხოლოდ ერთი რამ - ჩემპიონობის აღნიშნვა, თუმცა "წითლებმა" 15 წუთში ყველაფერი თავდაყირა დააყენეს. ფსიქოლოგიური უპირატესობა მთლიანად გადავიდა ენფილდის მკვიდრთა მხარეს და მათ ეს მუხტი შეხვედრის შემდგომ 11-მეტრიანებამდეც გაყვათ.
ალფრედო დი სტეფანო - ჩემპიონთა თასის ფინალის პირველი პენალტი, თანაც სკანდალური | რეალი 2:0 ფიორენტინა
ჩემპიონთა თასის ფინალში პირველი პენალტი დაინიშნა 1957 წელს, რეალისა და ფიორენტინას მატჩში. დასარტყმელად მივიდა დი სტეფანო, თუმცა რამდენად ეკუთვნოდა მადრიდს აღნიშნული 11-მეტრიანი, რთული სათქმელია. საქმე ისაა, რომ შეხვედრის მსაჯმა ლეო ჰორნმა არ გაითვალისწინა ლაინსმენის მითითება, რომელიც სულ არ თვლიდა, რომ პენალტი დასანიშნი იყო.
ფლორენციული გუნდის მხრიდან წესების დარღვევის მომენტში "სამეფო კლუბის" დაზარალებული თავდამსხმელი, ენრიკე მატეოსი იმყოფებოდა ოფსაიდში და ამის გარდა, მისი წაქცევა საჯარიმოს გარეთ მოხდა. ნიდერლანდელმა მსაჯმა სანტიაგო ბერნაბეუს მკვიდრთა სასარგებლოდ 11-მეტრიანი მაინც დანიშნა.
პენალტი ზუსტად შეასრულა ლეგენდარულმა არგენტინელმა თავდამსხმელმა, რამდენიმე წუთში კი პაკო ხენტომ "ვიოლას" მეორე გოლიც გაუტანა. კომუნალეს მკვიდრებმა ვეღარაფრით უპასუხეს ხოსე ვილალონგას შეგირდების 2 ბურთს, რის შედეგადაც თავიანთ ისტორიაში პირველი და უკანასკნელი ფინალში გასვლა წაგებით დაასრულეს.
ეუსებიო და სილვა ფერეირა - ბოლო საჩემპიონო გოლი | ბენფიკა 5:3 რეალი
რეალის ზედიზედ ხუთი ჩემპიონობის შემდეგ, ევროპის მთავარი დომინანტის სტატუსი გადმოიბარა ბენფიკამ, რომელმაც ფინალში ჯერ დაამარცხა ბარსელონა, მომდევნო სეზონში კი თავად ევროპის მთავარი საკლუბო ტურნირის ყველაზე ტიტულოვანი წარმომადგენელი. მადრიდის მხრიდან ჰეთ-თრიქი შეასრულა ფერენც პუშკაშმა, მაგრამ ლისაბონელებმა მოწინააღმდეგეს 5 ბურთით უპასუხეს.
პირველი ტაიმი დასრულდა "სამეფო კლუბის" გამარჯვებით, ანგარიშით 3:2, მეორე ნახევარში კი საფეხბურთო სამყარომ "არწივების" რემონტადა იხილა. ბელა გუტმანის შეგირდების მხრიდან საბოლოო წერტილი დასვა ეუსებიომ, რომელმაც ჯერ თამაშიდან შეუგდო ბერნაბეუს მკვიდრებს, შემდეგ კი 11-მეტრიანიდანაც.
ეს იყო ეშტადიუ და ლუშის ბინადრების ბოლო ჩემპიონობა, რომელიც ლეგენდარული პორტუგალიელი თავდამსხმელის პენალტით დაგვირგვინდა. იმის შემდეგ, ბენფიკამ წააგო არაერთი გადამწყვეტი შეხვედრა და ეს წარუმატებელი სერია დღემდე გრძელდება. რთული სათქმელია, კიდევ როდის ექნებათ ლისაბონელებს ევროთასის აღმართვის ბედნიერება.
ანტუან გრიზმანი - პენალტი, რომელსაც ფინალის მიმდინარეობის შეცვლა შეეძლო | რეალი 1:1 (პენ. 5:3) ატლეტიკო
ჩემპიონთა ლიგის ფინალში გამართულ მადრიდულ დერბიში ორივე შემთხვევაში გამარჯვებული გამოვიდა რეალი, თუმცა იყო მომენტები, როდესაც მოგებაზე ფიქრი ატლეტიკოსაც შეეძლო. ერთ-ერთი ასეთი ეპიზოდია გრიზმანის გამოუყენებელი პენალტი სან სიროზე გამართულ შეხვედრაში.
"როხიბლანკოსისთვის" პენალტი მოიპოვა ფერნანდო ტორესმა, ვის წინააღმდეგაც წესები კეპლერ პეპემ დაარღვია. "სამეფო კლუბის" სასარგებლოდ იმ მომენტში იყო 1:0, ფრანგი ფორვარდის შესრულების შემდეგ, ანგარიში არ შეცვლილა. "ინდიელებმა" ძირითადი დროის მიწურულს მაინც შეაგდეს 1 ბურთი, რის შედეგადაც შეხვედრა ოვერტაიმსა და 11-მეტრიანებში გადავიდა.
დიეგო სიმეონეს გუნდმა იბრძოლა, თუმცა "ბლანკოსთან" კიდევ ერთი მარცხი იგემა. ვინ იცის, რა სცენარით განვითარდებოდა ის მატჩი, ანტუანს პენალტი რომ ზუსტად შეესრულებინა. ეს იყო ატლეტიკოს რიგით მე-3 წაგება ევროპის მთავარი საკლუბო ტურნირის გადამწყვეტ შეხვედრაში, 1974 და 2014 წლების შემდეგ.
მიშელ პლატინი - სადავო პენალტი ეიზელის ტრაგედიის ფონზე | იუვენტუსი 1:0 ლივერპული
ყველაზე მძიმე მატჩი ფეხბურთის ისტორიაში, რომელიც თანამედროვეობას ეიზელის ტრაგედიის სახელით შემორჩა. 39 გარდაცვლილი, 600-მდე დაშავებული, არადა ისინი ეიზელზე უბრალოდ ფეხბურთის საყურებლად იყვნენ მისულები. ტრაგედიის მიუხედავად, შეხვედრა მაინც ჩატარდა, მაგრამ 90 წუთის დაგვიანებით.
რაც შეეხება მატჩის შედეგს, ყველაფერი გადაწყვიტა პლატინის პენალტმა, თუმცა მისი დანიშნვა ბევრ კითხვას იწვევდა. გარი გილესპიმ მართლაც წააქცია ზბიგნევ ბონეკი, მაგრამ საჯარიმოდან დაახლოებით 1 მეტრით გარეთ. შეხვედრის მსაჯი, ანდრე დაინა იმყოფებოდა მოშორებით და აღნიშნულ ეპიზოდს ვერ ხედავდა.
ასე გახდა იუვენტუსი ჩემპიონთა თასის გამარჯვებული თავის ისტორიაში პირველად. ცხადია, მატჩის დასრულების შემდეგ, არავის გაუმახვილებია ყურადღება საკამათო 11-მეტრიანზე, იმის ფონზე, თუ რა მოხდა ეიზელზე შეხვედრის დაწყების წინ. ლივერპულმა წააგო და საკუთარ ქომაგთა არეულობის გამო, ევროსარბიელს 6 წლით ჩამოშორდა.
ფერენც პუშკაში - პენალტი ყველაზე უხვგოლიან ფინალში | რეალი 7:3 აინტრახტი
რეალისა და აინტრახტის 10-გოლიან თრილერში ერთი პენალტიც გამოირია. მაშინ, როდესაც ანგარიში იყო ჯერ კიდევ საფეხბურთო (3:1), პუშკაშმა ფრანკფურტს 11-მეტრიანიდან შეუგდო. უნგრელმა ფორვარდმა აღნიშნულ შეხვედრაში შეასრულა პოკერი და ის დღემდე რჩება ერთადერთ მოთამაშედ 4 გატანილი ბურთით ევროპის მთავარი საკლუბო ტურნირის გადამწყვეტ დუელში.
პენალტის შემდეგ, ფერენცმა "არწივებს" გაუტანა კიდევ ერთი გოლი, რის შედეგადაც ანგარიში მადრიდული გუნდის სასარგებლოდ 5:1 გახდა. ამ ყველაფრის შემდეგ, ჰემპდენ პარკზე დამსწრე პუბლიკამ იხილა სრული სიგიჟე: 4 ბურთი 71-75 წუთების შუალედში. რთული სათქმელია, ვიხილავთ თუ არა ევროთასებზე მსგავს ანგარიშს ოდესმე კიდევ.
საინტერესოა ისიც, რომ ფინალამდე ერთი სტადიით ადრე, ვალდშტადიონიოს ბინადრები გამანადგურებლების როლში თავად აღმოჩნდნენ. ჩემპიონთა თასის 1/2 ფინალში პოლ ოსვალდის შეგირდებმა გლაზგო რეინჯერსს ჯერ 6:1 მოუგეს, საპასუხო შეხვედრაში კი 6:3. როგორც აღვნიშნეთ, "ლურჯების" სახელით აინტრახტზე შური "სამეფო კლუბმა" იძია.
არიენ რობენი - ყოფილ თანაგუნდელთან წაგებული დუელი | ჩელსი 1:1 (პენ. 4:3) ბაიერნი
დიდ ტურნირების ფინალებში მომენტების გამოუყენებლობა, რობენის კარიერის მთავარი ტრაგედია არის. საკმარისია გავიხსენოთ 2010 წლის მუნდიალის გადამწყვეტი შეხვედრის ერთ-ერთი საკვანძო ეპიზოდი, როცა ნიდერლანდელმა ვინგერმა იკერ კასილასთან დუელში 100%-იანი მომენტი გაფლანგა.
მსოფლიო ჩემპიონატის ფინალიდან ორი წლის შემდეგ, არიენის პენალტი ჩემპიონთა ლიგის ასევე ფინალში პეტრ ჩეხმა მოიგერია. ეს ყველაფერი იმის გათვალისწინებით, რომ ბაიერნსა და ჩელსის შეხვედრაში დაწყებული იყო ექსტრა ტაიმი, ტაბლოზე კი 1:1 ციმციმებდა. როგორც გვახსოვს, მიუნხენელებმა აღნიშნული დუელი 11-მეტრიანებში წააგეს.
ვინ იცის, რა მოხდებოდა, "რეკორდმაისტერის" შემტევს პენალტი ზუსტად რომ დაერტყა. ლეგენდარულმა გარემარბმა მომდევნო სეზონში მოახდინა რეაბილიტაცია, როცა დორტმუნდის ბორუსიასთან გადამწყვეტ შეხვედრაში იუპ ჰაინკესის გუნდისთვის მოგების მომტანი ბურთი შეაგდო. "შუშის კაცმა" გოლით ილქაი გიუნდოგანის 11-მეტრიანს უპასუხა.
კრიშტიანუ რონალდუ - ლა დეციმა! | რეალი 4:1 ატლეტიკო
მართალია, რონალდუს პენალტი ატლეტიკოსთან ფინალში აღარაფერს წყვეტდა, თუმცა ეს გოლიც ხომ მისი ლეგენდარული კარიერის ნაწილია. სერხიო რამოსის 90+3 წუთზე-ე თავურის შემდეგ, "როხიბლანკოსთან" შეხვედრა გადავიდა ექსტრა ტაიმში, სადაც რეალმა მეზობლებს 3 უპასუხა ბურთი შეუგდო.
ერთ-ერთი გოლი იყო პორტუგალიელი თავდამსხმელის პენალტი, რომელიც მან "ინდიელებს" 120-ე წუთზე გაუტანა. "სამეფო კლუბის" ლა დეციმასკენ მიმავალ გზაზე უკანასკნელი დეტალი კრიშტიანუს 11-მეტრიანი აღმოჩნდა. შეგახსენებთ იმასაც, რომ სიმეონეს შეგირდებთან მოგებამდე, "ბლანკოსი" ჩემპიონობას 12 წლის მანძილზე ვერ ახერხებდა.
ეს პენალტი იყო სანტიაგო ბერნაბეუს ბინადრების ყველა დროის საუკეთესო ბომბარდირის რიგით მეორე გოლი ჩემპიონთა ლიგის ფინალებში. რეალის ლეგენდარულმა მე-7 ნომერმა მომავალში აღნიშნული შედეგი გაზარდა 4-მდე, რითაც მთავარი გოლეადორი ის ევროპის საკლუბო ტურნირის გადამწყვეტ შეხვედრებშიც გახდა.
მოჰამედ სალაჰი - ყველაზე სწრაფი პენალტი ჩემპიონთა ლიგის ფინალის ისტორიაში | ლივერპული 2:0 ტოტენჰემი
ლივერპულისა და ტოტენჰემის მატჩში პენალტი დაინიშნა მეორე წუთზევე - ყველაზე მალე ჩემპიონთა ლიგის ფინალების ისტორიაში. სადიო მანეს ჩაწოდება, მუსა სისოკოს ხელით თამაში და სალაჰის ზუსტი შესრულება. აღსანიშნავია, რომ მე-2 წუთზე შედგა უშუალოდ დარტყმა, თორემ თვითონ 11-მეტრიანი მერსისაიდელებმა 24-ე წამზე მოიპოვეს.
ცხადია, ამ მომენტმა ითამაშა უდიდესი როლი ფინალის მიმდინარეობაზე, რადგან ლონდონური გუნდი დამარცხებულის როლში მატჩის დებიუტიდანვე აღმოჩნდა. "წითლებმა" ვერ მიიღეს "მამლებისგან" ღირსეული წინააღმდეგობა, შეხვედრის მიწურულს კი მე-2 ბურთიც შეაგდეს. ასე მოიგო იურგენ კლოპმა თავისი პირველი და ჯერჯერობით უკანასკნელი ევროტიტული.
2019 წელს, ჰოტსპურ სთეიდიუმის ბინადრები იყვნენ ევროპის ვიცე-ჩემპიონები, თუმცა სულ რაღაც ექვსი წლის შემდეგ, პრემიერ ლიგის ფსკერზე დაეშვნენ. დიახ, უკვე ზედიზედ მე-2 სეზონია, რაც ტოტენჰემი ინგლისის ჩემპიონატში მე-17 პოზიციას ვერ ცდება. ვიხილავთ თუ არა კიდევ ლონდონელებს ასეთი მნიშვნელობის შეხვედრაში? რთული სათქმელია.
უსმან დემბელე - ხვიჩა კვარაცხელიას მიერ მოპოვებული პენალტი | პსჟ 1:1 (პენ. 4:3) არსენალი
ულაპარაკოდ, პარი სენ-ჟერმენი ევროპის საუკეთესო გუნდია, თუმცა არსენალთან ფინალში მოქმედი ჩემპიონები მარცხთან ახლოს იყვნენ. ლონდონელებმა შეაგდეს სწრაფი ბურთი, შემდეგ კი უკანახაზში ნამდვილი ციხესიმაგრე აღმართეს. მათი კედლები გაარღვია კვარამ, რომელმაც პსჟ-სთვის 11-მეტრიანი მოიპოვა.
"მეთოფეების" საჯარიმოში ქართველი შემტევის შეჭრის შემდეგ, კრისტიან მოსკერას ვარდნის გაკეთების გარდა სხვა არაფერი ჰქონდა დარჩენილი. 11-მეტრიანი ზუსტად შეასრულა დემბელემ, რომელმაც "ლურჯ-წითლები" თამაშშიც დააბრუნა. საბოლოო წერტილი დაისვა შეხვედრის შემდგომ პენალტებში, სადაც ლუის ენრიკეს შეგირდებს მიკელ არტეტას გუნდზე მეტად გაუმართლათ.
მართალია, ხვიჩას არ გაუტანია გოლი ჩემპიონთა ლიგის ზედიზედ მეორე ფინალში, თუმცა პარკ დე პრენსის ბინადრების გამარჯვება მის გარეშე ვერ შედგებოდა. პარი სენ-ჟერმენის ზღაპარი გრძელდება და მომავალ სეზონში მოქმედი ჩემპიონები ევროპის მთავარი საკლუბო ტურნირის მიყოლებით მესამედ მოგებას ეცდებიან.
